Read Maltese Bible with DC – IL-BIBBJA IL-KOTBA MQADDSA ĠEREMIJA 31 Bible Online

ĠEREMIJA 31 - Maltese Bible with DC – IL-BIBBJA IL-KOTBA MQADDSA bible

ĠEREMIJA 31

¹“F’dak iż-żmien, oraklu tal-Mulej, jien inkun Alla tat-tribujiet kollha ta’ Iżrael, u huma jkunu l-poplu tiegħi.”

²Dan jgħid il-Mulej: “Il-poplu li ħeles mis-sejf[69] sab ħniena fid-deżert: Iżrael terraq lejn il-mistrieħ tiegħu.”

³Mill-bogħod il-Mulej deherlu: “Bi mħabba ta’ dejjem ħabbejtek, għalhekk il-ħlewwa tiegħi rfajt għalik.

⁴Jien nerġa’ nwaqqfek fuq riġlejk, o xebba ta’ Iżrael, u inti tieqaf. Terġa’ tiżżejjen bit-tnabar tiegħek, u toħroġ tiżfen ferrieħa.

⁵Terġa’ tħawwel id-dwieli fuq il-muntanji tas-Samarija; il-bdiewa tiegħek iħawlu u jiġbru l-ewwel frott.

⁶Għax jasal jum meta fuq il-muntanja ta’ Efrajm l-għassiesa jgħajtu u jgħidu: ‘Qumu, ejjew nitilgħu Sijon għand il-Mulej, Alla tagħna.’ ”

⁷Għax dan jgħid il-Mulej: “Għannu bil-ferħ għal Ġakobb, sellmu lill-ewlieni fost il-ġnus. Xandru, faħħru u niedu: ‘Il-Mulej salva l-poplu tiegħu, il-fdal ta’ Iżrael.’

⁸Arani, se nġibhom minn art it-Tramuntana, niġborhom minn truf l-art, ilkoll kemm huma, l-għomja u z-zopop, in-nisa bit-tfal u n-nisa fil-ħlas: kotra kbira terġa’ lura hawn.

⁹Jiġu bil-biki, imma nfarraġhom jiena u nġibhom lura. Immexxihom lejn l-ilma ġieri, minn mogħdijiet watja biex ma jitfixklux. Għax jien missier għal Iżrael, u Efrajm hu ibni l-kbir.

¹⁰“Isimgħu, ġnus, kelmet il-Mulej, xandruha ’l bogħod fil-gżejjer: għidu: ‘Dak li xerred lil Iżrael jiġbru, u jħarsu kif ragħaj iħares il-merħla tiegħu.’

¹¹Għax il-Mulej feda lil Ġakobb, ħelsu minn id wieħed aqwa minnu.

¹²Għad jiġu u jgħannu fuq l-għolja ta’ Sijon, u wiċċhom jiddi minħabba t-tjieba tal-Mulej; minħabba l-qamħ, u l-inbid ġdid u ż-żejt, u l-imrieħel tan-nagħaġ u l-baqar; u huma jsiru bħal ġnien imsoqqi tajjeb, ma jkunux iżjed mifnija.

¹³“Imbagħad jifirħu x-xbejbiet biż-żfin, jifirħu ż-żgħażagħ u x-xjuħ; u jiena nbiddel il-vistu tagħhom f’hena, infarraġhom u nferraħhom wara l-hemm tagħhom.

¹⁴Il-qassisin nimliehom bl-abbundanza, u l-poplu tiegħi bil-ġid inxebbgħu,” oraklu tal-Mulej.

¹⁵Dan jgħid il-Mulej; “Instama’ leħen f’Rama[70], ilfiq u biki kollu mrar, Rakel titbekka għal uliedha, ma tridx taf b’sabar, għax iżjed mhumiex.”

¹⁶Dan jgħid il-Mulej: “Żomm leħnek ’il bogħod mill-biki, għajnejk ’il bogħod mid-dmugħ, għax hemm ħlas għal taħbitek, oraklu tal-Mulej, għax huma għad jerġgħu lura minn pajjiż l-għadu.

¹⁷Hemm tama għall-ġejjieni, oraklu tal-Mulej, uliedek għad jerġgħu lejn arthom.

¹⁸“Jien smajt tajjeb lil Efrajm jitkarrab: ‘Inti kkastigajtni, u jien ħadt il-kastig bħal għoġol bla taħriġ. Reġġagħni lura u jien nerġa’ lura, għax inti l-Mulej Alla tiegħi.

¹⁹Wara li tbigħedt u ndimt, wara li tgħallimt, jien ħabbatt fuq wirki. Jien stħajt u tħawwadt, għax inġib fuqi l-għajb ta’ żgħożiti.’

²⁰Jaqaw Efrajm l-iben għażiż! Jaqaw it-tfajjel tal-għaxqa tiegħi? Għax kull meta nitkellem kontrih, jien niftakar aktar fih. Għalhekk ġewwenija mqanqla għalih; u żgur li nħenn għalih, oraklu tal-Mulej.

²¹“Waqqaf għalik il-plieri, qiegħed għalik is-sinjali, moħħok hemm fuq il-mogħdija, it-triq li minnha għaddejt. Erġa’ lura, xbejba ta’ Iżrael, erġa’ lura lejn blietek.

²²Kemm se ddum ittalla’ u tniżżel, ja bint xewwiexa? Il-Mulej ħalaq ħaġa ġdida fl-art: il-mara ddawwar ir-raġel[71].”

²³Dan jgħid il-Mulej tal-eżerċti, Alla ta’ Iżrael: “Meta jien inkun biddiltilhom xortihom fl-art ta’ Ġuda u fi blietha, għad jerġgħu jgħidu dan il-kliem: ‘Jalla jbierkek il-Mulej, għamara tas-sewwa, għolja qaddisa!’

²⁴U għad jgħammru fiha Ġuda u blietha, il-bdiewa u dawk li jiġġerrew bl-imrieħel.

²⁵“Għax jien naħji kull ruħ mifnija, u nxabba’ kull ruħ għajjiena.

²⁶Għalhekk stenbaħt u ħarist, u ngħasi ħassejtu ħelu.

²⁷“Araw, għad jiġu jiem, oraklu tal-Mulej, meta jien niżra’ d-dar ta’ Iżrael, u d-dar ta’ Ġuda, b’żerriegħa tal-bniedem u b’żerriegħa tal-bhejjem.

²⁸U jiġri li bħalma għassist fuqhom biex naqla’ u nkisser, biex inġarraf u neqred, biex nagħmel il-ħsara, hekk ngħasses fuqhom biex nibni u nħawwel, oraklu tal-Mulej.

²⁹“F’dawk il-jiem ma jgħidux iżjed: il-missirijiet kielu l-għeneb qares, u ddarrsu snien l-ulied.’

³⁰Iżda kull wieħed imut għal dnubu; kull min jiekol l-għeneb qares, jiddarrsu snienu.”

³¹“Araw, għad jiġi żmien, oraklu tal-Mulej, meta jien nagħmel patt ġdid[72] ma’ dar Iżrael u dar Ġuda;

³²mhux bħall-patt li għamilt ma’ missirijiethom fiż-żmien meta qbadthom minn idejhom biex ħriġthom mill-art tal-Eġittu, il-patt tiegħi li huma kisru, għalkemm jien kont l-għarus tagħhom, oraklu tal-Mulej.

³³“Imma dan ikun il-patt li għad nagħmel ma’ dar Iżrael wara dawk il-jiem, oraklu tal-Mulej. Inqiegħed il-liġi tiegħi fosthom u niktibha f’qalbhom; u jiena nkun Alla tagħhom, u huma jkunu l-poplu tiegħi.

³⁴Ma jgħallmux iżjed lil xulxin, u ħadd ma jgħid lil ħuh: ‘Agħraf il-Mulej’, għaliex ilkoll kemm huma jkunu jafuni, miż-żgħir sal-kbir, oraklu tal-Mulej. Għax jien naħfrilhom ħżunithom, u ħtijiethom aktar ma niftakarhomx.”

³⁵Dan jgħid il-Mulej, li għamel ix-xemx għad-dawl binhar, il-qamar u l-kwiekeb b’liġijiethom għad-dawl billejl; li jqanqal il-baħar u jgargru mwieġu, Jaħweh tal-eżerċti ismu:

³⁶“Daqskemm qatt jistgħu jitwarrbu minn quddiemi dawn il-liġijiet, oraklu tal-Mulej, daqshekk nisel Iżrael jieqaf milli jkun għal dejjem poplu quddiemi.”

³⁷Dan jgħid il-Mulej: “Jekk is-smewwiet fl-għoli jistgħu jitkejlu, u jinkixfu s-sisien tad-dinja minn taħt, jien inwarrab in-nisel kollu ta’ Iżrael, għal kulma għamlu,” oraklu tal-Mulej.

³⁸“Araw, għad jiġu l-jiem, oraklu tal-Mulej, meta l-belt terġa’ tinbena għall-Mulej, mit-torri ta’ Ħananel sa Bieb ix-Xewka.

³⁹U l-ħabel tal-kejl iwassal aktar ’il quddiem dritt sal-għolja ta’ Gareb u mbagħad idur lejn Gogħa.

⁴⁰U l-wied kollu tal-katavri u l-irmied, u r-raba’ kollu sal-wied ta’ Kedron sax-xewka ta’ Bieb iż-Żwiemel fuq il-Lvant ikunu kkonsagrati lill-Mulej, u ma jkunu qatt iżjed imġarrfa jew meqruda.”