Read Maltese Bible with DC – IL-BIBBJA IL-KOTBA MQADDSA ISAIJA 66 Bible Online

ISAIJA 66 - Maltese Bible with DC – IL-BIBBJA IL-KOTBA MQADDSA bible

ISAIJA 66

¹Dan jgħid il-Mulej: “Is-smewwiet it-tron tiegħi, l-art mirfes riġlejja! X’dar tistgħu tibnuli? Fejn hu l-post tal-mistrieħ tiegħi?

²Dawn kollha idejja għamluhom, dawn kollha tiegħi! Oraklu tal-Mulej. Imma fuq dan jien nixħet ħarsti: fuq l-imsejken u n-niedem f’qalbu, u fuq min jitriegħed għal kelmti.

³Hawn min joqtol gendus, imbagħad jidrob bniedem; hawn min joffri n-nagħaġ, imbagħad jifga kelb. Jagħmel l-offerti tal-qmuħ, u joffri demm il-ħanżir; jaħraq l-inċens, u jbierek l-idoli. Dawn in-nies għażlu triqathom, u qalbhom għoġbuha qżiżijiethom.

⁴Jien ukoll nagħżel l-hemm għalihom, u dak li jibżgħu minnu nixħtu fuqhom. Għax jien sejjaħt, u ħadd ma wieġeb, tkellimt u ma semgħux. Għamlu l-ħażin f’għajnejja u għażlu dak li ma jogħġobnix.”

⁵Isimgħu l-kelma tal-Mulej, intom li titriegħdu għal kelmtu: “Qalu ħutkom, li jobogħdukom, li keċċewkom minħabba ismi: ‘Ħa jissebbaħ il-Mulej, ħalli naraw il-ferħ tagħkom.’ Iżda huma għad jiregħxu.

⁶Isimgħu! Ħoss ta’ għagħa mill-belt, ħoss mit-tempju, ħoss il-Mulej, li jrodd il-ħlas lill-għedewwa tiegħu!

⁷Qabel stess ma tkagħwġet, ħelset; qabel ma ġieha wġigħ il-ħlas, wildet iben.

⁸Min qatt sama’ b’dan? Minn qatt ra ħaġa bħal din? Jista’ pajjiż isir f’jum wieħed? Jista’ poplu jitwieled f’waqt wieħed? Iva, Sijon, malli ħasset uġigħ il-ħlas, wildet lil uliedha!

⁹Jien li niftaħ il-ġuf, ma nwellidx? Jgħid il-Mulej. Jien li nwelled, nagħlaq il-ġuf? Jgħid Alla tiegħek.

¹⁰Ifirħu lil Ġerusalemm, thennew biha, intom ilkoll ħbieb tagħha! Aqbżu bil-ferħ, intom ilkoll li qsamtu swied il-qalb magħha,

¹¹Hekk intom terdgħu u tixbgħu minn sider il-faraġ tagħha; terdgħu u titgħaxxqu mis-sider mimli tagħha.”

¹²Għaliex dan jgħid il-Mulej: “Arani! Se nifrex fuqha s-sliem bħal xmara, u bħal xmara tfur il-ġid tal-ġnus. U intom terdgħu u fuq id-dirgħajn tintrefgħu, u jżiegħlu bikom fuq l-irkupptejn.

¹³Bħalma omm tfarraġ lil binha, hekk jiena nfarraġ lilkom u f’Ġerusalemm titfarrġu.

¹⁴Taraw u tifraħ qalbkom, u għadamkom bħal ħaxix iħaddar; u jagħrfu fil-qaddejja tiegħu id il-Mulej, u l-korla tiegħu fuq l-għedewwa tiegħu.

¹⁵Arawh! Ġej il-Mulej imdawwar bin-nar, bħal riefnu l-imriekeb tiegħu, u jferragħ għadbu fis-saħna tiegħu, u jheddu bl-ilsna tan-nar.

¹⁶Għax bin-nar il-Mulej mill-art kollha jagħmel il-ħaqq, bix-xabla tiegħu minn kull bniedem; kotra kbira joqtol il-Mulej.

¹⁷Dawk li jitqaddsu u jitnaddfu, u jmorru fil-ġonna wara xulxin fid-dawra tas-sħarijiet, dawk li jieklu l-laħam tal-ħanżir, il-qżiżijiet u l-ġrieden, ilkoll jintemmu f’daqqa, oraklu tal-Mulej.

¹⁸Jiena naf b’għemilhom u fehmithom; għad niġi niġbor il-ġnus kollha, u l-popli ta’ kull ilsien; dawn jiġu u jaraw is-sebħ tiegħi.

¹⁹Jiena ngħolli għalihom sinjal, u nibgħat lil xi wħud mill-fdal ta’ Iżrael għand il-ġnus, f’Tarsis, Put, Lud, u Mesek, Ros, Tubal u Ġawan, u lejn ix-xtut imbiegħda li qatt ma semgħu bija, u qatt ma raw is-sebħ tiegħi, u huma jxandru s-sebħ tiegħi qalb il-ġnus.

²⁰U jġibu lil ħutkom kollha minn kull ġens, bħala offerta lill-Mulej; iġibuhom fuq żwiemel u karrijiet, fuq suġġetti u bgħula u iġmla, għal fuq il-muntanja qaddisa tiegħi, f’Ġerusalemm, jgħid il-Mulej, bħalma wlied Iżrael iġibu l-offerti tal-qmuħ tagħhom f’ġarar indaf fit-tempju tal-Mulej.

²¹U lil xi wħud minnhom neħodhom b’qassisin u Leviti, jgħid il-Mulej.

²²Għax bħalma jibqgħu quddiemi s-smewwiet ġodda, u l-art ġdida li jiena nagħmel, jgħid il-Mulej, hekk jibqa’ nisilkom u isimkom.

²³U jiġri li minn xahar għal xahar, u minn Sibt għal Sibt, kulħadd jiġi jinxteħet quddiemi, jgħid il-Mulej.

²⁴U meta joħorġu, jaraw l-iġsma tan-nies li xxewxu kontrija. Id-dud tagħhom ma jmutx, lanqas jintefa n-nar tagħhom, u kulħadd jistmellhom.”