Read Maltese Bible with DC – IL-BIBBJA IL-KOTBA MQADDSA ĠEREMIJA 16 Bible Online

ĠEREMIJA 16 - Maltese Bible with DC – IL-BIBBJA IL-KOTBA MQADDSA bible

ĠEREMIJA 16

¹U ġietni l-kelma tal-Mulej u qalli:

²“La tiżżewwiġx, u ma jkollokx la subien u lanqas bniet f’dan il-pajjiż.

³Għax dan jgħid il-Mulej għas-subien u l-bniet li jitwieldu f’dan il-post, u dwar ommijiethom li jilduhom u għal missirijiethom li jnissluhom f’dan il-pajjiż:

⁴Għad imutu mifnija bil-mard, u ma jibkuhomx, ma jidfnuhomx, imma jħalluhom bħad-demel f’wiċċ ir-raba’. Jintemmu bix-xabla u bil-ġuħ, u l-iġsma tagħhom ikunu ikel għat-tajr tal-ajru u l-bhejjem tal-art.

⁵“Għax dan jgħid il-Mulej: ‘La tmurx f’dar il-vistu, la tmurx tibkihom, la tħennx għalihom, għax jien warrabt il-ħbiberija tiegħi, oraklu tal-Mulej, it-tjieba tiegħi u l-ħniena tiegħi minn dan il-poplu.

⁶“U jmutu l-kbar u ż-żgħar f’dan il-pajjiż; u ma jidfnuhomx, ma jibkuhomx, u ħadd ma jqatta’ ġismu[40] u lanqas iqarweż rasu għalihom.

⁷Lanqas ħadd ma jaqsam il-ħobż ma’ min hu mnikket biex ifarrġuh minħabba l-mejjet. Lanqas ma jisquh il-kus tal-faraġ għall-mewt ta’ missieru jew ommu.

⁸U la tmurx f’dar il-festa biex toqgħod magħhom tiekol u tixrob.

⁹“Għax dan jgħid il-Mulej tal-eżerċti, Alla ta’ Iżrael: ‘Arawni! Quddiem għajnejkom u fi żmienkom se nsikket f’dan il-post għajjat il-ferħ u għajjat il-hena, leħen l-għarus u leħen l-għarusa.

¹⁰“Jiġri li int tgħarraf ’il dan il-poplu b’dan il-kliem u huma jgħidulek: ‘Għaliex il-Mulej iħabbrilna din il-ħsara kbira kollha? X’inhija ħżunitna? X’inhuwa dnubna li għamilna kontra l-Mulej, Alla tagħna?

¹¹“U inti tweġibhom: ‘Għaliex missirijietkom ħallewni, oraklu tal-Mulej, u marru wara allat oħra, u qdewhom u nxteħtu wiċċhom fl-art quddiemhom, u lili abbandunawni, u l-liġi tiegħi ma ħarsuhiex.

¹²U intom imbagħad għamiltu agħar minn missirijietkom, u, arakom, kull wieħed minnkom mexa wara l-ebusija ta’ qalbu ħażina u ma semax minni.

¹³Għalhekk inkeċċikom ’il barra minn din l-art f’art oħra li la intom u la missirijietkom ma tafuha, u hemm taqdu allat oħra, lejl u nhar, għax jien ma nurix ħniena magħkom.

¹⁴“Għalhekk għad jiġu jiem, oraklu tal-Mulej, meta ma jgħidux aktar: ‘Daqs kemm hu ħaj il-Mulej li tella’ lil ulied Iżrael mill-art tal-Eġittu’,

¹⁵imma daqs kemm hu ħaj il-Mulej li tella’ lil ulied Iżrael mill-art tat-Tramuntana u mill-artijiet kollha li fihom xerridhom.’ Għax jiena rreġġagħhom lura fl-art li kont tajt lil missirijiethom.

¹⁶“Arawni! Jien nibgħat ħafna sajjieda, oraklu tal-Mulej, u jistaduhom. Imbagħad nibgħat ħafna kaċċaturi, u jmorru għalihom fuq kull muntanja u fuq kull għolja u f’kull xaqq blat.

¹⁷Għax għajnejja fuq triqathom kollha u huma ma jistgħux jinħbew minn quddiemi, u lanqas jinsatar dnubhom minn quddiem għajnejja.

¹⁸Qabelxejn inħallashom id-doppju għal ħżunithom u dnubhom, talli niġġsuli arti bil-bluhat moqżieża, u mlew ’il wirti bl-għemejjel mistkerrha tagħhom.”

¹⁹Mulej, qawwa tiegħi, fortizza tiegħi! kenn tiegħi f’jum l-hemm! Għandek għad jiġu l-ġnus, minn truf l-art u jgħidlu: “Gideb biss wirtu missirijietna, frugħa bla ebda fejda.

²⁰Jista’ l-bniedem jagħmel allat għalih dawk li mhumiex allat?”

²¹Għalhekk għad nurihom jien, nurihom din id-darba, idi u l-qawwa tiegħi, u jkunu jafu li ismi hu Jaħweh!”