Read Maltese Bible with DC – IL-BIBBJA IL-KOTBA MQADDSA ĠEREMIJA 28 Bible Online

ĠEREMIJA 28 - Maltese Bible with DC – IL-BIBBJA IL-KOTBA MQADDSA bible

ĠEREMIJA 28

¹F’dik is-sena, fil-bidu tas-saltna ta’ Sedekija, sultan ta’ Ġuda, fil-ħames xahar tar-raba’ sena, Ħananija bin Għażżur, profeta minn Gibgħon, ġie fit-tempju tal-Mulej, u taħt għajnejn il-qassisin u l-poplu kollu qalli:

²“Hekk jgħid il-Mulej tal-eżerċti, Alla ta’ Iżrael: Jien kissirt il-madmad tas-sultan ta’ Babilonja.

³Sa sentejn oħra, inġib lura f’dan il-post it-tagħmir kollu tat-tempju tal-Mulej li Nabukodonosor, is-sultan ta’ Babilonja, ħa minn dan il-post u ġarru fil-Babilonja,

⁴u rraġġa’ lura wkoll lejn dan il-post lil Ġekonija bin Ġeħojakim, is-sultan ta’ Ġuda, u wkoll l-itturufnati kollha ta’ Ġuda li marru f’Babilonja, oraklu tal-Mulej, għax se nkisser il-madmad ta’ Babilonja.”

⁵Imbagħad il-profeta Ġeremija wieġeb lil Ħananija l-profeta taħt għajnejn il-qassisin u taħt għajnejn il-poplu kollu, li kienu qegħdin fit-tempju tal-Mulej;

⁶u l-profeta Ġeremija qallu: “Sewwa! Jalla l-Mulej jagħmel hekk! Jalla l-Mulej jagħmel li jseħħ dak li għadek kemm ħabbart, u jġib lura f’dan il-post it-tagħmir tat-tempju tal-Mulej u l-itturufnati kollha minn Babilonja.

⁷Madankollu nitolbok tisma’ dan li se ngħidlek f’widnejk u f’widnejn il-poplu kollu.

⁸Il-profeti li ġew qabli u qablek, sa minn żmien ilu, ħabbru gwerra, ġuħ u pesta għal ħafna pajjiżi u saltniet kbar.

⁹Imma l-profeta li jħabbar is-sliem ma jingħarafx li hu profeta mibgħut tassew mill-Mulej, jekk mhux meta sseħħ il-ħaġa li l-profeta jkun ħabbar.”

¹⁰Imbagħad il-profeta Ħananija qabad il-madmad minn fuq għonq il-profeta Ġeremija u kissru,

¹¹u qal Ħannanija quddiem il-poplu kollu: “Hekk jgħid il-Mulej: Sa sentejn oħra, hekk se nkisser minn fuq għonq il-ġnus kollha l-madmad ta’ Nabukodonosor, is-sultan ta’ Babilonja.” U l-profeta Ġeremija qabad triqtu u telaq.

¹²Wara li Ħananija, il-profeta, kien kisser il-madmad minn fuq għonq il-profeta Ġeremija, il-Mulej kellem lil Ġeremija u qallu:

¹³“Mur kellem lil Ħananija u għidlu: Hekk jgħid il-Mulej: ‘Int kissirt madmad tal-ħatab, iżda minfloku għad ikollok madmad tal-ħadid.’

¹⁴Għax hekk jgħid il-Mulej tal-eżerċti, Alla ta’ Iżrael: ‘Madmad tal-ħadid inqiegħed fuq għonq dawn il-ġnus kollha, ħalli jaqgħu lsiera ta’ Nabukodonosor, is-sultan ta’ Babilonja, u jaqduh; għax jien tajtu saħansitra l-bhejjem tax-xagħri.’ ”

¹⁵Il-profeta Ġeremija qal lil Ħananija l-profeta: “Ħananija, ismagħni, nitolbok: ma kienx il-Mulej li bagħtek, imma int ġagħalt lil dan il-poplu jittama f’gidba.

¹⁶Għalhekk dan jgħid il-Mulej: ‘Ara, se nqaċċtek minn fuq wiċċ l-art, u inti tmut dis-sena stess għax bit-taħbir tiegħek ridt ixxewwex kontra l-Mulej!”

¹⁷Ħananija l-profeta miet fis-seba’ xahar ta’ dik is-sena stess.