Read Maltese Bible with DC – IL-BIBBJA IL-KOTBA MQADDSA LEVITIKU 27 Bible Online

LEVITIKU 27 - Maltese Bible with DC – IL-BIBBJA IL-KOTBA MQADDSA bible

LEVITIKU 27

¹U kellem il-Mulej lil Mosè u qallu:

²“Kellem lil ulied Iżrael u għidilhom: Meta xi ħadd jagħmel wegħda lill-Mulej b’kemm tiswa ħajja ta’ bniedem,

³iqis ħamsin xekel tal-fidda skont ix-xekel tas-santwarju għal raġel bejn l-għoxrin u s-sittin sena;

⁴u għal mara, tletin xekel;

⁵u għal raġel bejn il-ħames snin u l-għoxrin, għoxrin xekel; u għal mara, għaxar xwiekel;

⁶għal raġel minn xahar sa ħames snin, ħames xwiekel, u mara, tliet xwiekel tal-fidda;

⁷u għal raġel ta’ sittin sena u fuqhom, ħmistax-il xekel, u għal mara, għaxar xwiekel.

⁸Jekk ikun fqir, u ma jiflaħx iħallas, jippreżenta ruħu quddiem il-qassis, u jara l-qassis kemm ikun jiswa; u l-qassis jistmah skont ma jkun jiflaħ min jagħmel il-wegħda.

⁹“Jekk tkun bhima li tista’ tingħata lill-Mulej b’sagrifiċċju, kulma jingħata minnha lill-Mulej ikun ikkonsagrat.

¹⁰Ma tistax tingħata ħaġa b’oħra, lanqas tinbidel ħaġa tajba f’waħda ħażina, u lanqas ħażina f’waħda tajba; jekk wieħed jibdilha, bhima b’bhima, il-waħda u l-oħra jkunu kkonsagrati.

¹¹Jekk tkun bhima mniġġsa li ma tistax tingħata b’offerta lill-Mulej, jippreżentaw il-bhima quddiem il-qassis.

¹²U hu, tajba jew ħażina, jistmaha; u kemm jistmaha l-qassis, daqshekk tkun tiswa.

¹³U jekk wieħed ikun irid jifdiha, iżid mill-ħamsa waħda ma’ kemm tkun tiswa.

¹⁴“Meta wieħed jikkonsagra daru u jqaddisha lill-Mulej, jistmaha l-qassis, tajba jew ħażina; u kemm jistmaha l-qassis, daqshekk tkun tiswa.

¹⁵U jekk min jikkonsagraha jkun irid jifdiha, iżid mill-ħamsa waħda mal-flus li tkun tiswa, u tkun tiegħu.

¹⁶“Jekk wieħed jikkonsagra xi ħaġa mill-wirt tar-raba’ tiegħu lill-Mulej, inti tistmaha skont kemm tieħu żerriegħa, ħamsin xekel tal-fidda għal kull ħomer żerriegħa tax-xgħir.

¹⁷Jekk jikkonsagra l-għalqa tiegħu mis-sena tal-ġublew, il-ħlas jibqa’ sħiħ kif ikun.

¹⁸Imma jekk jikkonsagraha wara s-sena tal-ġublew, il-qassis jgħoddlu l-flus skont is-snin li jkun baqa’ għas-sena tal-ġublew; u dan jitnaqqas mill-prezz li tkun tiswa.

¹⁹U jekk ikun irid jifdi l-għalqa li jkun ikkonsagra, iżid mill-ħamsa waħda ma’ kemm tkun stmajtha, u tkun tiegħu.

²⁰U jekk ma jifdix l-għalqa u jbigħha lil ħaddieħor, ma tkunx tista’ tinfeda aktar.

²¹U meta toħroġ l-għalqa ħielsa fis-sena tal-ġublew, din tkun ikkonsagrata lill-Mulej, bħall-art li tkun imwarrba u kkonsagrata lill-Mulej, u ssir propjetà tal-qassis.

²²“Jekk xi ħadd jikkonsagra lill-Mulej art li jkun xtara, u mhux mir-raba’ li jkun wiret,

²³il-qassis jistmaha kemm tiswa sas-sena tal-ġublew, u jagħti kemm tkun tiswa dakinhar, u tkun ikkonsagrata lill-Mulej.

²⁴Fis-sena tal-ġublew l-għalqa terġa’ lura għand min ikun xtraha mingħandu, jiġifieri għand sid l-art.

²⁵Kull stima ssir skont ix-xekel tas-santwarju, għoxrin gera[44] x-xekel.

²⁶“Ħadd ma jista’ jikkonsagra lill-Mulej l-ewwel ferħ tal-bhejjem, għax dan hu l-bikri tal-Mulej, sew jekk ikun tal-baqar, sew tan-nagħaġ, għax dan hu diġà tal-Mulej.

²⁷Jekk tkun bhima mniġġsa jifdiha b’kemm tkun tiswa u jżid mill-ħamsa waħda ma’ prezzha; u jekk ma jifdihiex tinbiegħ b’kemm tistmaha.

²⁸Ebda ħaġa li wieħed ikun warrab[45] minn kulma jkollu - bniedem, bhima, raba’ li jkun wiret - ma tista’ tinbiegħ jew tinfeda; kull ħaġa mwarrba tkun mill-aktar sagra lill-Mulej.

²⁹L-ebda bniedem imwarrab ma jista’ jinfeda, iżda għandhom jagħtuh il-mewt.

³⁰“L-għexur kollha tal-uċuħ tal-art, mill-qmuħ tar-raba’ u mill-frott tas-siġar, huma tal-Mulej u kkonsagrati lill-Mulej.

³¹U jekk wieħed ikun irid jifdi xi ħaġa minnhom, iżid mill-ħamsa waħda magħhom.

³²L-għexur tal-baqar u tal-imrieħel huma dawn: l-għaxar ferħ minn kull għaxra, li jgħaddu minn taħt il-ħatar, ikun ikkonsagrat lill-Mulej.

³³Ma joqgħodx jara jekk ikunx tajjeb jew ħażin; u ma jibdlux; u jekk jibdlu, it-tnejn, sew il-wieħed u sew l-ieħor, ikunu kkonsagrati lill-Mulej, u ma jistgħux jinfdew.”

³⁴Dawn huma l-ordnijiet li ordna l-Mulej lil Mosè għal ulied Iżrael fuq il-muntanja tas-Sinaj.