Read Maltese Bible with DC – IL-BIBBJA IL-KOTBA MQADDSA ĠEREMIJA 18 Bible Online

ĠEREMIJA 18 - Maltese Bible with DC – IL-BIBBJA IL-KOTBA MQADDSA bible

ĠEREMIJA 18

¹Il-kelma li ġiet lil Ġeremija mingħand il-Mulej u qallu:

²“Qum u inżel għand il-fuħħari: u hemm jiena nsemmgħek kliemi.”

³Jiena nżilt għand il-fuħħari, u sibtu qiegħed jaħdem fuq ir-rota.

⁴U hekk kif il-ġarra li kien qed jaħdem ħarġitlu ħażin, kif jiġrilu t-tafal f’idejn il-fuħħari, dan raġa’ għamel oħra minnha kif għoġob lilu.

⁵Imbagħad il-Mulej kellimni u qalli:

⁶“Dar Iżrael, jaqaw ma nistax nimxi magħkom bħal dan il-fuħħari?” Oraklu tal-Mulej. “Bħalma hu t-tafal f’idejn il-fuħħari, hekk intom f’idejja, dar Iżrael.

⁷Hekk jien xi drabi naqtagħha li poplu jew saltna naqlagħha, inġarrafha u neqridha;

⁸jekk imbagħad dan il-ġens jindem mill-ħażen li kontrih inkun tkellimt, jiena nindem mill-ħsara li nkun qtajt li nagħmillu.

⁹“Drabi oħra naqtagħha li poplu jew saltna nibniha u nħawwilha;

¹⁰jekk imbagħad dan il-poplu jagħmel il-ħażen li ma jogħġobnix billi ma jismax kliemi, jiena nindem mill-ġid li nkun qtajt li nagħmillu.

¹¹“Issa mur kellem lin-nies ta’ Ġuda u n-nies li jgħammru f’Ġerusalemm u għidilhom: Dan jgħid il-Mulej, ‘Arawni, jien qiegħed inħejji ħsara għalikom u nfassal pjan kontrikom. Erġgħu lura, kull wieħed minn triqtu l-ħażina. Sewwu triqatkom u għemilkom!’

¹²“U huma jwieġbu: ‘Kollu ta’ xejn! Skont fehmietna rridu nimxu, u kull wieħed jimxi skont l-ebusija ta’ qalbu l-ħażina.’ ”

¹³“Għalhekk dan jgħid il-Mulej: Stħarrġu fost il-ġnus. Min qatt sama’ bi ħwejjeġ bħal dawn? Għemil li jkexkex għamlet ix-xbejba ta’ Iżrael!

¹⁴Jaqaw jgħib mill-għoli tal-blat, is-silġ tal-Libanu? Jinxfu forsi l-ilmijiet kiesħa li jgelglu ’l isfel mill-muntanji?

¹⁵Imma l-poplu tiegħi nsieni, u marru joffru l-inċens lix-xejn. Fixkluhom fi triqathom, il-mogħdijiet ta’ dari, biex qabdu s-sqaqien, u mhux it-triq imbattma.

¹⁶Biex għamlu ħerba minn arthom, ħaġa taż-żuffjett għal dejjem. Kull min jgħaddi jistagħġeb, u jħarrek rasu.

¹⁷Bħalma jagħmel ir-riħ mil-Lvant, jien inxerridhom quddiem l-għedewwa. Nagħtihom dahri minflok wiċċi, f’jum qerdithom!”

¹⁸L-għedewwa tiegħi qalu: “Ejjew nonsbu nasba lil Ġeremija, għax il-liġi ma tonqosx lill-qassis, lanqas l-għaqal lill-għaref, jew il-kelma lill-profeta. Ejjew noqtluh bi lsienna, u ma nagħtux aktar kas ta’ kliemu.”

¹⁹Agħtini widen, Mulej, isma’ kliem dawk li huma kontrija.

²⁰Jaqaw il-ġid jitħallas bid-deni? Għax huma ħaffru ħofra għal ħajti. Ftakar kif jien waqaft quddiemek, biex nitkellem għall-ġid tagħhom, biex twarrab il-korla tiegħek minn fuqhom.

²¹Għalhekk erħi ’l uliedhom għall-ġuħ[41], u itlaqhom f’idejn ix-xabla, u jkunu bla tfal u romol in-nisa tagħhom. Ħa jmutu l-irġiel tagħhom bil-pesta, u ż-żgħażagħ tagħhom midruba bix-xabla fit-taqbida.

²²Ħa jinstama’ t-twerżiq minn djarhom, meta għal għarrieda tibgħat fuqhom il-ħallelin. Għax ħaffru ħofra biex jaqbduni, u nasbu trabokk għal riġlejja.

²³U inti taf, Mulej, fehmiethom kollha biex joqtluni; la taħfrilhomx ħżunithom, u la tħassarx ’il dnubhom minn quddiemek. Ħa jsabbtuhom mal-art quddiemek; agħmel għalihom fi żmien il-korla tiegħek!