Read Maltese Bible with DC – IL-BIBBJA IL-KOTBA MQADDSA ĠEREMIJA 24 Bible Online

ĠEREMIJA 24 - Maltese Bible with DC – IL-BIBBJA IL-KOTBA MQADDSA bible

ĠEREMIJA 24

¹Il-Mulej urieni żewġt iqfief mimlija tin, quddiem it-tempju tal-Mulej, wara li Nabukodonosor, sultan ta’ Babilonja, ħa fl-eżilju minn Ġerusalemm lil Ġekonija bin Ġeħojakim, sultan ta’ Ġuda, u l-prinċpijiet ta’ Ġuda, u n-nies tas-sengħa u l-ħaddieda, u ħadhom f’Babilonja.

²Qoffa waħda kien fiha tin tajjeb ħafna, bħat-tin tal-bikri, u l-qoffa l-oħra kien fiha tin ħażin ħafna, li ma kontx tista’ tieklu minħabba ħżunitu.

³U l-Mulej qalli: “X’inti tara, Ġeremija?” U jien weġibt: “Tin! It-tin it-tajjeb, tajjeb tassew; u t-tin il-ħażin, ħażin tassew, u ma tistax tieklu minħabba ħżunitu.”

⁴U ġietni l-kelma tal-Mulej u qalli:

⁵“Dan jgħid il-Mulej, Alla ta’ Iżrael: Bħal dan it-tin tajjeb, jien nitgħaxxaq bl-itturufnati ta’ Ġuda, li jien bgħatthom minn dan il-pajjiż fl-art tal-Kaldin.

⁶Nixħet għajnejja fuqhom għall-ġid tagħhom, u rreġġagħhom lura f’din l-art, u nibnihom mill-ġdid u ma nħotthomx; inħawwilhom u ma naqlagħhomx.

⁷Nagħtihom qalb li tagħrafni; għax jien il-Mulej; u huma jkunu l-poplu tiegħi, u jiena nkun Alla tagħhom, meta jerġgħu lura lejja b’qalbhom kollha.

⁸“U bħat-tin il-ħażin li ma tistax tieklu minħabba ħżunitu, hekk jgħid il-Mulej, hekk nagħmel ma’ Sedekija, sultan ta’ Ġuda, u mal-prinċpijiet, ma’ min fadal mill-poplu ta’ Ġerusalemm, li jibqgħu jgħixu fil-pajjiż, u dawk li marru jgħammru fl-Eġittu.

⁹Jien nagħmel minnhom waħx għas-saltniet kollha tal-art, għajb u taqbil, daħk u saħta għall-pajjiżi kollha li fihom inkun xerridthom.

¹⁰U nibgħat f’nofshom ix-xabla, il-ġuħ, il-pesta, sakemm ma ntemmhomx mill-art li jien tajt lilhom u lil missirijiethom.”