Read Maltese Bible with DC – IL-BIBBJA IL-KOTBA MQADDSA ĠEREMIJA 17 Bible Online

ĠEREMIJA 17 - Maltese Bible with DC – IL-BIBBJA IL-KOTBA MQADDSA bible

ĠEREMIJA 17

¹“Id-dnub ta’ Ġuda miktub b’pinna tal-bronż, u b’ponta tad-djamant minqux fuq it-tavla ta’ qalbhom, u fuq il-qrun tal-artali tagħhom.

²Biex jiftakru wliedhom fl-artali tagħhom, u fl-artali tax-xbihat tal-Asera, u s-siġar iħaddru fuq l-għoljiet għolja

³u l-muntanji fil-wita. Ġidek u t-teżori tiegħek kollha nagħtihom bi priża, għad-dnub li għamilt fuq għoljietek mal-medda kollha ta’ artek!

⁴U inti minn jeddek terħi l-wirt li tajtek, u nġiegħlek taqdi lill-għedewwa tiegħek f’art li int ma tafx biha. Għax in-nar tal-korla tiegħi intom xgħeltu, u jibqa’ mqabbad għal dejjem.”

⁵Dan jgħid il-Mulej: “Misħut il-bniedem li jittama fil-bnedmin, li jfittex il-qawwa tiegħu fil-ġisem, u titbiegħed qalbu mill-Mulej.

⁶Ikun bħal siġra tal-għargħar fix-xagħri, li ma tara ebda ġid ġej, li tgħammar f’art tikwi fid-deżert, art mielħa fejn ħadd ma jgħammar.

⁷Imbierek il-bniedem li jittama fil-Mulej, u l-fiduċja tiegħu fil-Mulej.

⁸Ikun bħal siġra ħdejn l-ilma mħawla, b’għeruqha mxenxla lejn il-wied; ma tibżax meta tiġi s-sħana, il-weraq tagħha jibqa’ jħaddar; fis-sena tan-nixfa ma tinkeddx, u ma tehdiex milli tagħmel il-frott.

⁹Fuq kollox qalb il-bniedem kollha qerq u mħassra. Min jifhimha?

¹⁰Jien hu l-Mulej, li nifli l-qalb u ngħarbel il-ġewwieni, biex nagħti ’l kull wieħed skont imġibtu, skont ma jkun jistħoqq għemilu.”

¹¹Bħal-ħaġla li tfaqqas il-bajd li ma tbidx hi; hekk min jaħżen il-ġid, imma mhux bis-sewwa; f’għomru jkollu jħallih, u fl-aħħar ta’ ħajtu jitqies bħall-iblah.

¹²Tron ta’ glorja, fl-għoli sa mill-bidu, hu l-post tal-maqdes tagħna.

¹³It-tama ta’ Iżrael int, Mulej, kull min jabbandunak jitħawwad. Dawk li jitbiegħdu minnu fit-trab jinkitbu, għax telqu l-Mulej, l-għajn tal-ilma ġieri.

¹⁴Fejjaqni int, Mulej, u jien infiq, salvani, u jien inkun salv, għax int il-ftaħir tiegħi.

¹⁵Ara x’qegħdin jgħiduli huma: ‘Fejn hi l-kelma tal-Mulej? Ħa sseħħ!’

¹⁶Jien ma qgħadtx irross fuqek għad-deni, u jum l-hemm qatt ma xtaqtu. Int taf x’ħareġ minn fommi, kollox qiegħed quddiemek.

¹⁷Tkunx waħx għalija, int il-kenn tiegħi fi żmien l-hemm.

¹⁸Ħa jitħawdu dawk li jsusu warajja, u ma nitħawwadx jien! Ħa jitbeżżgħu huma, u ma nitbeżżax jien! Niżżel fuqhom Jum id-deni, u kissirhom għal darba tnejn.

¹⁹Dan qalli l-Mulej: “Mur u oqgħod quddiem il-Bieb ta’ Benjamin mnejn jidħlu u joħorġu s-slaten ta’ Ġuda u f’kull bieb ieħor ta’ Ġerusalemm.

²⁰U għidilhom: ‘Isimgħu l-kelma tal-Mulej, slaten ta’ Ġuda u Ġuda kollha u intom ilkoll li tgħammru f’Ġerusalemm u tgħaddu minn dawn il-bwieb.

²¹“Dan jgħid il-Mulej: “Qisu, b’risq ħajjitkom, qisu li ma ġġorru ebda tagħbija nhar ta’ Sibt u ddaħħluha minn bwieb Ġerusalemm.

²²La toħorġux tagħbijiet minn djarkom f’jum is-Sibt, u ma tagħmlu ebda xogħol, imma qaddsu jum is-Sibt, bħalma jien ordnajt lil missirijietkom.”

²³“Imma huma ma ridux jisimgħu u lanqas jagħtu widen, anzi webbsu rashom biex ma jisimgħux u ma jeħdux it-tagħlima.

²⁴“Jekk intom tassew tisimgħu minni, oraklu tal-Mulej, u ma ddaħħlu ebda tagħbija minn bwieb dil-belt f’jum is-Sibt, u tqaddsu jum is-Sibt, u ma tagħmlu ebda xogħol fih,

²⁵jibqgħu jidħlu minn bwieb din il-belt rekbin fuq il-karrijiet u ż-żwiemel is-slaten u l-prinċpijiet, li joqogħdu fuq it-tron ta’ David, huma u n-nies ta’ Ġuda u n-nies li jgħammru f’Ġerusalemm. Il-belt tkun mgħammra għal dejjem.

²⁶U jiġu mill-bliet ta’ Ġuda, u mill-inħawi ta’ madwar Ġerusalemm, u mill-art ta’ Benjamin, u mis-Sefela u mill-muntanji u min-Nofsinhar u jġibu magħhom sagrifiċċji tal-ħruq, sagrifiċċji oħra, offerti tal-qmuħ u inċens, u joffru sagrifiċċji ta’ radd il-ħajr f’dar il-Mulej.

²⁷“Imma jekk ma tisimgħux minni li tqaddsu jum is-Sibt u li ma ġġorrux tagħbijiet u ma tidħlux minn bwieb Ġerusalemm f’jum is-Sibt, jiena nqabbad nar f’dawn il-bwieb, li jibla’ l-palazzi ta’ Ġerusalemm, nar li ma jintefiex.”