Read Maltese Bible with DC – IL-BIBBJA IL-KOTBA MQADDSA ĠEREMIJA 19 Bible Online

ĠEREMIJA 19 - Maltese Bible with DC – IL-BIBBJA IL-KOTBA MQADDSA bible

ĠEREMIJA 19

¹Dan qal il-Mulej lil Ġeremija “Mur ixtri ġarra tal-fuħħar u ħu lil xi wħud mill-anzjani tal-poplu u mill-anzjani tal-qassisin,

²u mur oħroġ fil-wied ta’ Benħinnom li hemm biswit Bieb ix-Xaqquf, u hemm xandar il-kliem li se ngħidlek.

³Inti tgħid: ‘Isimgħu l-kelma tal-Mulej, intom slaten ta’ Ġuda u nies ta’ Ġerusalemm. Dan jgħid il-Mulej tal-eżerċti, Alla ta’ Iżrael: Arawni se nġib il-ħsara fuq dan il-post, li kull min jisma’ biha jżarżru widnejh.

⁴Għax huma telquni u pprofanaw dan il-post billi ħarqu l-inċens lill-allat barranin li, la huma, la missirijiethom, u lanqas is-slaten ta’ Ġuda ma kienu jafu bihom. Imlew dan il-post bid-demm tal-innoċenti.

⁵Bnew is-santwarji ta’ Bagħal, biex jaħarqu bin-nar lil uliedhom b’sagrifiċċji tal-ħruq lil Bagħal. Ħwejjeġ bħal dawn jien qatt ma kkmandajthom jagħmlu, lanqas biss semmejthom, u qatt ma għaddewli minn moħħi.

⁶‘Għalhekk għad jasal żmien, oraklu tal-Mulej, li dan il-post ma jissejjaħx aktar ‘Tofet’ jew ‘Wied Benħinnom’, imma ‘Wied il-Qatla’.

⁷U hawn f’dan il-post jien inġib fix-xejn fehmiet Ġuda u Ġerusalemm, u nwaqqagħhom bix-xabla quddiem l-għedewwa tagħhom, u b’id dawk li jkunu jfittxulhom ħajjithom, u nħalli l-iġsma tagħhom għall-ikel tat-tjur tal-ajru u l-bhejjem tal-art.

⁸U nagħmel ħerba minn din il-belt u post għaż-żufjett; u kull min jgħaddi minnha jibqa’ mistagħġeb biha u jsaffrilha minħabba l-ġrieħi tagħha.

⁹Inġagħalhom jieklu laħam subienhom u laħam bniethom, għax għad jieklu laħam xulxin fi żmien l-assedju u d-diqa li għad iġibu fuqhom l-għedewwa u dawk li għad ifittxulhom ħajjithom.’

¹⁰“Inti mbagħad tkisser il-ġarra quddiem in-nies li jiġu miegħek,

¹¹u tgħidilhom: ‘Dan jgħid il-Mulej tal-eżerċti: Hekk għad inkisser dan il-poplu u din il-belt, bħalma titkisser ġarra tal-fuħħar, bla ma tkun tista’ tissewwa. U f’Tofet għad jidfnu għax ma jkunx hemm post ieħor fejn.

¹²Dan nagħmel lil dan il-post, oraklu tal-Mulej, u lil min jgħammar fih, u lil din il-belt nagħmilha bħal Tofet.

¹³U djar Ġerusalemm u djar is-slaten ta’ Ġuda jitniġġsu bħal Tofet, id-djar kollha li fuq bjuthom kienu jaħarqu l-inċens lill-eżerċti kollha tas-smewwiet u jsawbu libazzjonijiet lill-allat barranin.’ ”

¹⁴U Ġeremija telaq minn Tofet, fejn il-Mulej kien bagħtu jħabbar, u mar fil-bitħa tat-tempju tal-Mulej u qal lill-poplu kollu:

¹⁵“Dan jgħid il-Mulej tal-eżerċti, Alla ta’ Iżrael: ‘Arawni, jien se nġib fuq din il-belt u fuq l-ibliet li jagħmlu minnha l-ħsara kollha li jien ħabbartilha, għax huma webbsu rashom, biex ma jisimgħux kliemi.”