Read Maltese Bible with DC – IL-BIBBJA IL-KOTBA MQADDSA ĠEREMIJA 27 Bible Online

ĠEREMIJA 27 - Maltese Bible with DC – IL-BIBBJA IL-KOTBA MQADDSA bible

ĠEREMIJA 27

¹Fil-bidu tas-saltna ta’ Ġeħojakim[63], sultan ta’ Ġuda, ġiet din il-kelma lil Ġeremija mingħand il-Mulej:

²“Dan qalli l-Mulej: Agħmel ħbula u madmad, u qegħedhom fuq għonqok.

³U ibgħathom b’messaġġ lis-sultan ta’ Edom u s-sultan ta’ Mowab, u s-sultan ta’ wlied Għammon, u s-sultan ta’ Tir, u s-sultan ta’ Sidon, mal-messaġġiera li ġew Ġerusalemm għand Sedekija, sultan ta’ Ġuda.

⁴U ordnalhom dal-messaġġ għal sidienhom: ‘Dan jgħid il-Mulej tal-eżerċti, Alla ta’ Iżrael, dan għandkom tgħidu lis-sidien tagħkom:

⁵Jien huwa li għamilt l-art, il-bniedem u l-bhejjem, li jinsabu fuq wiċċ l-art, bil-qawwa kbira tiegħi u bi driegħi merfugħ, u nagħtiha lil min jogħġobni.

⁶U issa jien tajt dawn l-artijiet kollha f’idejn Nabukodonosor, sultan ta’ Babilonja, il-qaddej tiegħi; u sal-bhejjem tax-xagħri tajtu biex jaqduh.

⁷U l-ġnus kollha għad jaqdu lilu, u lil ibnu u ’l bin ibnu, sakemm jasal żmien pajjiżu wkoll; meta jaħkmuh ħafna slaten qawwija.

⁸U jiġri li xi ġens jew xi saltna ma taqdihx lil Nabukodonosor, sultan ta’ Babilonja, u ma tmiddx għonqha għall-madmad tas-sultan ta’ Babilonja, jien nikkastiga ’l dan il-ġens jew saltna bix-xabla, bil-ġuħ u bil-pesta, oraklu tal-Mulej, sa ma ntemmhom b’idejh.

⁹“Mela intom tisimgħux mill-profeti tagħkom[64], mill-bassara tagħkom, mill-ħalliema tagħkom, mill-ħabbara tagħkom u mis-saħħara tagħkom, li qegħdin jgħidulkom dan il-kliem: Ma taqdux is-sultan ta’ Babilonja.

¹⁰Għax dan kollu gideb li qegħdin iħabbrulkom biex ibegħdukom minn artkom, għax jien inxerridkom, u intom tinqerdu.

¹¹“Imma l-ġens li jmidd għonqu għall-madmad tas-sultan ta’ Babilonja u jaqdih, jien inħallih bi kwietu f’artu, oraklu tal-Mulej, biex jaħdimha u jgħammar fiha.”

¹²U lil Sedekija, sultan ta’ Ġuda, kellimtu u għedtlu dan kollu: “Middu għonqkom għall-madmad tas-sultan ta’ Babilonja u aqduh, lilu u l-poplu tiegħu, u tgħixu.

¹³Għaliex għandkom tmutu, inti u l-poplu tiegħek, bix-xabla u bil-ġuħ u bil-pesta bħalma hedded il-Mulej lil dak il-poplu li ma jaqdix lis-sultan ta’ Babilonja?

¹⁴“La tisimgħux mill-kliem tal-profeti li qegħdin jgħidulkom: ‘Le, ma taqdux is-sultan ta’ Babilonja’, għax dan kollu gideb li qegħdin iħabbrulkom.

¹⁵Għax jien ma bgħatthomx, oraklu tal-Mulej, u qegħdin iħabbru l-gideb f’ismi biex jiena jkolli nxerridkom u tinqerdu intom u l-profeti li qegħdin iħabbrulkom.”

¹⁶U lill-qassisin u lil dan il-poplu kollu kellimthom u għedtilhom: “Dan jgħid il-Mulej: ‘La tisimgħux l-għajdut tal-profeti tagħkom li qegħdin iħabbrulkom u jgħidulkom: ‘Araw it-tagħmir tal-Mulej, dalwaqt jiġi lura minn Babilonja’, għax dan kollu gideb li qegħdin iħabbrulkom.

¹⁷La tagħtuhomx widen! Aqdu lis-sultan ta’ Babilonja u tgħixu. Għaliex għandha din il-belt issir ħerba?

¹⁸Jekk inhuma tassew profeti u għandhom il-kelma tal-Mulej magħhom, ħalli jitolbu lill-Mulej tal-eżerċti biex it-tagħmir li għad baqa’ fit-tempju tal-Mulej u fil-palazz tas-sultan ta’ Ġuda u f’Ġerusalemm ma jmorrux f’Babilonja.

¹⁹“Għax dan jgħid il-Mulej tal-eżerċti dwar il-kolonni u l-ħawt tal-bronż u l-imqagħad u l-bqija tat-tagħmir li għad baqa’ f’din il-belt,

²⁰li ma ħax Nabukodonosor, sultan ta’ Babilonja, meta ħa lil Ġekonija bin Ġeħojakim, sultan ta’ Ġuda, minn Ġerusalemm għal Babilonja, u l-kbarat kollha ta’ Ġuda u Ġerusalemm fl-eżilju.

²¹“Għax dan jgħid il-Mulej tal-eżerċti, Alla ta’ Iżrael, dwar it-tagħmir li għad fadal fit-tempju tal-Mulej u fil-palazz tas-sultan ta’ Ġuda u Ġerusalemm:

²²‘Kollox għad jittieħed f’Babilonja[65] u hemm jibqgħu saż-żmien meta nfittixhom jien, oraklu tal-Mulej, u ntellagħhom u nġibhom lura f’dan il-post.’ ”