Read Maltese Bible with DC – IL-BIBBJA IL-KOTBA MQADDSA ĠEREMIJA 10 Bible Online

ĠEREMIJA 10 - Maltese Bible with DC – IL-BIBBJA IL-KOTBA MQADDSA bible

ĠEREMIJA 10

¹Isimgħu, dar Iżrael, il-kelma li jgħidilkom il-Mulej.

²Dan jgħid il-Mulej: “Drawwiet il-ġnus la titgħallmux, u la tibżgħux mis-sinjali tas-smewwiet[36], il-ġnus jitbeżżgħu minnhom.

³Għax ir-reliġjon tal-popli hija frugħa, għuda maqtugħa minn ġol-bosk, xogħol idejn l-imgħallem bl-iskalpell.

⁴Iżejjinha bid-deheb u l-fidda, iwaħħluha bl-imsiemer u l-martell, biex ma titħarrikx.

⁵Bħan-nuffara f’għalqa ħjar, l-idoli ma jitkellmux. Trid terfagħhom, għax ma jimxux. La tibżgħux minnhom, għax deni ma jagħmlux, u riżq ma fihom xejn.”

⁶Ħadd mhu bħalek, Mulej, int kbir, u kbir ismek f’qawwitu!

⁷Min ma jibżax minnek, Sultan tal-ġnus? Hekk jistħoqqlok; għax fost l-għorrief kollha tal-ġnus, u f’saltniethom kollha, m’hemm ħadd bħalek.

⁸Nies boloh u bla moħħ; tagħlim fieragħ, biċċa għuda.

⁹Fidda maħduma miġjuba minn Tarsis, u deheb minn Ofir. Xogħol l-imgħallem u idejn l-arġentier, imlibbsa l-vjola u l-iskarlatt; kollox xogħol in-nies tas-sengħa.

¹⁰Imma l-Mulej tassew hu Alla: Alla ħaj u sultan ta’ dejjem. Għall-għadab tiegħu titriegħed l-art, u għall-qilla tiegħu l-ġnus ma jifilħux.

¹¹Hekk għandkom tgħidulhom: “L-allat li ma għamlux is-smewwiet u l-art għad jgħibu minn fuq l-art u minn taħt is-smewwiet.”

¹²Bil-ħila tiegħu għamel l-art, u d-dinja sejjes b’għerfu, u bid-dehen tiegħu firex is-smewwiet.

¹³Iriegħed leħnu, jitqanqlu l-ilmijiet tas-smewwiet; itella’ s-sħab minn truf l-art, iberraq biex tagħmel ix-xita; u minn ħażnietu jitlaq l-irjieħ.

¹⁴Jiblieh kull bniedem u jitlef dehnu; l-arġentier jistħi mill-idolu tiegħu, għax gidba hi x-xbieha mdewba, u fihom nifs ma hemmx.

¹⁵Frugħa huma, xogħol ta’ xejn, fi żmien ħlashom għad jintemmu.

¹⁶Mhux hekk sehem Ġakobb, Hu li għamel kulma hu, u t-tribù ta’ Iżrael il-wirt tiegħu, “Jaħweh tal-eżerċti” jismu.

¹⁷Iġbor mill-art is-sorra tiegħek, int, belt assedjata.

¹⁸Għax dan jgħid il-Mulej: “Arani, din id-darba nkeċċi ’l barra bħal bi żbandola, in-nies li jgħammru fil-pajjiż; irross fuqhom biex isibuni.”

¹⁹Ħasra għalija! Jien imġarraf, il-ġerħa tiegħi bla fejqan. Imma jien għedt: ‘Din il-marda tiegħi, ikolli nitqanna biha.”

²⁰Għarixi tħarbat, tqattgħu l-ħbula tiegħi. Uliedi tbiegħdu minni, u m’għadhomx iżjed. Ma fadalx min itellagħli għarixi, u jifrixli t-tined.

²¹Iva! Ir-rgħajja tilfu rashom, u l-Mulej ma fittxewhx. Għalhekk ma kellhomx riżq, u xterdu l-imrieħel tagħhom.

²²Instama’ ħoss riesaq, u għagħa kbira minn art it-Tramuntana, biex jagħmlu mill-ibliet ta’ Ġuda ħerba, bejta tax-xakalli.

²³Jien naf, Mulej, triq il-bniedem mhijiex f’idejh, anqas min jimxi ma jista’ jiddirieġi l-passi tiegħu.

²⁴Għakkisni Mulej, imma bil-qjies, mhux f’għadbek, inkella ġġibni fix-xejn.

²⁵Ferragħ għadbek fuq il-ġnus li ma jagħrfukx, fuq ir-razez li ismek ma jsejħux. Għax huma belgħu lil Ġakobb, u kkunsmawh u għamartu ħarbtuhielu.