Read Maltese Bible with DC – IL-BIBBJA IL-KOTBA MQADDSA ĠEREMIJA 21 Bible Online

ĠEREMIJA 21 - Maltese Bible with DC – IL-BIBBJA IL-KOTBA MQADDSA bible

ĠEREMIJA 21

¹Il-kelma li waslet lil Ġeremija mingħand il-Mulej meta s-sultan Sedekija bagħatlu lil Pasħur[45] bin Malkija, u ’l Sefanija bin Magħxija l-qassis, jitolbuh:

²‘Stħarreġ il-Mulej għalina, għax Nabukodonosor sar sultan ta’ Babilonja, ħabat għalina; għandu mnejn il-Mulej iġib ruħu magħna skont l-għemejjel tiegħu tal-għaġeb u dan jitbiegħed minna.”

³U Ġeremija weġibhom: ‘Dan għandkom tgħidu lil Sedekija:

⁴“Dan jgħid il-Mulej, Alla ta’ Iżrael: Arawni, sa ndawwar l-armi li għandkom f’idejkom, li bihom qegħdin titqabdu mas-sultan ta’ Babilonja, u l-Kaldin li qegħdin jassedjawkom minn barra s-swar, u niġborhom f’nofs din il-belt.

⁵Jiena stess nitqabad kontrikom b’id merfugħa u bi driegħi qawwi, b’għadab, b’saħna u b’qilla kbira.

⁶U nidrob lil min jgħammar f’din il-belt, kemm in-nies u kemm il-bhejjem; imutu b’pesta kbira.

⁷U mbagħad, oraklu tal-Mulej, jien nitlaq f’idejn Nabukodonosor, sultan ta’ Babilonja, u f’idejn l-għedewwa tagħhom, u f’idejn dawk li qegħdin ifittxulhom ħajjithom, lil Sedekija, sultan ta’ Ġuda, u l-qaddejja tiegħu u l-poplu u ’l min jeħles f’din il-belt mill-pesta, mix-xabla u mill-ġuħ, u hu jgħaddihom minn xifer ix-xabla; la jitħassarhom, la jħoss għalihom, u lanqas iħenn għalihom.’

⁸“U lil dan il-poplu għandek tgħidlu: ‘Dan jgħid il-Mulej: Arawni, se nqiegħed quddiemkom it-triq tal-ħajja u t-triq tal-mewt.

⁹In-nies li jifdal f’din il-belt se jmutu bix-xabla, bil-ġuħ u bil-pesta; u min joħroġ u jagħti ruħu lill-Kaldin li qegħdin jassedjawkom jgħix, u jkollu ħajtu bħala priża.

¹⁰Għax jien dawwart wiċċi fuq din il-belt għad-deni u mhux għall-ġid, oraklu tal-Mulej, għad tingħata f’idejn is-sultan ta’ Babilonja[46] u dan jagħtiha n-nar u jaħraqha.’

¹¹U lid-dar tas-sultan ta’ Ġuda għidilha: “Isimgħu l-kelma tal-Mulej,

¹²dar David, dan jgħid il-Mulej: Agħmlu ħaqq sa minn filgħodu, eħilsu l-maħqur minn id min jgħakksu, li ma tikbisx qillti bħan-nar, u tibqa’ tħeġġeġ bla ma ħadd jitfiha, minħabba l-ħażen ta’ għemilkom.

¹³Arani kontrik, int li tgħammar fil-wied, blata tal-wita, oraklu tal-Mulej. Intom li tgħidu: ‘Min qatt se jinżel għalina, u min qatt se jidħol ġo djarna?’

¹⁴U jien inħallaskom skont il-frott ta’ għemilkom, oraklu tal-Mulej, u nkebbes in-nar fil-masġar tagħha, u jibla’ l-inħawi kollha ta’ madwarha!