Read Maltese Bible with DC – IL-BIBBJA IL-KOTBA MQADDSA ĠEREMIJA 23 Bible Online

ĠEREMIJA 23 - Maltese Bible with DC – IL-BIBBJA IL-KOTBA MQADDSA bible

ĠEREMIJA 23

¹“Gwaj għar-rgħajja li jeqirdu u jxerrdu l-merħla tal-mergħa tiegħi, oraklu tal-Mulej.

²Għalhekk dan jgħid il-Mulej, Alla ta’ Iżrael, lir-rgħajja, li jirgħu l-poplu tiegħi: ‘Intom xerridtu n-nagħaġ tiegħi, gerrixtuhom u ma ħadtux aktar ħsiebhom. Arawni, se naħseb fikom jien minħabba l-ħażen ta’ għemilkom, oraklu tal-Mulej.

³U jiena niġbor il-fdal tal-nagħaġ tiegħi mill-artijiet kollha li xerridthom fihom, u rreġġagħhom lura lejn il-mergħa tagħhom, u jnisslu u joktru.

⁴U nqiegħed fuqhom rgħajja li jirgħuhom, u ma jitbeżżgħux aktar, ma jitwaħħxux; u ħadd minnhom ma jonqos, oraklu tal-Mulej.

⁵Araw, għad jasal żmien, oraklu tal-Mulej, meta nqajjem lil David rimja ġusta, li jsaltan ta’ sultan, u jmexxi bil-għaqal u jagħmel is-sewwa u l-ħaqq fil-pajjiż.

⁶Fi żmienu Ġuda jkun salv, U Iżrael jgħammar fiż-żgur. U dan hu l-isem li jsejħulu: ‘Il-Mulej is-Sewwa tagħna.’

⁷Għalhekk: Arawhom, ġejjin jiem, oraklu tal-Mulej, meta ma jgħidux iżjed ‘Daqs kemm hu ħaj il-Mulej, li tella’ ’l ulied Iżrael mill-art tal-Eġittu’

⁸imma: ‘Daqs kemm hu ħaj il-Mulej, li tella’ u ħareġ in-nisel ta’ dar Iżrael mill-art tat-Tramuntana, u mill-artijiet kollha li fihom xerridhom.’ Imbagħad jistgħu jgħammru f’arthom.”

⁹Għall-profeti: Qalbi nqasmet ġewwa fija; għadmi kollu mkexkex; sirt qisni bniedem fis-sakra, bħal raġel ħadu l-inbid, minħabba l-Mulej, u minħabba l-kliem imqaddes tiegħu.

¹⁰Għax il-pajjiż miżgħud bl-adulterji; minħabba fihom l-art tbikkik, u l-mergħat fid-deżert nixfu. U l-ġiri tagħhom kollu ħażin, u saħħithom l-inġustizzja.

¹¹Għax imqar il-profeta u l-qassis, ilkoll midgħajja. Saħansitra f’dari sibt ħżunithom, oraklu tal-Mulej.

¹²Għalhekk triqthom tkunilhom mogħdija kollha żliq, fid-dlam jinxteħtu fiha u jogħtru, għax inġib fuqhom il-ħsara fis-sena ta’ kastighom, oraklu tal-Mulej.

¹³U fost il-profeti ta’ Samarija rajt ukoll ħwejjeġ li jdardruk: iħabbru f’isem Bagħal, u jqarrqu b’Iżrael il-poplu tiegħi.

¹⁴Fost il-profeti ta’ Ġerusalemm, imbagħad, rajt ħwejjeġ ikexkxuk: adulterji u mġiba giddieba; isaħħu id il-ħżiena, biex ħadd minnhom ma jerġa’ lura minn ħżunitu. Ilkoll għalija qishom Sodoma, u n-nies tagħha bħal Gomorra.

¹⁵Għalhekk dan jgħid il-Mulej tal-eżerċti kontra l-profeti: “Arawni, sa nitmagħhom l-absint, u nisqihom l-ilma avvelenat, għax mingħand il-profeti ta’ Ġerusalemm xtered il-ħażen mal-art kollha.”

¹⁶Dan jgħid il-Mulej tal-eżerċti: “La tisimgħux kliem li jħabbrulkom il-profeti biex jimlewlkom moħħkom bil-frugħat. Jgħidulkom li jiġihom f’qalbhom, u mhux li jiġihom minn fomm il-Mulej.

¹⁷Qegħdin jgħidulhom lil dawk li jistmerru l-kelma tal-Mulej: ‘Ikollkom is-sliem,’ u lil dawk li jagħmlu li jiġihom f’moħħhom jgħidulhom: ‘Ebda deni mhu se jilħaqkom!”

¹⁸Min minnhom qagħad fil-kunsill tal-Mulej, u ra u sama’ kelmtu? Min ta widen għal kelmtu biex isemmagħha?

¹⁹Arawh, ir-riefnu tal-Mulej! Xegħel għadbu bħal tempesta qawwija, li se tfaqqa’ fuq ras il-ħżiena.

²⁰Għax is-saħna tal-Mulej ma terġax lura, qabel ma tkun għamlet u temmet ħsieb moħħu. Fl-aħħar jiem tifhmuh sewwa.

²¹Ma bgħatthomx jien dawn il-profeti, għalkemm huma marru jiġru! Ma kellimthomx, għalkemm huma marru jħabbru.

²²Kieku qagħdu fil-kunsill tiegħi, kienu jsemmgħu kelmti lill-poplu tiegħi, u jreġġgħuhom lura minn triqathom, u mill-ħażen ta’ għemilhom.

²³“Jaqaw jien Alla fil-qrib biss, oraklu tal-Mulej, mhux ukoll Alla fil-bogħod?

²⁴Jista’ bniedem jistaħba fil-moħbiet, u jien ma narahx? Oraklu tal-Mulej. Ma nimliex jiena is-sema u l-art? Oraklu tal-Mulej.

²⁵“Jien smajt x’qalu l-profeti li jħabbru l-gideb f’ismi u jgħidulhom: ‘Kelli ħolma! Kelli ħolma!’

²⁶Kemm se jdum sejjer dan? Jaqaw jien f’qalb il-profeti li jħabbru l-gideb, li jħabbru t-thewdin ta’ moħħhom?

²⁷Jaħsbu li bil-ħolm tagħhom, li jgħidu wieħed lil ieħor, se jnessu ismi lill-poplu, bħalma nsew ismi missirijiethom minħabba Bagħal?

²⁸Ħalli l-profeta li jkollu xi ħolma, jirrakkonta l-ħolm, u min ikollu l-kelma tiegħi, ħa jxandarha bis-sewwa. X’għandu x’jaqsam it-tiben mal-qamħ[55]? Oraklu tal-Mulej.

²⁹Jaqaw mhijiex kelmti bħan-nar, jew bħal imterqa tfarrak il-blat? Oraklu tal-Mulej.

³⁰“Għalhekk jiena kontra l-profeti, Oraklu tal-Mulej, li jisirqu kliemi mingħand xulxin.

³¹Arawni, jien kontra l-profeti, Oraklu tal-Mulej, li jħaddmu lsienhom u jxandru l-orakli.

³²Arawni, jien kontra l-profeti li jħabbru ħolm giddieb, oraklu tal-Mulej, jirrakkuntaw u jqarrqu bil-poplu tiegħi bil-gideb u l-ftaħir fieragħ tagħhom. Jien ma bgħatthomx u lanqas ordnajtilhom xejn, u mhuma jagħmlu ebda ġid lil dan il-poplu, oraklu tal-Mulej.

³³“Meta jistaqsik dan il-poplu, jew xi profeta jew xi qassis, u jgħidlek: ‘X’inhu l-oraklu tal-Mulej[56]?’ int għandek twieġeb: ‘Intom it-toqol tal-Mulej! Għalhekk jiena rmejtkom, jgħid il-Mulej.’

³⁴“U jekk xi profeta jew xi qassis jew xi ħadd mill-poplu jsemmi ‘l-oraklu tal-Mulej’, jien nikkastiga ’l dak il-bniedem u l-familja tiegħu.

³⁵“Hekk għandkom tistaqsu wieħed lil ieħor bejnietkom: ‘X’wieġeb il-Mulej?’ jew ‘X’qal il-Mulej?’

³⁶Imma l-oraklu tal-Mulej m’għandkomx issemmuh aktar, għaliex għal dak li jkun, l-oraklu jkun kliemu stess. Intom qegħdin tgħawġu l-kliem ta’ Alla l-ħaj, il-Mulej tal-eżerċti, Alla tagħna.

³⁷Hekk għandkom tistaqsu lill-profeta: ‘X’wieġeb il-Mulej?’ jew ‘X’qal il-Mulej?’

³⁸Imma jekk tibqgħu tgħidu ‘l-oraklu tal-Mulej’, allura dan jgħid il-Mulej: ‘Talli intom bqajtu tgħidu din il-kelma: ‘oraklu tal-Mulej’, meta jien għedtilkom biex ma tgħidux: ‘oraklu tal-Mulej’,

³⁹arawni, jien se nerfagħkom bħal toqol u nwaddabkom ’il barra minn quddiemi, lilkom u lill-belt li tajt lilkom u lil missirijietkom,

⁴⁰inniżżel għajb fuqkom għal dejjem u mistħija għal dejjem li qatt ma jintesew.’ ”