Read Maltese Bible with DC – IL-BIBBJA IL-KOTBA MQADDSA ĠEREMIJA 36 Bible Online

ĠEREMIJA 36 - Maltese Bible with DC – IL-BIBBJA IL-KOTBA MQADDSA bible

ĠEREMIJA 36

¹U ġara li fir-raba’ sena ta’ Ġeħojakim bin Ġosija, sultan ta’ Ġuda, ġiet din il-kelma lil Ġeremija mingħand il-Mulej u qallu:

²“Ħu romblu tal-kitba, u ikteb fuqu l-kliem kollu li jien għedtlek dwar Iżrael, u dwar Ġuda, u dwar il-ġnus kollha minn mindu kellimtek fi żmien Ġosija sa dan il-jum.

³Għandu mnejn id-dar ta’ Ġuda, meta jisimgħu bil-ħsara li għandi f’rasi li nagħmlilhom, jerġgħu kull wieħed lura minn triqtu l-ħażina, u jien naħfrilhom ħżunithom u dnubiethom.”

⁴U Ġeremija sejjaħ lil Bàruk bin Nerija, u Bàruk beda jikteb minn fomm Ġeremija l-kliem kollu tal-Mulej, li l-Mulej kien qallu, fuq ir-romblu tal-kitba.

⁵U Ġeremija ordna lil Bàruk u qallu: “Miżmum kif jien, ma nistax immur f’dar il-Mulej.

⁶Mur int u aqra mill-ktieb kulma ktibt minn fommi, il-kliem tal-Mulej, f’widnejn il-poplu, f’dar il-Mulej, f’jum ta’ sawm. Aqrah ukoll f’widnejn in-nies ta’ Ġuda li jiġu minn blietha.

⁷Għandu mnejn it-talb tagħhom jasal sa quddiem il-Mulej, u jerġgħu, kull wieħed minnhom, lura minn triqtu l-ħażina għax kbira hija l-korla u s-saħna tal-Mulej li bihom hedded lil dan il-poplu.”

⁸U Bàruk bin Nerija għamel kollox skont ma ordnalu Ġeremija, il-profeta, u qara mill-ktieb il-kliem tal-Mulej f’dar il-Mulej.

⁹Ġara li fil-ħames sena ta’ Ġeħojakim bin Ġosija, sultan ta’ Ġuda, fid-disa’ xahar, nidew sawma quddiem il-Mulej għan-nies ta’ Ġerusalemm, u għall-poplu kollu tal-ibliet ta’ Ġuda, li kien tela’ Ġerusalemm.

¹⁰U Bàruk qara mill-ktieb f’widnejn il-poplu kollu l-kliem ta’ Ġeremija f’dar il-Mulej, fil-kamra ta’ Ġemarija bin Safan, il-kittieb, fil-bitħa ta’ fuq, fid-daħla ta’ Bieb il-Ġdid ta’ dar il-Mulej.

¹¹U sama’ Mikija bin Ġemarija, bin Safan, il-kliem kollu tal-Mulej minn fuq il-ktieb.

¹²U niżel fil-palazz tas-sultan, fil-kamra tal-kittieb, u kienu hemm il-prinċpijiet kollha: Elisama, il-kittieb, u Delaja bin Samajja, Elnatan bin Għakbor, u Ġemarija bin Safan, u Sedekija bin Ħananija u l-prinċpijiet l-oħra kollha.

¹³U Mikija għarrafhom bil-kliem kollu li kien sama’ meta Bàruk kien qiegħed jaqra mill-ktieb f’widnejn il-poplu.

¹⁴Imbagħad il-ġemgħa tal-prinċpijiet bagħtu lil Ġeħudi bin Netanija, bin Selemija, bin Kusi, għand Bàruk biex jgħidlu: “Aqbad f’idejk il-ktieb li kont taqra minn fuqu f’widnejn il-poplu, u ejja.” U Bàruk bin Nerija qabad il-ktieb f’idejh u mar għandhom.

¹⁵U qalulu: “Oqgħod bilqiegħda u aqra minnu li nisimgħuk.” U Bàruk beda jaqra li jisimgħuh.

¹⁶U ġara li malli semgħu dan il-kliem kollu beżgħu, u bdew iħarsu lejn xulxin, u jgħidu lil Bàruk: “Ikollna ngħarrfu lis-sultan b’dan kollu.”

¹⁷U Bàruk bdew jistħarrġuh u staqsewh: “Għidilna, jekk jogħġbok, kif ktibt dan il-kliem? Minn fommu?”

¹⁸U Bàruk weġibhom: “Hu beda jgħidli dan il-kliem b’fommu, u jiena kont nikteb bil-linka fuq dan il-ktieb.”

¹⁹U l-prinċpijiet wieġbu lil Bàruk: “Mur u nħeba, int u Ġeremija, u ħadd m’għandu jkun jaf fejn intom.”

²⁰Huma mbagħad marru għand is-sultan, f’daru, fil-kamra tiegħu, wara li ħallew ir-romblu fil-kamra ta’ Elisama l-kittieb, u għarrfu lis-sultan b’kulma kien ġara.

²¹U s-sultan bagħat lil Ġeħudi jġib il-ktieb, u dan ħadu mill-kamra ta’ Elisama l-kittieb. U Ġeħudi beda jaqrah f’widnejn is-sultan u f’widnejn il-prinċpijiet li kienu ħdejn is-sultan.

²²Is-sultan kien qiegħed fil-palazz tax-xitwa; kien id-disa’ xahar, u quddiemu kien hemm kenur imkebbes.

²³U ġara li kull meta Ġeħudi kien jaqra tlieta jew erba’ kolonni, is-sultan kien iqattagħhom b’mus tal-iskriba, iwaddabhom fin-nar fil-kenur, sakemm il-ktieb kollu ntemm fin-nar li kien hemm fil-kenur.

²⁴U ma beżgħux, u anqas ċarrtu ħwejjiġhom, la s-sultan u lanqas il-qaddejja tiegħu li kienu semgħu dan il-kliem kollu.

²⁵Għalkemm Elnatan, Delaja, u Ġemarija għafsu fuq is-sultan biex ma jaħraqx il-ktieb, hu ma semax minnhom.

²⁶Anzi s-sultan ordna lil Ġeraħmijel, bin is-sultan, u lil Xeraja bin Għażrijel, u lil Selemija bin Għabdel, li jaqbdu lil Bàruk, il-kittieb, u lil Ġeremija l-profeta; imma l-Mulej kien ħbiehom.

²⁷U wara li s-sultan kien ħaraq il-ktieb u l-kliem li kien kiteb Bàruk minn fomm Ġeremija, ġiet il-kelma tal-Mulej lil Ġeremija u qallu:

²⁸“Erġa’ ħu romblu ieħor u ikteb fuqu l-kliem kollu ta’ qabel li kien hemm fil-ktieb ta’ qabel, li ħaraq Ġeħojakim, sultan ta’ Ġuda.

²⁹U lis-sultan Ġeħojakim, sultan ta’ Ġuda, tgħidlu: ‘Dan jgħid il-Mulej: Int ħraqt dan il-ktieb u għedt: Għala ktibt fuqu u għedt: Għad jiġi s-sultan ta’ Babilonja u jħarbat dan il-pajjiż u jeqred minnu bnedmin u bhejjem?

³⁰Għalhekk dan jgħid il-Mulej dwar Ġeħojakim[79], sultan ta’ Ġuda: ma jkollu ’l ħadd minn nislu li joqgħod fuq it-tron ta’ David, u l-katavru tiegħu jintrema barra għas-sħana binhar u għall-ksieħ billejl.

³¹Jiena nikkastiga lilu u lil nislu, u l-qaddejja tiegħu għal ħżunithom, u nġib fuqhom u fuq min jgħammar f’Ġerusalemm u fuq in-nies ta’ Ġuda, il-ħsara kollha li heddidthom biha, u ma semgħux.”

³²U Ġeremija ħa romblu ieħor u tah lil Bàruk bin Nerija, il-kittieb, u kiteb fuqu minn fomm Ġeremija l-kliem kollu li kien hemm fil-ktieb li kien ħaraq fin-nar Ġeħojakim, sultan ta’ Ġuda; u żied magħhom ħafna kliem ieħor bħal dan.