Read Maltese Bible with DC – IL-BIBBJA IL-KOTBA MQADDSA LEVITIKU 21 Bible Online

LEVITIKU 21 - Maltese Bible with DC – IL-BIBBJA IL-KOTBA MQADDSA bible

LEVITIKU 21

¹Il-Mulej kellem lil Mosè u qallu: “Kellem lill-qassisin, ulied Aron, u għidilhom: Ħadd minn niesu ma għandu jitniġġes għall-mejjet,

²ħlief għal min jiġi minnu mill-qrib, jiġifieri għal ommu, għal missieru, għal ibnu, għal bintu, għal ħuh.

³Jista’ jitniġġes ukoll għal oħtu, qariba tiegħu, li tkun għadha xebba, u mhux miżżewwġa.

⁴Ir-raġel miżżewweġ ma għandux jitniġġes u jipprofana ruħu, minħabba nies il-mara.

⁵Ma għandhomx iqaxxru rashom dawra tond, u ma jaqtgħux truf leħithom, u ma jqattgħux ġisimhom.

⁶Għandhom ikunu qaddisin lil Alla tagħhom[33], u ma jipprofanawx isem Alla tagħhom, għax huma joffru s-sagrifiċċji maħruqa, ikel lil Alla tagħhom, u għalhekk għandhom ikunu qaddisin.

⁷Ma jeħdux b’marthom mara żienja, jew mara li tilfet xbubitha, jew inkella waħda mkeċċija minn żewġha, għaliex hu qaddis lil Alla tiegħu;

⁸u ta’ qaddis għandek iżżommu, għax hu joffri l-ikel ta’ Alla tiegħek. Qaddis ikun għalik, għax qaddis jien il-Mulej, li nqaddiskom.

⁹U bint qassis li titkasbar biż-żina u bil-prostituzzjoni, tkun qiegħda tipprofana lil missierha, u għandhom jaħarquha bin-nar.

¹⁰“Il-qassis il-kbir fost ħutu, dak li kien imsawwab iż-żejt tal-konsagrazzjoni fuq rasu, u mogħtija lilu s-setgħa li jilbes l-ilbies sagru, ma għandux iħabbel xagħar rasu[34], u anqas iċarrat ilbiesu.

¹¹“Ma għandu jersaq lejn ebda mejjet, u ma għandux jitniġġes, lanqas għal missieru jew ommu.

¹²Ma għandux joħroġ mis-santwarju u lanqas jipprofana s-santwarju ta’ Alla tiegħu, għaliex għandu fuqu ż-żejt tal-konsagrazzjoni ta’ Alla tiegħu: Jiena l-Mulej.

¹³“Għandu jiżżewweġ xebba.

¹⁴Ma għandux jieħu armla, jew mara mkeċċija minn żewġha, jew waħda mkasbra biż-żina; imma għandu jieħu xebba minn niesu.

¹⁵U ma jipprofanax lil nislu fost niesu: Jiena l-Mulej li nqaddsu.”

¹⁶U l-Mulej kellem lil Mosè u qallu:

¹⁷“Kellem lil Aron u għidlu: Ħadd minn nislek fil-ġenerazzjonijiet kollha tagħhom, li jkollu xi difett, ma għandu jersaq biex joffri l-ikel lil Alla.

¹⁸Ħadd li jkollu xi difett: agħma, zopp, wiċċu sfigurat, għaġeb,

¹⁹riġlu jew idu miksura,

²⁰ħotbi, qerqni, bil-bjada f’għajnejh, b’mard tal-ġilda, bil-ħakk, b’testikoli mgħaffġa.

²¹Ħadd minn nisel Aron il-qassis, li jkollu xi difett bħal dan, ma għandu jersaq joffri s-sagrifiċċji maħruqa lill-Mulej. Min għandu xi difett ma għandux joffri l-ikel ta’ Alla tiegħu.

²²Iżda jista’ jiekol l-ikel ta’ Alla tiegħu, ħwejjeġ qaddisa u mill-aktar imqaddsa.

²³Imma ma jidħolx ’il ġewwa mill-velu, u lanqas ma għandu jersaq lejn l-artal, għax għandu difett u ma għandux jipprofana s-santwarju tiegħi. Jiena l-Mulej li nqaddishom.”

²⁴Dan qal Mosè lil Aron u lil uliedu, u lil ulied Iżrael kollha.