Read Maltese Bible with DC – IL-BIBBJA IL-KOTBA MQADDSA ĠEREMIJA 3 Bible Online

ĠEREMIJA 3 - Maltese Bible with DC – IL-BIBBJA IL-KOTBA MQADDSA bible

ĠEREMIJA 3

¹“Jekk raġel ikeċċi ’l martu[15], u din titbiegħed minnu, u ssir il-mara ta’ raġel ieħor, jaqaw l-ewwel wieħed se jerġa’ lura lejha? Mhijiex forsi mtebbgħa din l-art? Int li żnejt ma’ ħafna ħbieb, għandek il-ħila terġa’ għal għandi? Oraklu tal-Mulej.

²Erfa’ għajnejk lejn l-għoljiet għerja, u ħares: fejn ma tbahradtx? Fit-toroq kont tkun bilqiegħda tistenniehom, bħal Għarbi fid-deżert[16]. Int ċappast l-art biż-żina u l-ħażen tiegħek.

³Għalhekk inżammet ix-xita, u xita mwaħħra naqset ukoll. Ġbinek, ġbin ta’ mara żienja, u l-mistħija ma ridthiex.

⁴Mhux issa wkoll issejjaħli: ‘Missier! Int il-ħabib ta’ żgħożiti!

⁵Se tibqa’ mgħaddab għal dejjem u mmasħan sal-aħħar?’ Hekk titkellem, imma tibqa’ tagħmel ħażen kemm tiflaħ.”

⁶U l-Mulej kellimni fi żmien is-sultan Ġosija: “Rajt x’għamlet Iżrael ta’ rasha iebsa? Marret fuq kull muntanja għolja u qagħdet tiżni taħt kull siġra ħadra.

⁷U jien għedt: ‘Wara dan kollu li għamlet għad terġa’ lura għal għandi.’ Imma hi ma reġgħetx lura, u rat dan kollu oħtha Ġuda, l-infidila.

⁸Rat li, minħabba l-adulterji kollha li waqgħet fihom Iżrael ta’ rasha iebsa, jien bgħattha ’l barra u tajtha l-kitba tad-divorzju. Madankollu oħtha, Ġuda l-infidila, ma beżgħetx; telqet u żniet hi wkoll.

⁹Miġbuda minn żinitha ħammġet l-art u żniet mal-ġebel u l-għewied.

¹⁰U wara dan kollu Ġuda l-infidila ma reġgħetx lura lejja minn qalbha, imma taparsi,” oraklu tal-Mulej.

¹¹U l-Mulej qalli: “Iżrael, ta’ rasha iebsa, ġusta aktar minn Ġuda l-infidila!

¹²Mur u xandar dan il-kliem lejn it-Tramuntana u għid: ‘Erġa’ lura, ja Iżrael ta’ rasha iebsa, oraklu tal-Mulej. Ma nħarisx aktar b’wiċċ imqarras lejk, għax jien ħanin, oraklu tal-Mulej. Ma nżommx il-korla għal dejjem.

¹³Agħraf biss ħżunitek, għax int qomt kontra l-Mulej, Alla tiegħek, xerridt imħabbtek mal-barranin taħt kull siġra tħaddar, u minn kliemi ma ridtx tisma’! Oraklu tal-Mulej.

¹⁴Erġgħu lura, ulied ribelli, oraklu tal-Mulej, għax jiena Sidkom. U neħodkom, wieħed minn belt u tnejn minn kull familja, u ndaħħalkom f’Sijon.

¹⁵U nagħtikom rgħajja għal qalbi, li jirgħu bl-għerf u l-għaqal.

¹⁶Meta intom toktru u tnisslu fuq l-art f’dawk il-jiem, oraklu tal-Mulej, ħadd ma jitkellem aktar fuq l-arka tal-patt tal-Mulej, ma jaħsibx aktar fuqha, u ma jiftakarx fiha, ma jibkuhiex, u ma jagħmlux oħra.

¹⁷F’dak iż-żmien isejħu ’l Ġerusalemm: ‘It-tron tal-Mulej’, u jinġabru fiha l-ġnus kollha għal isem il-Mulej, u ma jimxux aktar mal-ebusija ta’ qalbhom il-ħażina.

¹⁸Dak iż-żmien tmur dar Ġuda f’dar Iżrael, u flimkien jiġu mill-art tat-Tramuntana fl-art li jien tajt b’wirt lill missirijiethom.

¹⁹U jien għedt: ‘Kemm nixtieq inqiegħdek fost uliedi, u nagħtik art li tgħaxxaq, l-isbaħ fost l-isbaħ wirt tal-ġnus.’ Jien għedt: ‘Missier issejjaħli, u minn warajja ma twarrabx.’

²⁰Iżda bħalma mara tqarraq b’seħibha, hekk intom, dar Iżrael, qarraqtu bija, oraklu tal-Mulej.

²¹Fuq l-għoljiet għerja jinstama’ leħen, leħen il-biki u l-krib ta’ wlied Iżrael, għax għawġu triqithom, insew lill-Mulej Alla tagħhom.

²²Erġgħu lura, ulied ribelli, jiena nfejjaqkom mill-ħsara tat-telfa tagħkom.’ ‘Arana ġejjin għandek, għax int il-Mulej Alla tagħna!

²³Tassew qerq huma l-għoljiet, u t-tbahrid fuq il-muntanji. Tassew, fil-Mulej Alla tagħna hemm is-salvazzjoni ta’ Iżrael.

²⁴L-għajb tal-allat[17] sa minn żgħożitna kiel il-frott ta’ xogħol missirijietna: l-imrieħel tagħhom u l-baqar tagħhom, is-subien tagħhom u l-bniet tagħhom.

²⁵Ħa nimteddu fl-għajb tagħna, u ninksew bil-mistħija, għax dnibna kontra l-Mulej Alla tagħna, aħna u missirijietna, sa minn żgħożitna sal-lum. Ma smajniex minn kelmet il-Mulej, Alla tagħna.’