Read Maltese Bible with DC – IL-BIBBJA IL-KOTBA MQADDSA ĠEREMIJA 1 Bible Online

ĠEREMIJA 1 - Maltese Bible with DC – IL-BIBBJA IL-KOTBA MQADDSA bible

ĠEREMIJA 1

¹Il-kliem ta’ Ġeremija bin Ħilkija, mill-qassisin li kienu f’Għanatot[1], fl-art ta’ Benjamin.

²Il-kelma tal-Mulej ġietu fi żmien Ġosija bin Amon, sultan ta’ Ġuda, fis-sena tlittax tas-saltna tiegħu;

³ġietu wkoll fi żmien Ġeħojakim bin Ġosija, sultan ta’ Ġuda, sa tmiem is-sena ħdax tas-saltna ta’ Sedekija bin Ġosija, sultan ta’ Ġuda, sa meta n-nies ta’ Ġerusalemm ġew eżiljati[2], fil-ħames xahar.

⁴U ġietni l-kelma tal-Mulej u qalli:

⁵“Qabel ma sawwartek fil-ġuf, għaraftek; qabel ma ħriġt minn ħdan ommok, ikkonsagrajtek. Jien qegħedtek profeta fuq il-ġnus[3].”

⁶Jien weġibt: “Ah, Sidi Mulej, ma nafx nitkellem, għadni żgħir[4].”

⁷U l-Mulej weġibni: “Tgħidx, ‘Għadni żgħir’. Inti tmur kull fejn nibagħtek, u tgħid kulma nordnalek.

⁸La tibżax minnhom, għax jien miegħek biex neħilsek,” oraklu tal-Mulej.

⁹U l-Mulej ħareġ idu u messli fommi, u qalli l-Mulej: “Ara, qegħedtlek kliemi fuq fommok.

¹⁰Ara, jiena llum qegħedtek fuq il-ġnus u s-saltniet, biex taqla’ u ġġarraf, biex teqred u tħott, biex tibni u tħawwel.”

¹¹U ġietni l-kelma tal-Mulej u qalli: “X’inti tara, Ġeremija!” Jien weġibt: “Qiegħed nara fergħa ta’ lewża[5].”

¹²U l-Mulej weġibni: “Sewwa rajt, għax jien inħabrek biex kelmti sseħħ.”

¹³U reġgħet ġietni l-kelma tal-Mulej u qalli: “X’inti tara?” U jien weġibt: “Qiegħed nara borma tagħli, u d-dehra tagħha min-naħa tat-Tramuntana[6].”

¹⁴U l-Mulej weġibni: “Mit-Tramuntana tfur il-ħsara fuq dawk kollha li jgħammru f’din l-art,

¹⁵għax, ara, jien se nsejjaħ is-saltniet kollha tat-Tramuntana, oraklu tal-Mulej. U jiġu u kull wieħed minnhom iwaqqaf it-tron tiegħu quddiem il-bibien ta’ Ġerusalemm, u quddiem is-swar tagħha dawramejt, u quddiem il-bliet kollha ta’ Ġuda.

¹⁶Jien se nagħmel ħaqq kontrihom għall-ħażen kollu tagħhom, għaliex huma telquni u ħarqu l-inċens lil allat oħra, u taw qima lil għemil idejhom.

¹⁷U int ħażżem ġenbejk, qum u għidilhom kulma nordnalek. La tibżax minnhom, għax inkella nbeżżgħek jien quddiemhom.

¹⁸Arani llum se nagħmel minnek belt fortizza, kolonna tal-ħadid, ħajt tal-bronż, kontra l-pajjiż kollu, kontra s-slaten ta’ Ġuda, u l-prinċpijiet tiegħu, kontra l-qassisin tiegħu u l-poplu tal-pajjiż.

¹⁹Huma jeħduha kontrik, imma ma jagħmlulek xejn, għax jien inkun miegħek, oraklu tal-Mulej, biex neħilsek minnhom.”