Read Maltese Bible with DC – IL-BIBBJA IL-KOTBA MQADDSA ISAIJA 7 Bible Online

ISAIJA 7 - Maltese Bible with DC – IL-BIBBJA IL-KOTBA MQADDSA bible

ISAIJA 7

¹Fi żmien Aħaż[23] bin Ġotam, bin Għużżija, sultan ta’ Ġuda, ġara li Resin, sultan ta’ Aram, u Pekaħ bin Remalija, sultan ta’ Iżrael, telgħu Ġerusalemm biex jaħbtu għaliha, imma ma felħux għaliha.

²U wasslu l-aħbar f’dar David u qalulu: “Aram waqqaf il-kamp f’Efrajm.” U qalbu u qalb il-poplu triegħdu bħalma jitriegħdu l-friegħi fil-masġar bir-riħ.

³U l-Mulej qal lil Isaija: “Mur iltaqa’ ma’ Aħaż, int u ibnek Sijarjasub, f’tarf is-sieqja tal-ġiebja l-fuqanija, fuq triq l-għalqa tal-Ħassiel.

⁴U għidlu, “Qis li sserraħ rasek, la tibżax, la taqtax qalbek quddiem dawk iż-żewġt ifdal ta’ ħatbiet idaħħnu, mill-qilla tar-rabja ta’ Resin, ta’ Aram u ta’ bin Remalija.

⁵Għax Aram, Efrajm u bin Remalija nasbu d-deni kontrik

⁶u qalu: ‘Ħa nitilgħu għal Ġuda, naħtfuha f’idejna, u nġegħluha toqgħod għalina, u nqiegħdu sultan fuqha lil bin Tabal.’

⁷“Dan jgħid Sidi l-Mulej: ‘Dan ma jseħħx u ma jkun qatt.

⁸Għax ras Aram Damasku, u ras Damasku Resin; ħamsa u sittin sena oħra u Efrajm isir bċejjeċ, ma jibqax poplu.

⁹U ras Efrajm Samarija, u ras Samarija bin Remalija. Jekk ma temmnux, ma tibqgħux sħaħ.’ ”

¹⁰Il-Mulej issokta jkellem lil Aħaż u jgħidlu:

¹¹“Itlob sinjal[24] għalik mingħand il-Mulej, Alla tiegħek, f’qiegħ l-art jew fl-għoli tas-smewwiet.”

¹²U Aħaż wieġeb: “Ma nitlobx: ma rridx nittanta lill-Mulej.”

¹³U l-profeta wieġeb: “Isimgħu, mela, dar David: mhux biżżejjed għalikom li tkiddu lill-bnedmin, biex issa se tkiddu lil Alla tiegħi?

¹⁴Għalhekk is-sinjal jagħtihulkom Sidi stess: Araw, ix-xebba titqal u tiled iben, u ssemmih Għimmanu-el[25].

¹⁵Baqta u għasel jiekol[26], meta jasal biex jagħraf iwarrab il-ħażin u jagħżel it-tajjeb.

¹⁶Għaliex qabel ma t-tifel jagħraf iwarrab il-ħażin u jagħżel it-tajjeb, titħarbat l-art, li quddiem is-slaten tagħha inti mbażża’.

¹⁷U l-Mulej iġib fuqek, u fuq il-poplu tiegħek, u fuq dar missierek, jiem li qatt ma ġew mindu nfirdu Efrajm minn Ġuda: is-sultan tal-Assirja!”

¹⁸U jiġri f’dak il-jum: isaffar il-Mulej lid-dubbiena, li hemm f’ras ix-xmajjar tal-Eġittu, u lin-naħla li hemm fl-art tal-Assirja.

¹⁹U jiġu u jistrieħu lkoll fil-widien, fl-irdumijiet, fi xquq il-blat, fuq l-għollieq imxewwek u fuq kemm hemm wesgħat.

²⁰Dakinhar iqaxxar Sidi b’mus mikri min-naħa l-oħra tax-xmara, bis-sultan tal-Assirja, il-qorriegħa tar-ras u x-xagħar tar-riġlejn, u jġiżż il-leħja wkoll.

²¹U jiġri dakinhar, li kull wieħed irabbi baqra u żewġ nagħġiet,

²²u minħabba l-kotra tal-ħalib li jagħmlu jiekol il-baqta, għax baqta u għasel jiekol, kull min jifdal f’nofs l-art.

²³U jiġri wkoll dakinhar li kull imkien li fih elf dielja jiswew elf xekel tal-fidda, hemm jitla’ x-xewk u l-ħurrieq.

²⁴Bil-vleġeġ u l-qaws jgħaddu minnha għax fl-art kollha jkun hemm xewk u ħurrieq.

²⁵U l-muntanji kollha fejn kienu jagħżqu bl-imgħażqa, ma tgħaddix minħabba l-biża’ tax-xewk u l-ħurrieq. Imma hemm jitilqu l-gniedes, u jirgħu n-nagħaġ.