Read Maltese Bible with DC – IL-BIBBJA IL-KOTBA MQADDSA ĠEREMIJA 22 Bible Online

ĠEREMIJA 22 - Maltese Bible with DC – IL-BIBBJA IL-KOTBA MQADDSA bible

ĠEREMIJA 22

¹Dan qalli l-Mulej: “Inżel id-dar tas-sultan ta’ Ġuda u hemm ħabbar dan il-kliem.

²Għidlu: ‘Isma’ l-kelma tal-Mulej, sultan ta’ Ġuda, int li qiegħed fuq it-tron ta’ David; int u l-qaddejja tiegħek u l-poplu tiegħek, li jgħaddu minn dawn il-bwieb.

³“Dan jgħid il-Mulej: ‘Agħmlu l-ħaqq u s-sewwa u eħilsu l-maħqur minn id l-oppressuri u l-barrani, l-iltim u l-armla la tgħakksuhomx, la tagħmlulhomx vjolenza. La xxerrdux demm l-innoċenti f’dan il-post.

⁴‘Għax jekk intom tassew tħarsu dan il-kliem, jibqgħu jidħlu minn dan il-bieb is-slaten, li qegħdin fuq it-tron ta’ David, rekbin fuq il-karrijiet u fuq iż-żwiemel, huma u l-qaddejja u l-poplu tagħhom.

⁵Imma jekk ma tisimgħux dan il-kliem, naħlef bija nnifsi, oraklu tal-Mulej, issir ħerba minn din id-dar.

⁶Għax dan jgħid il-Mulej għad-dar tas-sultan ta’ Ġuda: Bħal Gilgħad int għalija, bħall-quċċata tal-Libanu[47], imma nagħmel minnek deżert, belt bla nies.

⁷Inħejji għalik nies qerrieda, kull wieħed bl-armi tiegħu, u jqaċċtu l-aħjar taċ-ċedri tiegħek u jwaddbu kollox fin-nar.

⁸‘U minn din il-belt għad jgħaddu kotra ta’ ġnus u jistaqsu lil xulxin: ‘Għala l-Mulej għamlilha hekk lil din il-belt kbira,’

⁹u jweġbuhom: ‘Għaliex abbandunaw il-patt tal-Mulej, Alla tagħhom, u niżlu wiċċhom fl-art quddiem allat oħra u qdewhom.’ ”

¹⁰La tibkux il-mejjet[48], la tnewħux għalih, imma ibku sewwa għal min hu sejjer, għax ma jerġa’ lura qatt, u lanqas qatt ma jara art twelidu.

¹¹Għax dan jgħid il-Mulej lil Sallum[49] bin Ġosija, sultan ta’Ġuda, li kien isaltan flok Ġosija missieru, u ħareġ minn dan il-post: “Mhux se jerġa’ lura hawn, qatt iżjed.

¹²Għax fil-post fejn eżiljawh, priġunier hemm għad imur. U din l-art ma jaraha qatt iżjed.”

¹³Gwaj għal min jibni daru fuq il-ħażen, u l-kmamar ta’ fuq bl-inġustizzja; li jħaddem lil għajru għal xejn, u ta’ xogħlu ma jħallsux;

¹⁴li jgħid: ‘Ħa nibni dar għalija kbira, bi kmamar fuq imrewħa sewwa’; li jiftaħ fiha twieqi kbar, jiksiha biċ-ċedru u jiżbogħha bl-aħmar.

¹⁵Taħseb int li qiegħed issaltan, għax miklub għaċ-ċedru? Jaqaw missierek ma kienx jiekol u jixrob? Ma kienx jagħmel il-ħaqq u s-sewwa, u kellu r-riżq[50]?

¹⁶Kien jagħmel il-ħaqq mal-magħkus, u kellu r-riżq u mal-fqir; Mhux dan ifisser tagħraf lili? Oraklu tal-Mulej.

¹⁷Ma għandekx għajnejn u qalb ħlief għall-qligħ tiegħek diżonest, u għat-tixrid ta’ demm in-nies bla ħtija, u għat-taqriq u t-tagħkis ta’ ħaddieħor.

¹⁸Għalhekk dan jgħid il-Mulej lil Ġeħojakim bin Ġosija, sultan ta’ Ġuda; “Ma jitnehdux għalih u jgħidu: ‘Jaħasra ħija!’ jew ‘Jaħasra oħti!’ Ma jitnehdux għalih u jgħidu: ‘Jaħasra sidi!’ jew ‘Jaħasra l-kobor tiegħu!’

¹⁹Difna ta’ ħmar jidfnuh, barra bwieb Ġerusalemm għad ikaxkruh u jarmuh.”

²⁰Itla’ fuq il-Libanu u għajjat, u għolli leħnek f’Basan; għajjat minn Għabarim, għax ħbiebek ilkoll inqerdu.

²¹Kellimtek meta int kont fir-riżq, u int għedt: “Ma rridx nisma’ ”. Din kienet triqtek sa minn żgħożitek, għax qatt ma smajt minn kliemi.

²²Ir-rgħajja tiegħek kollha jġorrhom ir-riħ, u ħbiebek kollha jmorru fil-jasar. Imbagħad tistħi u titħawwad, minħabba l-ħażen kollu tiegħek.

²³U int li tgħammar fil-Libanu, int li tbejjet fiċ-ċedri, kemm għad trid tokrob, meta jaqbdek l-uġigħ, l-uġigħ u t-tkagħwiġ ta’ mara fil-ħlas.

²⁴Daqs kemm jien ħaj, oraklu tal-Mulej, imqar kieku Konija[51] bin Ġeħojakim, sultan ta’ Ġuda, kien iċ-ċurkett tas-siġill[52] f’idi l-leminija, minn hemm kont naqilgħek.

²⁵Nitilqek f’idejn dawk li qegħdin ifittxulek ħajtek; f’idejn dawk li int tibża’ minnhom u f’idejn Nabukodonosor, sultan ta’ Babilonja, u f’idejn il-Kaldin.

²⁶U jien inwaddab lilek u lil ommok[53] li wilditek, f’art oħra li intom ma twelidtux fiha, u hemm tmutu.

²⁷U l-art, li jixtiequ jerġgħu lura fiha, qatt iżjed ma’ jerġgħu lura fiha.

²⁸X’inhu Konija? Xi biċċa fuħħar għar-rimi u għat-tkissir? Xi ħaġa ma togħġob lil ħadd? Għala hu u nislu mkeċċija, mitfugħa f’art li biha ma jafux?

²⁹O art, art, art, isimgħu l-kelma tal-Mulej.

³⁰Dan jgħid il-Mulej: “Iktbu ’l dan ir-raġel bħallikieku bla tfal[54], bniedem bla riżq f’ħajtu. Għax ħadd minn nislu ma jirnexxilu jsib post fuq it-tron ta’ David, u jerġa’ jsaltan fuq Ġuda.”