Read Maltese Bible with DC – IL-BIBBJA IL-KOTBA MQADDSA ISAIJA 63 Bible Online

ISAIJA 63 - Maltese Bible with DC – IL-BIBBJA IL-KOTBA MQADDSA bible

ISAIJA 63

¹Min hu dan li ġej minn Edom, bi ħwejġu ħomor minn Bosra? Hu mżejjen bi lbiesu, miexi fil-milja tal-qawwa tiegħi. “Jiena hu li nxandar il-ħelsien, jiena l-qawwi biex ngħin.”

²Għaliex hemm l-aħmar fi lbiesek, u ħwejġek bħal min jgħaffeġ fil-magħsar?

³“Fil-magħsar għaffiġt jien waħdi, mill-poplu ma kien hemm ħadd miegħi: għaffiġthom fl-għadab tiegħi, sħaqthom fil-qilla tiegħi. U traxxax demmhom fuq ħwejġi, u ħammiġt ilbiesi kollu.

⁴Għax kien jum ta’ vendetta f’qalbi, u s-sena tal-fidwa tiegħi waslet.

⁵Ħarist, u ma kien hemm ħadd min jgħinni: skantajt li ma kien hemm ħadd li jieqaf miegħi; imma għenni driegħi biex irbaħt, u waqaf miegħi l-għadab tiegħi.

⁶Għaffiġt il-popli f’għadbi, tħanthom fis-saħna tiegħi, u demmhom xerridt mal-art.”

⁷Irrid infakkar il-grazzji tal-Mulej, insamma’ għanja ta’ tifħir lill-Mulej, għal dak kollu li għamel magħna, għax kbira kienet il-ħnientu ma’ dar Iżrael; mexa magħna skont l-imħabba tiegħu, skont it-tjieba kbira tiegħu.

⁸Hu qal: “Iva, huma l-poplu tiegħi, wliedi li ma jimxux wiċċ b’ieħor.” U hu sar għalihom is-Salvatur fid-dwejjaq kollha tagħhom,

⁹Ma kienx xi messaġġier jew xi anġlu, imma hu stess salvahom għall-imħabba u l-ħniena tiegħu. Hu ħelishom, refagħhom, u ġarrhom dejjem fl-imgħoddi.

¹⁰Iżda huma ħaduha kontrih, u nikktu l-ispirtu qaddis tiegħu, u sar għadu għalihom u tqabad kontrihom.

¹¹U ftakru f’jiem l-imgħoddi: Mosè, il-qaddej tiegħu. Fejn hu dak li ħeles mill-baħar, ir-ragħaj tal-poplu tiegħu? Fejn hu dak li qiegħed f’nofshom, l-ispirtu qaddis tiegħu?

¹²Hu li kien jimxi fuq il-leminija ta’ Mosè bid-driegħ imsebbaħ tiegħu? Li feraq il-baħar quddiemhom biex jagħmel għalih isem li jibqa’ għal dejjem?

¹³Li mexxiehom qalb il-mewġ u ma għotrux bħal żiemel fid-deżert?

¹⁴Bħal annimal li nieżel fil-wied, immexxi mill-ispirtu tal-Mulej, hekk int mexxejt il-poplu tiegħek biex tagħmel għalik isem glorjuż.

¹⁵Ħares mis-sema u ara, ħares mill-għamara mqaddsa u glorjuża tiegħek. Fejn hi l-ħeġġa u l-qawwa tiegħek? Fejn hi l-ħerqa u l-ħniena ta’ qalbek? Tonqosx mill-ħniena tiegħek għalina.

¹⁶Għax int, Mulej, missierna; Abraham ma jafniex, Iżrael ma jagħrafniex. Int, Mulej, missierna, ismek il-Feddej tagħna sa minn dejjem.

¹⁷Għaliex, Mulej, iġġegħelna nwarrbu minn triqatek, u twebbsilna qalbna biex ma nibżgħux minnek? Erġa’ lura, minħabba l-qaddejja tiegħek, it-tribujiet li huma wirtek.

¹⁸Għaliex rifsu l-ħżiena fis-santwarju tiegħek, u l-għedewwa tagħna middew riġlejhom fit-tempju tiegħek?

¹⁹Sirna bħall-ġnus li int qatt ma ħkimt fuqhom, u lanqas ismek ma jissejjaħ fuqhom. Mhux li kont iċċarrat is-smewwiet u tinżel minn hemm,