Read Maltese Bible with DC – IL-BIBBJA IL-KOTBA MQADDSA ĠEREMIJA 2 Bible Online

ĠEREMIJA 2 - Maltese Bible with DC – IL-BIBBJA IL-KOTBA MQADDSA bible

ĠEREMIJA 2

¹U ġietni l-kelma tal-Mulej, u qalli:

²“Mur u għajjat f’widnejn Ġerusalemm, u għidilha: ‘Dan jgħid il-Mulej: ftakart fil-ħlewwa ta’ żgħożitek, fl-imħabba tal-għerusija tiegħek[7], meta kont tiġri warajja fid-deżert, f’art mhux miżrugħa.

³Iżrael kien ikkonsagrat lill-Mulej, l-ewwel frott tiegħu[8]; dawk kollha li kienu jieklu minnu, kienu jiġbdu fuqhom il-kastig: il-ħsara kienet taqa’ fuqhom,” oraklu tal-Mulej.

⁴Isimgħu l-kelma tal-Mulej, dar Ġakobb, u intom il-familji kollha tad-dar ta’ Iżrael.

⁵Dan jgħid il-Mulej: “X’nuqqas sabu fija missirijietkom biex tbiegħdu minni, u mxew wara l-frugħa, u saru huma stess frugħa?

⁶Ma qalux: ‘Fejn hu l-Mulej li tellagħna mill-art tal-Eġittu, li mexxiena fid-deżert, minn art niexfa u maħruqa, minn art għatxana u mudlama, minn art li minnha ħadd ma jgħaddi, u fiha ma jgħammar ħadd?

⁷Jien ġibtkom f’art qisha ġnien, biex tieklu l-frott tagħha u dduqu l-benna tagħha. Imma ġejtu u tebbajtuli arti, waqqajtuli l-wirt tiegħi f’għajb.

⁸Il-qassisin ma staqsewx: ‘Fejn hu l-Mulej?’ L-għorrief tal-liġi ma għarfunix; ir-rgħajja dinbu kontrija; il-profeti ħabbru f’isem Bagħal, u marru wara ħwejjeġ fiergħa.

⁹Għaliex inżid nitlewwem magħkom, oraklu tal-Mulej, u ma’ wlied uliedkom.

¹⁰Baħħru sal-gżejjer ta’ Kittim[9], ibagħtu staqsu f’Kedar[10], u araw jekk qatt saritx ħaġa bħal din.

¹¹Hemm xi ġens li qatt biddel l-allat tiegħu? - U dawn mhumiex allat! Iżda poplu tiegħi bidel il-glorja tiegħu max-xejn!

¹²Stagħġbu smewwiet b’dan, tkexkxu fuq li tkexkxu, oraklu tal-Mulej.

¹³Għax tnejn huma d-dnubiet tal-poplu tiegħi: telqu lili, l-għajn tal-ilma ġieri, biex ħaffru bjar għalihom, bjar miksura li ma jżommux ilma.

¹⁴Jaqaw Iżrael xi lsir jew qaddej imwieled fid-dar? Għaliex, mela, waqa’ priża,

¹⁵li għaliha jgargru frieħ l-iljuni, u jsemmgħu leħenhom? Artu għamluhielu ħerba, blietu ħarquhomlu, u sfaw bla nies.

¹⁶Saħansitra ulied Nof u Taħfanħes[11] iqaxxrulek rasek.

¹⁷Forsi dan ma ġralekx għax tlaqt lill-Mulej Alla tiegħek, meta kien qiegħed imexxik fit-triq?

¹⁸U issa għalfejn trid tieħu triq l-Eġittu[12], biex tixrob l-ilma tan-Nil? Għalfejn trid taqbad triq l-Assirja, biex tixrob l-ilma tal-Ewfrat?

¹⁹Il-ħażen tiegħek, il-kastig tiegħek; u ċċanfrek l-infedeltà tiegħek. Kun af u ara kemm hu ħażin u morr, li int tlaqt il-Mulej Alla tiegħek; li ma għandekx aktar twerwir minni, oraklu ta’ Sidi l-Mulej tal-eżerċti.

²⁰Ilu żmien issa li int kissirt il-madmad tiegħek, u ħallejt l-irbit tiegħek, u għedt: ‘Ma nagħtix qima.’ Għax tassew, fuq kull għolja mdaqqsa, taħt kull siġra ħadra, inti mteddejt u żnejt[13],

²¹għad li kont ħawwiltek bħala dielja tajba, bħala żarġun mill-aħjar. Kif inbdiltli f’siġra ħażina, dielja bagħlija?

²²U jekk titnaddaf bis-soder u b’ħafna lissija, quddiemi tibqa’ t-tebgħa ta’ dnubietek, oraklu ta’ Sidi l-Mulej.

²³Kif tista’ tgħid: ‘Jien ma tħammiġtx, ma ġrejtx wara l-Bagħalim’? Ara, il-passi tiegħek fil-wied[14]: agħraf x’għamilt! Ġemla ħafifa sserrep triqatha!

²⁴Ħmara selvaġġa mdorrija fid-deżert b’leblieba fuqha xxomm ir-riħ; min se jżommha fis-saħna tagħha? Min ifittixha ma jitħabatx biex isibha: malajr issibha fix-xahar tagħha!

²⁵Ħares riġlejk mill-ħafa, u griżmejk mill-għatx! Imm’int tgħid: ‘Ma jimpurtax! Jien il-barranin inħobb u warajhom irrid immur!”

²⁶Bħalma jirgħex il-ħalliel meta jaqbduh, hekk għad jiregħxu dar Iżrael: huma, is-slaten tagħhom u prinċpijiethom, il-qassisin u l-profeti tagħhom.

²⁷Lil biċċa għuda jgħidulha: ‘Int missieri!’ u lill-ġebla: ‘Int wilidtni! Għax huma tawni daharhom, u ma tawnix wiċċhom! Imma fi żmien hemmhom jgħajtu: ‘Qum u salvana!’

²⁸Fejn huma l-allat li int għamilt? Ħa jqumu jekk għandhom ħila jsalvawk fi żmien hemmek! Għax daqs għadd blietek, allatek, ja Ġuda!

²⁹“Għaliex toħduha miegħi? Ilkoll qomtu kontrija, oraklu tal-Mulej.

³⁰Għalxejn jien drabt ’l uliedek, it-tagħlima ma ħaduhiex; ix-xabla tagħkom stess qerditilkom il-profeti, bħalma jeqred l-iljun il-priża.

³¹Ja nisel li intom, araw il-kelma tal-Mulej. Jaqaw kont jien xi deżert għal Iżrael? Jew xi art mgħargħra fid-dlam? Għax il-poplu tiegħi qalu: ‘Issa ħlisna, għandek aktar ma niġux.’

³²Forsi x-xbejba tinsa l-ġawhra tagħha? jew l-għarusa l-faxxa tagħha? Imma l-poplu tiegħi nsieni għal żmien bla qjies.

³³Kemm taf issibha triqtek, int u tfittex l-imħabba? Saħansitra lin-nisa ħżiena għandek ħila tgħallem triqtek.

³⁴Sa fil-kefef ta’ lbiesek jinsab id-demm ta’ nies bla ħtija, minkejja li ma qbadthomx jisirqu.

³⁵Imbagħad tgħid: ‘Jiena bla ħtija! Iva, il-korla tiegħu tbiegħdet minni.’ Arani, se nġibek għall-ħaqq, talli int għedt: ‘Ma dnibtx.’

³⁶Ah! Kemm waqajt fil-baxx biex biddilt triqtek! Quddiem l-Eġittu wkoll għad tħammar wiċċek, bħalma tħammart quddiem l-Assirja!

³⁷Minn hemm ukoll b’idejk fuq rasek għad terġa’ lura, għax il-Mulej rema ’l dawk li fihom qegħedt it-tama tiegħek; fihom ir-risq ma ssibx.