Read Maltese Bible with DC – IL-BIBBJA IL-KOTBA MQADDSA ĠEREMIJA 13 Bible Online

ĠEREMIJA 13 - Maltese Bible with DC – IL-BIBBJA IL-KOTBA MQADDSA bible

ĠEREMIJA 13

¹Dan qalli l-Mulej: “Mur u ixtri ħżiem tal-għażel għal qaddek, u dawru ma’ ġenbejk bla ma xxarrbu bl-ilma.”

²U jien mort nixtri l-ħżiem bħalma qalli l-Mulej, u dawwartu ma’ ġenbejja.

³Għat-tieni darba kellimni l-Mulej u qalli:

⁴“Aqbad il-ħżiem li xtrajt, li hemm ma’ ġenbejk; qum, mur ħdejn ix-xmara Ewfrat, u aħbih hemm f’xaqq ta’ blata.”

⁵U jien mort ħbejtu ħdejn l-Ewfrat, kif qalli l-Mulej.

⁶Wara ħafna żmien il-Mulej raġa’ kellimni u qalli: “Qum, mur ħdejn l-Ewfrat, u ħu minn hemm il-ħżiem li jien ikkmandajtek taħbi hemm.”

⁷U mort ħdejn l-Ewfrat, ħaffirt, u ġbart il-ħżiem minn fejn kont ħbejtu. U l-ħżiem sibtu mherri u ma jiswa għal xejn.

⁸U l-Mulej raġa’ kellimni u qalli.

⁹“Dan jgħid il-Mulej: Hekk inxejjen il-kburija ta’ Ġuda u l-kburija bla qjies ta’ Ġerusalemm.

¹⁰Dan il-poplu ħażin, li ma jridx jisma’ kliemi, li jrid bilfors jimxi mal-ebusija ta’ qalbu, u mar jaqdi allat oħra u nxteħet wiċċu fl-art quddiemhom, dan il-poplu jiġrilu bħal dan il-ħżiem li ma jiswa għal xejn.

¹¹Għax bħalma bniedem jorbot il-ħżiem ma’ ġenbejh, hekk jien irbatt miegħi d-dar kollha ta’ Iżrael, u d-dar kollha ta’ Ġuda, jgħid il-Mulej, biex tkun għalija poplu, isem, foħrija, sebħ; imma ma semgħux.”

¹²“U int għidilhom ukoll dan il-kliem: ‘Dan jgħid il-Mulej Alla ta’ Iżrael: Kull ġarra timtela bl-inbid.’ U huma jweġbuk: ‘Ma nafux li kull ġarra timtela bl-inbid?’

¹³U int tweġibhom: ‘Dan jgħid il-Mulej: Arawni, se nimla bis-sokor in-nies kollha li jgħammru f’din l-art, u s-slaten li qegħdin fuq it-tron ta’ David u l-qassisin u l-profeti, u n-nies kollha ta’ Ġerusalemm.

¹⁴Inħabbathom il-wieħed mal-ieħor, il-missirijiet mal-ulied, u nkissirhom f’salt wieħed, oraklu tal-Mulej, ma nitħassarhomx, ma nħossx għalihom, ma nħennx għalihom hekk li ma neqridhomx.’ ”

¹⁵Isimgħu u agħtu widen, la titkabbrux, għax il-Mulej tkellem.

¹⁶Agħtu glorja lill-Mulej, qabel ma jidlam u qabel ma jitfixklu riġlejkom fuq il-muntanji bejn dawl u dlam. Intom tistennew id-dawl, imma hu jibdlu fis-swied, sa ma jagħmlu dlam.

¹⁷Jekk intom ma tisimgħux, nibki mqar bil-moħbi minħabba kburitkom. Għajnejnna jiddemmgħu u jxerrdu d-dmugħ, għax eżiljaw il-merħla tal-Mulej.

¹⁸Għid lis-sultan u lir-reġina-omm: “Inżlu u oqogħdu ’l isfel, għax waqgħet minn fuq raskom, il-kuruna tal-glorja tagħkom.”

¹⁹L-ibliet ta’ Nofsinhar magħluqa, ma hemmx min jiftaħ. Ġuda kollu eżiljat, eżiljat għalkollox.

²⁰Għollu għajnejkom u araw min ġej mit-Tramuntana. Fejn hi l-merħla li ngħatat lilek, in-nagħaġ sbieħ tiegħek?

²¹Xi tgħid meta jqegħdulek fuqek b’ħakkiema, dawk li int stess darrejt għal miegħek? Ma jaqbdekx uġigħ ta’ mara fil-ħlas?

²²Int tgħid f’qalbek: ‘Għaliex ġrali dan?” Minħabba l-kobor tal-ħażen tiegħek, refgħulek djulek u għarqbejk kixfulek.

²³Jaqaw ibiddel ġildu l-Kusi; jew il-ljupard tbajjietu? Daqshekk ieħor tistgħu tagħmlu t-tajjeb, mdorrijin kif intom fil-ħażen.

²⁴Inxerridhom bħall-karfa imtajra mir-riħ tad-deżert.

²⁵Din hi xortik, is-sehem li jmissek minni, oraklu tal-Mulej. Għax inti nsejtni, u ttamajt fil-gideb.

²⁶U jien ukoll nerfagħlek djulek fuq wiċċek, biex b’hekk għawarek jidher.

²⁷Jien rajt qżiżijietek: l-adulterji u t-tnegħim tiegħek, l-għajb taż-żina tiegħek fuq l-għoljiet fil-beraħ. Gwaj għalik Ġerusalemm! Ma titnaddaf qatt! Kemm se ddum hekk?