Read Maltese Bible with DC – IL-BIBBJA IL-KOTBA MQADDSA ĠEREMIJA 11 Bible Online

ĠEREMIJA 11 - Maltese Bible with DC – IL-BIBBJA IL-KOTBA MQADDSA bible

ĠEREMIJA 11

¹Il-kelma li ġiet lil Ġeremija mingħand il-Mulej u qallu:

²“Isimgħu l-kelma ta’ dan il-patt u ħabbruha lin-nies ta’ Ġuda u lil dawk li jgħammru f’Ġerusalemm.

³Għidilhom: Dan jgħid il-Mulej, Alla ta’ Iżrael: Misħut il-bniedem li ma jismax minn kliem dan il-patt,

⁴li jien ordnajt lil missirijietkom dakinhar li ħriġthom mill-art tal-Eġittu, mill-forġa tal-ħadid, u għedtilhom: Isimgħu minn kliemi u għamlu skont ma kkmandajtkom, u tkunu l-poplu tiegħi u jien inkun Alla tagħkom,

⁵biex jien inżomm il-ħalfa li ħlift lil missirijietkom li nagħtihom art tnixxi ħalib u għasel, bħalma taraw illum.” U jien weġibt u għedt: “Iva, Mulej.”

⁶U l-Mulej qalli: “Xandar dan il-kliem kollu fl-ibliet ta’ Ġuda u fit-toroq ta’ Ġerusalemm u għidilhom: ‘Isimgħu l-kliem ta’ dan il-patt u agħmluh.

⁷Għax jien widdibt fuq li widdibt lil missirijietkom dakinhar li tellajthom mill-art tal-Eġittu sal-lum stess u għedtilhom: ‘Isimgħu minn kliemi!’

⁸Imma huma ma semgħux, u lanqas taw widen; u kull wieħed minnhom ġieb ruħu skont l-ebusija ta’ qalbu l-ħażina u ġibt fuqhom it-tehdid kollu ta’ dan il-patt, widdibthom li jħarsuh, u huma ma ħarsuhx.”

⁹U l-Mulej qalli: “Saret konfoffa qalb in-nies ta’ Ġuda u dawk li jgħammru f’Ġerusalemm.

¹⁰Reġgħu lura għall-ħażen ta’ missirijiethom tal-imgħoddi, li ma ridux jisimgħu kliemi, u marru wara allat oħra biex iservuhom. Id-dar ta’ Iżrael u d-dar ta’ Ġuda kisru l-patt li jien għamilt ma’ missirijiethom.

¹¹Għalhekk dan jgħid il-Mulej: ‘Arawni se nġib fuqhom ħsara, li ma jkunux jistgħu jaħarbuha; għad jgħajtuli, imma jien ma nismagħhomx.

¹²U jmorru l-ibliet ta’ Ġuda u dawk li jgħammru f’Ġerusalemm u jgħajtu ’l-allat li soltu jmorru jaħarqulhom l-inċens; imma f’jum hemmhom ma jsalvawhomx.

¹³Għaliex daqs kemm huma blietek, daqshekk ieħor huma allatek, Ġuda; u daqs kemm huma triqat Ġerusalemm, daqshekk ieħor huma l-artali li tellajtu lil dak l-għajb, biex taħirqu l-inċens lil Bagħal.

¹⁴U int la titlobx għal dan il-poplu u tgħollix leħnek u titlobx għalihom, għax jien ma nismax meta jsejħuli fi żmien hemmhom.

¹⁵X’tistenna l-maħbuba tiegħi f’dari, meta għamlet daqshekk ħażen? Jaqaw il-wegħdi u l-laħam ikkonsagrat se jbiegħdu minnek il-ħsara, biex int tkun tista’ titferraħ, malli tisma’ bl-invażjoni l-kbira?

¹⁶“Żebbuġa tħaddar imżejna bi frott sabiħ,” semmiek il-Mulej. Imma issa se jagħtiha n-nar, u jinxfu l-friegħi tagħha.

¹⁷U l-Mulej tal-eżerċti li ħawlek ħabbar il-ħsara għalik minħabba l-ħażen ta’ dar Iżrael u dar Ġuda, il-ħażen li għamlu biex jinkuni bl-inċens li ħarqu lil Bagħal.

¹⁸Il-Mulej għarrafni, u jien sirt naf; inti wrejtni l-għemejjel tagħhom.

¹⁹U jien bħal ħaruf ġwejjed meħud għall-qatla, ma kontx naf li kienu jgħaddu kontrija u jgħidu: “Ħa noqtlu s-siġra bil-frott tagħha; inqaċċtuh mill-art tal-ħajjin, u ismu ma jiftakruhx aktar.”

²⁰Int, Mulej tal-eżerċti, imħallef ġust li tifli l-qalb u l-moħħ, ħallini nara l-vendetta tiegħek minnhom, għaliex f’idejk irħejt il-kawża tiegħi!

²¹Għalhekk dan jgħid il-Mulej lin-nies ta’ Għanatot li jfittxulek ħajtek u jgħidu: “La tħabbarx aktar f’isem il-Mulej, li ma tmutx b’idejna.”

²²Għalhekk dan jgħid il-Mulej tal-eżerċti: “Arani, se nħallashom! Il-fjur tagħhom imutu bix-xabla, uliedhom, subien u bniet, imutu bil-ġuħ.

²³Ħadd ma jifdal minnhom, għax inġib l-hemm fuq in-nies ta’ Għanatot fis-sena tal-kastig tagħhom.”