Read Maltese Bible with DC – IL-BIBBJA IL-KOTBA MQADDSA ĠEREMIJA 34 Bible Online

ĠEREMIJA 34 - Maltese Bible with DC – IL-BIBBJA IL-KOTBA MQADDSA bible

ĠEREMIJA 34

¹Il-kelma li ġiet lil Ġeremija mingħand il-Mulej, meta Nabukodonosor, sultan ta’ Babilonja, l-eżerċtu tiegħu kollu, is-saltniet kollha tal-art taħt il-ħakma ta’idejh, u l-popli kollha kienu qegħdin jaħbtu għal Ġerusalemm u l-ibliet tagħha, u qallu:

²“Dan jgħid il-Mulej Alla ta’ Iżrael: mur u kellem lil Sedekija, sultan ta’ Ġuda, u għidlu: ‘Dan jgħid il-Mulej: Arani se nerħi din il-belt f’idejn is-sultan ta’ Babilonja, u dan jaħraqha bin-nar.

³U int ma teħlishiex minn idejh, għax jaqbduk żgur u jerħuk f’idejh, u s-sultan ta’ Babilonja tarah wiċċ imb wiċċ, u hu jkellmek minn fomm għal fomm. U int tmur Babilonja.

⁴“Imma isma’ l-kelma tal-Mulej, inti Sedekija, sultan ta’ Ġuda; għax dan jgħidlek il-Mulej: Int ma tmutx bix-xabla!

⁵Tmut fis-sliem, u bħalma ħarqu l-bħur għal missirijietek li kienu qablek sa mill-bidu, hekk għad jaħarqu l-bħur għalik u jitniehdu għalik: ‘Jaħasra, sidi!’ Għax jien għedt din il-kelma.” Oraklu tal-Mulej.

⁶U kellem il-profeta Ġeremija lil Sedekija, sultan ta’ Ġuda, u qallu dan il-kliem kollu f’Ġerusalemm,

⁷meta l-eżerċti tas-sultan ta’ Babilonja kienu qegħdin jaħbtu għal Ġerusalemm u għall-bqija kollha tal-ibliet ta’ Ġuda - Lakis u Għażeka[75] - għax dawn biss kien għad fadal mill-ibliet iffortifikati kollha ta’ Ġuda.

⁸Il-kelma li ġiet lil Ġeremija mingħand il-Mulej wara li s-sultan Sedekija kien għamel patt mal-poplu li kien f’Ġerusalemm, meta kien nidielhom il-ħelsien,

⁹jiġifieri, li kulħadd jibgħat ħieles l-ilsir tiegħu Lhudi u kull wieħed l-ilsira tiegħu Lhudija, u b’hekk ħadd aktar ma jżomm fil-jasar lil ħutu Lhud.

¹⁰U l-prinċpijiet u l-poplu li kienu daħlu f’dan il-patt li kull wieħed jibgħat ħieles l-ilsir tiegħu u kull wieħed l-ilsira tiegħu, sabiex ma jżommhomx aktar fil-jasar, semgħu u bagħtuhom ħielsa.

¹¹Imma mbagħad reġgħu lura minn kelmthom u reġgħu ħadu lura dawn l-ilsiera, irġiel u nisa, li kienu bagħtuhom ħielsa, u għamlu minnhom ilsiera, irġiel u nisa, mill-ġdid[76].

¹²U ġiet il-kelma tal-Mulej lil Ġeremija u qallu:

¹³“Dan jgħid il-Mulej, Alla ta’ Iżrael: Jien kont dħalt f’patt ma’ missirijietkom dakinhar li ħriġthom mill-art tal-Eġittu, minn dar il-jasar, u għedtilhom:

¹⁴‘Fi tmiem is-seba’ snin int għandek tibgħat ħieles lil ħuk Lhudi, li jkun inbiegħ lilek; hu jaħdimlek għal sitt snin, imbagħad tibagħtu ħieles minn miegħek!’ Imma missirijietkom ma semgħux minni u anqas tawni widen.

¹⁵“Intom illum indimtu, u għamiltu s-sewwa f’għajnejja, u nidejtu l-ħelsien kull wieħed lil għajru, u għamiltu patt quddiemi fid-dar li fuqha jissejjaħ ismi.

¹⁶Imma issa irġajtu lura minn kelmtkom, u kasbartu ismi; erġajtu ħadtu lura kull wieħed l-ilsir tiegħu u kull wieħed l-ilsira tiegħu, li kontu bgħattuhom ħielsa b’rajhom f’idejhom u ġegħeltuhom iservukom ta’ lsiera, irġiel u nisa.

¹⁷“Għalhekk dan jgħid il-Mulej: Intom ma smajtux minni li tniedu l-ħelsien, kull wieħed lil ħuh u kull wieħed li għajru. Arawni, issa nnidilkom il-ħelsien, oraklu tal-Mulej. Nerħikom għax-xabla, għall-pesta, u għall-ġuħ, u nagħmel minnkom waħx għas-saltniet kollha tal-art.

¹⁸U dawk li kisru l-patt tiegħi, li ma żammewx il-kelma tal-patt li għamlu quddiemi, nagħmlilhom bħall-għoġol, li qasmu fi tnejn[77], u għaddew minn bejn il-bċejjeċ tiegħu.

¹⁹“U l-prinċpijiet ta’ Ġuda, u l-prinċpijiet ta’ Ġerusalemm, l-uffiċjali u l-qassisin, u l-poplu kollu tal-art, li għaddew minn bejn il-bċejjeċ tal-għoġol,

²⁰lil dawn kollha se nerħihom f’idejn l-għedewwa tagħhom, u f’idejn dawk li qegħdin ifittxulhom ħajjithom, u l-iġsma mejta tagħhom ikunu ikel għat-tajr tal-ajru, u l-bhejjem tal-art.

²¹Lil Sedekija, sultan ta’ Ġuda, u l-prinċpijiet tiegħu nerħihom f’idejn l-għedewwa tagħhom u f’idejn dawk li qegħdin ifittxulhom ħajjithom, u f’idejn l-eżerċtu tas-sultan ta’ Babilonja, li qegħdin jitbiegħdu minnkom.

²²“Arawni, se nagħti ordni, oraklu tal-Mulej, u rreġġagħhom lura għal din il-belt, jaħbtu għaliha, jaqbduha f’idejhom, u jaħarquha bin-nar. L-ibliet ta’ Ġuda ħerba nagħmel minnhom u ħadd ma jgħammar fihom.”