Read Maltese Bible with DC – IL-BIBBJA IL-KOTBA MQADDSA ĠEREMIJA 14 Bible Online

ĠEREMIJA 14 - Maltese Bible with DC – IL-BIBBJA IL-KOTBA MQADDSA bible

ĠEREMIJA 14

¹Il-kelma tal-Mulej li ġiet lil Ġeremija minħabba n-nixfa:

²“Ġuda bil-vistu, u bwiebha bla ħajja. Niesha lkoll mixħuta fl-art, u għajta ta’ diqa tielgħa minn Ġerusalemm.

³Il-kbarat bagħtu l-qaddejja għall-ilma, marru sal-ġwiebi, imma ilma ma sabux. Jerġgħu lura bil-ġarar battala. Imtlew bil-mistħija; infixlu u għattew rashom.

⁴Ix-xogħol tar-raba’ waqaf, għax xita ma kienx hemm fil-pajjiż. Il-bdiewa mtlew bil-mistħija, regħxu u għattew rashom.

⁵Għax imqar l-għażżiela wildet fir-raba’, u telqet il-wild waħdu, għax ħdura ma kienx hemm.

⁶Il-ħmir selvaġġi waqfu fuq il-blat, jilhġu għan-nifs bħax-xakalli, b’għajnejhom mejta, għax ma kienx hemm ħaxix.

⁷Imqar jekk ħtijietna jixhdu kontrina, Mulej, minħabba ismek qum, għax ħafna huma ir-ribelljonijiet tagħna, kontrik aħna dnibna.

⁸Tama ta’ Iżrael, Salvatur tiegħu fi żmien il-bżonn! Għala qisek barrani fl-art, jew vjaġġatur wieqaf għal-lejl.

⁹Għala qisek bniedem mibluh, bħal wieħed qalbieni ma jistax jgħin? Imma inti f’nofsna Mulej, u fuqna jissejjaħ ismek. La titlaqniex!

¹⁰Dan jgħid il-Mulej dwar dan il-poplu: ‘Iħobbu jiġġerrew ’l hemm u ’l hawn, f’riġlejhom ma għandhomx kwiet. Għalhekk il-Mulej ma għoġbuhx. Issa jiftakar fi ħżunithom, u jħallashom ta’ dnubiethom.”

¹¹U l-Mulej qalli: “Titlobx għall-ġid ta’ dan il-poplu.

¹²Jekk isumu ma nismax it-talb tagħhom, u mqar jekk joffru s-sagrifiċċji tal-ħruq u jagħmlu l-offerti, ma nilqagħhomx, għax bi ħsiebni neqridhom bix-xabla, bil-ġuħ u bil-pesta.”

¹³U jien għedtlu: “Ah! Sidi l-Mulej, ara l-profeti qegħdin jgħidulhom: ‘Ma tarawx ix-xabla, u ma jkollkomx il-ġuħ, għax sliem sħiħ nagħtikom f’dan il-pajjiż.”

¹⁴U l-Mulej qalli: “Il-gideb ħabbru f’ismi l-profeti, ma bgħatthomx, ma kkmandajthomx, ma kellimthomx. Viżjonijiet foloz, sħarijiet u tbatbit, u l-ħolm, ta’ moħħhom, dan ħabbrulkom.”

¹⁵Għalhekk dan jgħid il-Mulej: “Il-Profeti li qegħdin iħabbru f’ismi bla ma jien bgħatthom, u qegħdin jgħidu: ‘Xabla u ġuħ ma jkunu qatt f’dan il-pajjiż,’ dawn il-profeti bix-xabla u bil-ġuħ għad jintemmu.

¹⁶U n-nies li huma qegħdin iħabbrulhom, ikunu minxura mal-art fit-toroq ta’ Ġerusalemm minħabba l-ġuħ u x-xabla; u ma jkun hemm ħadd min jidfen lilhom, lin-nisa tagħhom, lil uliedhom, subien u bniet. Ħżunithom, fuqhom inferragħha.

¹⁷“U int għidilhom dan il-kliem: ‘Għajnejja jxerrdu d-dmugħ, lejl u nhar bla heda, għax ix-xebba, bint il-poplu tiegħi, ħadet daqqa kbira u tfarrket, ġerħa bla fejqan ġarrbet.

¹⁸Jekk noħroġ fir-raba’, hemm insib il-mejtin bix-xabla. Jekk nidħol fil-belt, insib il-mifnija bil-ġuħ, għax imqar il-profeta u l-qassis jiġġerrew mitlufin fil-pajjiż.’ ”

¹⁹Tlaqt int ’il Ġuda għalkollox? Stmellejt int ’il Sijon? Għaliex sawwattna bla ma hemm fejqan għalina? Stennejna s-sliem u ma għandna ebda riżq; żmien il-fejqan, u arana mwerwra.

²⁰Aħna nafu, Mulej, bi dnubietna, bil-ħażen ta’ missirijietna, għax dnibna kontrik.

²¹Minħabba f’ismek tiċħadniex, tkasbarx it-tron tal-glorja tiegħek, ftakar! Tiksirx il-patt li għamilt magħna.

²²Hemm xi ħadd fost l-allat fiergħa tal-ġnus, li jista’ jibgħat ix-xita? Jew jistgħu jagħtu weħidhom is-smewwiet gliegel ta’ ilma? Mhux inti l-Mulej, Alla tagħna? Fik it-tama tagħna, għax int għamilt dan kollu.”