Read Maltese Bible with DC – IL-BIBBJA IL-KOTBA MQADDSA ISAIJA 9 Bible Online

ISAIJA 9 - Maltese Bible with DC – IL-BIBBJA IL-KOTBA MQADDSA bible

ISAIJA 9

¹Il-poplu li kien miexi fid-dlam ra dawl kbir; in-nies li joqogħdu f’art id-dlam dawl idda fuqhom.

²Int kattart il-ġens, kabbart l-hena; huma ferħu quddiemek, bħalma jifirħu fi żmien il-ħsad, bħalma jifirħu fi qsim il-priża.

³Għax il-madmad li kien itaqqlu, u l-ħatar ta’ fuq spallejh, u l-bastun tal-argużin, int kissirthom bħal f’jum Midjan.

⁴Għax kull qorq li jħabbat fit-taqtigħa, kull mantell mgħargħar fid-demm jispiċċa għall-ħruq, biex jieklu n-nar.

⁵Għax tweldilna tifel[34], ingħatalna iben; is-setgħa tkun fuq spallejh, u jsemmuh: “Kunsillier tal-għaġeb, Alla setgħan, Missier għal dejjem, Prinċep tas-sliem.”

⁶Kbira tkun setegħtu, u s-sliem bla qjies fuq it-tron ta’ David u s-saltna tiegħu. Hu jwettaqha u jsaħħaħha bil-ħaqq u s-sewwa, minn issa u għal dejjem. Il-ħeġġa tal-Mulej tal-eżerċti tagħmel dan.

⁷Bagħat Sidi kelma kontra Ġakobb, u waqgħet fuq Iżrael.

⁸Il-poplu kollu jkun jaf, Efrajm u dawk li jgħammru f’Samarija, dawk li jgħidu mkabbra u suppervi f’qalbhom:

⁹“Waqa’ x-xaqquf, nibnu bil-ġebel minġur; tqaċċat il-ġummajż, inxettlu ċ-ċedru.”

¹⁰U l-Mulej qajjem kontrih l-avversarji tiegħu, u xewwex l-għedewwa tiegħu:

¹¹Lil Aram[35] mil-Lvant, u l-Filistin mill-Punent, li belgħu lil Iżrael b’ħalq daqsiex. B’danakollu l-kotra tiegħu ma reġgħetx lura, u idu għadha merfugħa.

¹²Il-poplu ma darx lejn min darbu, u l-Mulej tal-eżerċti ma fittxewhx.

¹³Għalhekk il-Mulej qata’ minn Iżrael ir-ras u d-denb, il-palma u s-simar f’jum wieħed;

¹⁴l-anzjan u n-nobbli huma r-ras, u l-profeta, mgħallem il-gideb, id-denb!

¹⁵Il-mexxejja ta’ dan il-poplu mexxewh ħażin, u ntilfu l-immexxijin.

¹⁶Għalhekk Sidi ma jħennx għaż-żgħażagħ tagħhom; ma jitħassarx l-iltiema u r-romol tagħhom. Għax ilkoll midgħajja u ħżiena; kull fomm jitkellem il-bluha. Minkejja dan għadbu ma reġax lura, u idu għadha merfugħa.

¹⁷Għax il-ħażen bħal ħuġġieġa nar, jibla’ x-xewk u l-ħurrieq, u jqabbad il-ħatab tal-masġar, u jinbarmu ’l fuq f’kolonna duħħan.

¹⁸Bl-għadab tal-Mulej tal-eżerċti maħruqa l-art, u l-poplu bħal ikel in-nar, u ma jaħmilx wieħed lil ieħor.

¹⁹Jaħtaf min-naħa tal-lemin, u jibqa’ bil-ġuħ, jiekol min-naħa tax-xellug, u ma jixbax, kull wieħed jiekol laħam għajru.

²⁰Manassi kontra Efrajm[36], Efrajm kontra Manassi, it-tnejn flimkien kontra Ġuda. Minkejja dan għadbu ma reġax lura, u idu għadha merfugħa.