Read Maltese Bible with DC – IL-BIBBJA IL-KOTBA MQADDSA LEVITIKU 11 Bible Online

LEVITIKU 11 - Maltese Bible with DC – IL-BIBBJA IL-KOTBA MQADDSA bible

LEVITIKU 11

¹U l-Mulej kellem lil Mosè u lil Aron u qalilhom:

²“Kellmu lil ulied Iżrael u għidulhom: Dawn huma l-annimali li tistgħu tieklu mill-bhejjem kollha ta’ fuq l-art[15];

³kull bhima bid-dwiefer, bid-difer maqsum u tixtarr, tistgħu tieklu minnha.

⁴Imma minn dawk li jixtarru, jew difrejhom maqsumin, ma tistgħux tieklu: il-ġemel, għax dan jixtarr, imma ma għandux difrejh maqsumin, għalikom hu mniġġes;

⁵il-fenek tax-xagħri, għax dan jixtarr, iżda m’għandux difrejh maqsumin, għalikom hu mniġġes;

⁶il-liebru, għax jixtarr imma ma għandux difrejh maqsumin, għalikom hu mniġġes;

⁷il-ħanżir, għax għandu difrejh maqsumin, imma ma jixtarrx, għalikom hu mniġġes.

⁸Tiklux minn laħamhom, anqas tmissu ġisimhom mejjet, għax għalikom huma mniġġsin.

⁹“Minn kulma jgħix fl-ilma, dan li tistgħu tieklu: tistgħu tieklu minn kulma għandu l-ġwienaħ u l-qxur, fl-ilma tal-baħar jew tax-xmajjar.

¹⁰Kulma hu bla ġwienaħ u bla qxur, fil-baħar jew fix-xmajjar, kulma jitħarrek fl-ilma u kull annimal li jgħix fl-ilma, hu qżież għalikom.

¹¹Moqżieża jkunu għalikom, tiklux minn laħamhom u għandkom tistkerrhu ġisimhom mejjet.

¹²Kulma hu bla ġwienaħ u bla qxur fl-ilma, hu qżież għalikom.

¹³“Mit-tjur dawn għandkom tistkerrhu, u ma għandkomx tieklu minnhom, għax moqżieża: l-ajkla, il-bugħadam, il-kuċċarda,

¹⁴l-astur, kull xorta ta’ bies,

¹⁵kull xorta ta’ ċawlun,

¹⁶in-nagħma, il-kokka, il-barbaġann, is-seqer skont ġenshom,

¹⁷il-barbaġann, il-margun, iż-żinna,

¹⁸il-kwakk, il-pellikan, it-tiġieġa tal-baħar,

¹⁹il-laqlâq, kull xorta ta’ russett, id-daqquqa tal-pinnaċċ u l-farfett il-lejl.

²⁰Kull insett li jtir u jimxi, id-dud kollu li jtir u jimxi fuq erba’ saqajn, ikun għalikom ħaġa moqżieża.

²¹“Minn dawn tistgħu tieklu, mid-dud kollu li jtir u jimxi fuq erba’ saqajn u għandhom ’il fuq minn riġlejhom żewġ saqajn biex jaqbżu bihom fuq l-art.

²²Minnhom tistgħu tieklu l-ġradijiet ta’ kull xorta: il-ġrad b’rasu kbira, il-ġrad aħdar, il-ġrad tad-deżert, u s-sarsur.

²³Kull dud ieħor li jtir u għandu erba’ saqajn ikun moqżież għalikom.

²⁴Minn dawn titniġġsu; min imiss ġisimhom mejjet ikun imniġġes sa filgħaxija;

²⁵kull min jerfa’ xi wieħed minnhom mejjet għandu jaħsel ħwejġu u jibqa’ mniġġes sa filgħaxija.

²⁶“Kull bhima li għandha d-dwiefer mhux maqsuma u ma tixtarrx, tkun għalikom imniġġsa; kull min imissha jitniġġes.

²⁷Kulma jimxi fuq qiegħ saqajh minn fost il-bhejjem li jimxu fuq erba’ saqajn, ikun għalikom imniġġes u kull min imiss ġismu mejjet ikun imniġġes sa filgħaxija.

²⁸Min jerfa’ ġisimhom mejjet għandu jaħsel ħwejġu u jkun imniġġes sa filgħaxija;

²⁹għax dawn il-bhejjem kollha mniġġsin. “U minn fost l-annimali li jitkaxkru fl-art dawn huma kollha mniġġsin: il-ballottra, il-far u kull ġens ta’ gremxul;

³⁰il-wiżgħa, il-kamaleonti, il-gremxul, ix-xaħmet l-art u t-talpa.

³¹Minn fost l-annimali kollha li jitkaxkru fl-art, dawn huma kollha mniġġsa għalikom; min jersaq lejhom meta jmutu jkun imniġġes sa filgħaxija.

³²U jekk xi wieħed minnhom jaqa’ mejjet fuq xi ħaġa tal-injam, jew drapp, jew ġild, jew saqqu, jew xi għodda li biha wieħed jaħdem, jitfgħuha fl-ilma u tkun imniġġsa sa filgħaxija; imbagħad tindaf.

³³Jekk imbagħad jaqa’ f’xi ġarra tal-fuħħar, jitniġġes kulma jkun hemm fiha, u l-ġarra tkissruha.

³⁴Jekk ikun fiha l-ilma u jaqa’ fuq xi ikel, dan ukoll jitniġġes; kulma jista’ jinxtorob li jkun fih, jitniġġes.

³⁵Kull ħaġa li jaqa’ fuqha xi mejjet minnhom titniġġes; il-forn u l-kenur tfarrkuhom, għax huma jkunu mniġġsin; u mniġġsin ikunu għalikom.

³⁶L-għejun u l-bjar bl-ilma jibqgħu safja, iżda min imiss il-mejjet jitniġġes.

³⁷Jekk jaqa’ xi wieħed minnhom fuq iż-żerriegħa taż-żrigħ, din tibqa’ safja.

³⁸Imma jekk iż-żerriegħa tixxarrab bl-ilma, u jaqa’ fuqha xi mejjet minnhom, din tkun imniġġsa għalikom.

³⁹Jekk tmut xi bhima li tistgħu tieklu minnha, min imiss ġisimha mejjet jitniġġes sa filgħaxija.

⁴⁰Min jiekol minn ġisimha mejjet, għandu jaħsel ħwejġu u jibqa’ mniġġes sa filgħaxija.

⁴¹‘Kull annimal li jitkaxkar fl-art ikun qżież għalikom; la tiklux minnu.

⁴²Kulma jimxi fuq żaqqu, u kulma jimxi fuq erba’ saqajn u aktar, imma jitkaxkar fl-art, la tiklux minnu, għax qżież għalikom.

⁴³La tiċċappsu b’ebda ħanex u titniġġsux bihom, għax titniġġsu intom ukoll.

⁴⁴“Jiena l-Mulej Alla tagħkom, għalhekk għandkom titqaddsu, u tkunu qaddisin, għax jien qaddis, u ma għandkom titniġġsu b’ebda ħanex li jitkaxkar fl-art.

⁴⁵Għax jien il-Mulej, li tellajtkom mill-art tal-Eġittu biex inkun Alla tagħkom u intom tkunu qaddisin, għax jien qaddis.”

⁴⁶Din hi l-liġi fuq il-bhejjem u t-tjur, u kull ħaġa ħajja li żżiġġ fl-ilma, u kulma jitkaxkar fl-art,

⁴⁷biex tagħżlu bejn l-imniġġes u s-safi, u bejn il-bhejjem tajba għall-ikel u dawk li ma għandhomx jittieklu.