Read Maltese Bible with DC – IL-BIBBJA IL-KOTBA MQADDSA LEVITIKU 1 Bible Online

LEVITIKU 1 - Maltese Bible with DC – IL-BIBBJA IL-KOTBA MQADDSA bible

LEVITIKU 1

¹U l-Mulej sejjaħ lil Mosè u kellmu mit-tinda tal-laqgħa u qallu:

²“Kellem lil ulied Iżrael u għidilhom: ‘Meta xi ħadd minnkom ikun irid jagħmel offerta lill-Mulej, jagħmilha mill-bhejjem, mill-baqar jew min-nagħaġ tagħkom.

³Jekk tkun vittma mill-baqar għas-sagrifiċċju tal-ħruq[1], l-offerta għandha tkun ta’ raġel u bla difett; u jġibha quddiem il-bieb tat-tinda tal-laqgħa, u hekk jogħġob lill-Mulej.

⁴Imbagħad iqiegħed idu fuq ras il-vittma u tkun milqugħa għall-espjazzjoni tiegħu;

⁵joqtol l-għoġol quddiem il-Mulej, u l-qassisin ulied Aron joffru d-demm, u jxerrduh madwar l-artal, li qiegħed biswit il-bieb tat-tinda tal-laqgħa.

⁶Wara jqaxxar il-vittma u jqattagħha bċejjeċ,

⁷u wlied Aron il-qassis iqabbdu n-nar fuq l-artal u jixħtu l-ħatab fuq in-nar.

⁸Il-qassisin ulied Aron jirranġaw il-bċejjeċ, ir-ras u x-xaħam fuq il-ħatab u n-nar ta’ fuq l-artal;

⁹il-ġewwieni u s-saqajn jaħsilhom bl-ilma; u wieħed mill-qassisin jaħraq kollox b’sagrifiċċju tal-ħruq b’riħa tfuħ quddiem il-Mulej.

¹⁰“Jekk l-offerta għas-sagrifiċċju tal-ħruq tkun mill-imrieħel - xi ħaruf jew mogħża - għandu joffri raġel u bla difett.

¹¹U joqtlu fuq in-naħa tat-Tramuntana tal-artal, quddiem il-Mulej; u l-qassisin, ulied Aron, ixerrdu d-demm madwar l-artal.

¹²Imbagħad iqattgħu bċejjeċ, u l-qassis jirranġahom flimkien mar-ras u x-xaħam fuq il-ħatab u n-nar ta’ fuq l-artal.

¹³Imbagħad il-ġewwieni u s-saqajn jaħsilhom bl-ilma, u l-qassis joffri u jaħraq kollox fuq l-artal. Dan hu sagrifiċċju tal-ħruq b’riħa tfuħ quddiem il-Mulej.

¹⁴“Jekk l-offerta għas-sagrifiċċju lill-Mulej tkun mit-tjur, joffri gamiem jew ħamiem.

¹⁵Il-qassis imbagħad iressaqha fuq l-artal, jilwilha rasha biex jaħraqha fuq l-artal, u jagħsrilha demmha mal-ġnub tal-artal;

¹⁶u mbagħad ineħħilha l-ħawsla b’ta’ ġo fiha, u jitfa’ kollox maġenb l-artal in-naħa tal-Lvant fejn ikun hemm l-irmied,

¹⁷jiksrilha ġwejnħajha mingħajr ma jaqlagħhomlha, u l-qassis jaħraqha fuq il-ħatab u n-nar ta’ fuq l-artal. Dan hu sagrifiċċju tal-ħruq b’riħa tfuħ quddiem il-Mulej.”