Read Maltese Bible with DC – IL-BIBBJA IL-KOTBA MQADDSA ĠEREMIJA 15 Bible Online

ĠEREMIJA 15 - Maltese Bible with DC – IL-BIBBJA IL-KOTBA MQADDSA bible

ĠEREMIJA 15

¹Il-Mulej qalli: “Imqar jekk jiġu quddiemi Mosè u Samwel, mhijiex se ddur qalbi lejn dan il-poplu. Keċċihom minn quddiemi, ħa jitilqu ’l barra!

²U jekk jistaqsuk: fejn se mmorru, għidilhom: Dan jgħid il-Mulej: ‘Min tmissu l-mewt, għall-mewt; Min tmissu x-xabla, għax-xabla; Min imissu l-ġuħ, għall-ġuħ; Min imissu l-jasar, għall-jasar.’

³“Jiena rfajtilhom erba’ kastigi, oraklu tal-Mulej, ix-xabla biex toqtolhom, il-klieb biex ikaxkruhom, it-tajr tal-ajru u l-bhejjem tal-art biex jikluhom u jeqirduhom.

⁴U nagħmel minnhom waħx għas-saltniet kollha tal-art, minħabba Manassi bin Ħeżekija, sultan ta’ Ġuda, għal kulma għamel f’Ġerusalemm.”

⁵“Min se jħenn għalik Ġerusalemm? Min se jsewwed qalbu għalik? Min se jdur u jistaqsik kif inti, x’minnek, intix fis-sliem?

⁶Int ċħadtni, oraklu tal-Mulej, int inġbidt lura u tlaqt. U jien erfajt idejja fuqek, u ġibtek fix-xejn, għax ma flaħtx iżjed inħenn għalik.

⁷Derrejthom bil-midra fi bwieb l-art, neżżajthom mit-tfal, u qridt il-poplu tiegħi, imma huma ma darux minn triqathom.

⁸Tkattru r-romol tagħhom aktar mir-ramel tal-baħar; jien ġibt fuq omm iż-żagħżugħ, il-qerried f’nofsinhar; u niżżilt fuqhom għal għarrieda diqa u tnehid.

⁹L-omm ta’ seba’ wlied infniet, nifisha nqata’. Ix-xemx tagħha niżlet, meta kien għadu l-jum, stħat u tħawdet. U ’l min fadal minnhom nerħih għax-xabla quddiem l-għedewwa tagħhom,” oraklu tal-Mulej.

¹⁰Imsejken jien, omm! Għaliex ulidtni[39] bniedem ġellied, li għandu xi jgħid mal-pajjiż kollu? Jien la slift u lanqas issellift, u madankollu kulħadd jisħetni’?

¹¹Jgħid il-Mulej, “Tassew, qdejtek tajjeb! Tassew, ħbatt l-għedewwa għalik, fi żmien il-hemm, fi żmien id-dwejjaq!

¹²Jista’ l-ħadid ifarrak il-ħadid u l-bronż tat-Tramuntana?

¹³Ġidek u t-teżori tiegħek nagħti bi priża, mhux bi ħlas, għal dnubietek kollha fit-territorju kollu tiegħek.

¹⁴U nibagħtek fost l-għedewwa tiegħek f’art li int ma tafx għaliex xegħel in-nar tal-korla tiegħi u fuqkom iħeġġeġ.

¹⁵Mulej, dan int tafu. Ftakar fija u ejja żurni; tħallas minn dawk li jiġru warajja. Tħallinix ninqered minħabba sabrek. Kun af li minħabba fik qgħadt għat-tagħjir.

¹⁶Jien sibt kliemek, u kiltu; u kelmtek saritli l-ferħ u l-hena ta’ qalbi; għax ismek issejjaħ fuqi, Mulej, Alla tal-eżerċti.

¹⁷Jien ma mortx fost iż-żufjettużi, ma fraħtx magħhom; jien qgħadt għalija waħdi quddiem qawwietek għax inti mlejtni bil-korla.

¹⁸Għaliex għandi nibqa’ mnikket għal dejjem, u l-marda kronika tiegħi ma tfiq qatt? Se ssir int għalija bħal nixxiegħa qarrieqa li tinxef?”

¹⁹Għalhekk dan jgħid il-Mulej: “Jekk iddur lejja, irreġġgħek lejja biex tieqaf quddiemi; jekk tagħżel dak li jiswa minn dak li ma jiswiex, int tkun bħal fommi. Jerġgħu lura huma lejk, u mhux int terġa’ lura lejhom.

²⁰Nagħmlek sur qawwi tal-bronż kontra dan il-poplu; huma jaħbtu għalik, iżda ma jkunux jifilħu għalik; għax jiena miegħek, biex neħilsek u nsalvak, oraklu tal-Mulej.

²¹Neħilsek mill-qawwa tal-ħżiena, u nifdik minn id it-tiranni.”