Read Maltese Bible with DC – IL-BIBBJA IL-KOTBA MQADDSA ĠEREMIJA 33 Bible Online

ĠEREMIJA 33 - Maltese Bible with DC – IL-BIBBJA IL-KOTBA MQADDSA bible

ĠEREMIJA 33

¹U ġiet il-kelma tal-Mulej għat-tieni darba lil Ġeremija, meta kien għadu magħluq fil-bitħa tal-għassa u qallu:

²“Dan jgħid il-Mulej, li għamel l-art, sawwarha u wettaqha, Jaħweh ismu:

³‘Sejjaħli u jien inwieġbek u ngħidlek bi ħwejjeġ kbar, ħwejjeġ mistura li int ma toħlomhomx.’

⁴“Għax dan jgħid il-Mulej, Alla ta’ Iżrael, dwar id-djar ta’ din il-belt u d-djar tas-sultan ta’ Ġuda mġarrfin minħabba l-assedju u x-xabla.

⁵Il-Kaldin ġejjin biex jissieltu u jimlewhom bl-iġsma mejta ta’ nies li jien drabt fl-għadab u l-qilla tas-saħna tiegħi. Jien ħbejt wiċċi minn din il-belt minħabba l-ħażen kollu tagħhom.

⁶“Arawni, jien se nagħlqilhom il-ġerħa; indewwihom u nfejjaqhom, u nurihom il-kotra tas-sliem sħiħ għal dejjem.

⁷U jien inbiddel ix-xorti ta’ Ġuda u x-xorti ta’ Iżrael, u nibnihom bħalma kienu fil-bidu.

⁸U nnaddafhom mill-ħażen kollu tagħhom li bih offendewni u naħfrilhom dnubiethom kollha li bihom offendewni u qamu kontrija.

⁹U din il-belt tkun għalija ferħ, tifħir, u glorja fost il-popli tal-art, li għad jisimgħu bil-ġid li nkun għamilt magħhom. U dawn għad jitbeżżgħu u jitriegħdu minħabba l-ġid kollu u s-sliem li għad nagħmlilhom.

¹⁰“Dan jgħid il-Mulej: F’dan il-post li intom qegħdin tgħidu: ‘Sar ħerba, bla nies li jgħixu fihom u bla bhejjem’, u bl-ibliet ta’ Ġuda u fit-toroq ta’ Ġerusalemm, imħarbtin, bla nies u bla bhejjem, għad jinstema’

¹¹l-għajjat ta’ ferħ u l-għajjat ta’ hena, leħen l-għarus u leħen l-għarusa, l-għana ta’ dawk li jgħidu: ‘Faħħru lill-Mulej tal-eżerċti, għax tajjeb il-Mulej, u l-ħniena tiegħu għal dejjem’, huma u jġibu f’dar il-Mulej l-offerti ta’ radd il-ħajr; għax jien inbiddel ix-xorti tal-pajjiż bħalma kien fil-bidu, jgħid il-Mulej.

¹²“Dan jgħid il-Mulej tal-eżerċti: Għad ikun hawn f’dan il-post, imħarbat, bla nies u bla bhejjem, u fl-ibliet kollha tiegħu, mergħat fejn ir-rgħajja jserrħu l-imrieħel tagħhom.

¹³Fl-ibliet kollha tal-muntanji, fl-ibliet tas-Sefela, fl-ibliet tan-Negeb, fl-art ta’ Benjamin u fl-inħawi ta’ madwar Ġerusalemm, fl-ibliet ta’ Ġuda, għad jgħaddu l-imrieħel minn taħt idejn min jgħoddhom, jgħid il-Mulej.”

¹⁴“Ara, għad jiġu jiem, oraklu tal-Mulej, meta nġib fuq dar Iżrael u dar Ġuda l-ġid li wegħedthom.

¹⁵F’dawk il-jiem u f’dak iż-żmien intalla’ min-nisel ta’ David rimja tas-sewwa, bniedem li jagħmel il-ġustizzja u s-sewwa fil-pajjiż.

¹⁶F’dawk il-jiem Ġuda jinħeles u Ġerusalemm tgħammar b’moħħha mistrieħ, u għalhekk isejħulha: ‘Il-Mulej is-sewwa tagħna.’

¹⁷“Għax dan jgħid il-Mulej; ‘Ma jonqos qatt bniedem min-nisel ta’ David biex joqgħod fuq it-tron ta’ dar Iżrael.

¹⁸U ma jonqosx bniedem min-nisel tal-qassisin ta’ Levi minn quddiemi biex joffri s-sagrifiċċju tal-ħruq u jaħraq l-offerti u jagħmel is-sagrifiċċji kull jum.’ ”

¹⁹U ġiet il-kelma tal-Mulej lil Ġeremija u qallu:

²⁰“Dan jgħid il-Mulej: Jistax jinkiser il-patt tiegħi mal-jum u l-patt tiegħi mal-lejl, b’mod li ma jkunx hemm jum jew lejl f’waqthom?

²¹Daqshekk ieħor jista’ jinkiser il-patt tiegħi ma’ David, il-qaddej tiegħi, u ma jkun hemm ħadd minn uliedu li jsaltan fuq it-tron tiegħu, u mal-Leviti, il-qassisin, qaddejja tiegħi.

²²Għax daqs kemm huma l-qtajja’ tas-smewwiet li ma jingħaddux u r-ramel tal-baħar li ma jitkejjilx, daqshekk ieħor għad inkattar nisel David u l-Leviti jservuni.”

²³U ġiet il-kelma tal-Mulej lil Ġeremija u qallu:

²⁴“Ma rajtx x’inhu jgħid dan il-poplu: ‘Il-Mulej warrab iż-żewġ tribujiet li kien għażel?’ Hekk qegħdin imaqdru l-poplu tiegħi u ma jqisuhx aktar nazzjon f’għajnejhom.

²⁵“Dan jgħid il-Mulej: ‘Irid ma jkunx hemm aktar patt bejni u bejn il-jum u l-lejl, irid ma nżommx il-liġijiet tas-sema u l-art,

²⁶biex tassew inwarrab nisel Ġakobb u David il-qaddej tiegħi u ma nagħżilx aktar min-nisel tiegħu nies li jsaltnu fuq nisel Abraham, Iżakk u Ġakobb. Għax jien għad inbiddlilhom xortihom u nħenn għalihom.’ ”