Read Maltese Bible with DC – IL-BIBBJA IL-KOTBA MQADDSA ĠEREMIJA 37 Bible Online

ĠEREMIJA 37 - Maltese Bible with DC – IL-BIBBJA IL-KOTBA MQADDSA bible

ĠEREMIJA 37

¹Kien isaltan is-sultan Sedekija bin Ġosija minflok Konija bin Ġeħojakim, li kien għamlu sultan fuq l-art ta’ Ġuda Nabukodonosor is-sultan ta’ Babilonja.

²U ma semgħux minn kliem il-Mulej, li kien qalilhom permezz ta’ Ġeremija, la hu, la l-qaddejja tiegħu u lanqas il-poplu tal-pajjiż.

³U bagħat is-sultan Sedekija lil Ġeħukal bin Selemija u ’l Sefanija bin Magħxija, il-qassis, għand Ġeremija l-profeta biex jgħidulu: “Itlob għalina l-Mulej, Alla tagħna.”

⁴U l-profeta Ġeremija kien dieħel u ħiereġ f’nofs il-poplu, għax kien għadhom ma tefgħuhx il-ħabs.

⁵L-eżerċtu tal-Fargħun kien ħareġ mill-Eġittu, u malli semgħu b’din l-aħbar, il-Kaldin, li kienu qegħdin jaħbtu għal Ġerusalemm, qabdu u telqu minn madwar Ġerusalemm.

⁶U ġiet il-kelma tal-Mulej lil Ġeremija l-profeta u qallu:

⁷“Dan jgħid il-Mulej, Alla ta’ Iżrael: Dan għandkom tgħidulu lis-sultan ta’ Ġuda, li bagħatkom għandi tistħarrġuni: Ara l-eżerċtu tal-Fargħun, li ħareġ biex jgħinkom, se jerġa’ lura lejn pajjiżu fl-Eġittu;

⁸u l-Kaldin jerġgħu lura biex jaħbtu għal din il-belt, u jaħtfuha, u jagħtuha n-nar.”

⁹Dan jgħid il-Mulej: “La titqarrqux u tgħidu: ‘Jitilqu żgur minn madwarna l-Kaldin’, għax ma jitilqux.

¹⁰Lanqas jekk tkissru l-eżerċtu kollu tal-Kaldin, li qegħdin jaħbtu għalikom, u jibqa’ minnhom biss miġruħin, kull wieħed fit-tinda tiegħu, dawn iqumu u ’l din il-belt jagħtuha n-nar.”

¹¹Ġara, imbagħad, li malli l-Kaldin refgħu l-kamp minn madwar Ġerusalemm minħabba l-eżerċtu tal-Fargħun,

¹²Ġeremija ħareġ minn Ġerusalemm biex imur fl-art ta’ Benjamin ħalli jaqsam il-wirt ma’ niesu.

¹³U kif Ġeremija kien fil-Bieb ta’ Benjamin, u kien hemm il-kap tal-għassa jismu Irija bin Selemija, bin Ħananija, u dan waqqaf lil Ġeremija l-profeta u qallu: “Int sejjer mal-Kaldin!”

¹⁴U Ġeremija qallu: “Mhux veru. M’iniex sejjer għand il-Kaldin.” Imma dan ma emmnux. Imbagħad Irija qabad lil Ġeremija u ħadu għand il-prinċpijiet.

¹⁵Dawn xegħlu għal Ġeremija, u ħabtu għalih, u xeħtuh fil-ħabs fid-dar ta’ Ġonatan, il-kittieb, li kienu għamluha ħabs.

¹⁶U lil Ġeremija niżżluh f’ġiebja bil-ħnejjiet, u dam hemm għal ħafna żmien.

¹⁷U s-sultan Sedekija bagħat iġibu u beda jistħarrġu f’daru bil-moħbi u jgħidlu: “Hemm xi kelma mingħand il-Mulej?” U Ġeremija kien iwieġeb: “Hemm,” u qallu: “Int tkun mogħti f’idejn is-sultan ta’ Babilonja.”

¹⁸U Ġeremija qal ukoll lis-sultan Sedekija: “Fiex inqast jien kontra tiegħek, jew kontra dan il-poplu, biex xħettuni l-ħabs?

¹⁹U fejn huma l-profeti tagħkom li kienu jħabbrulkom u jgħidulkom: ‘Ma jiġix is-sultan ta’ Babilonja għalikom u għal dan il-pajjiż?’

²⁰Issa ismagħni, jekk jogħġbok, sultan sidi; ħa tasal għandek it-talba tiegħi; terġax tibgħatni f’dar Ġonatan il-kittieb, li ma mmutx hemm.”

²¹Is-sultan Sedekija ta ordni, u lil Ġeremija għalquh fil-bitħa tal-għassa; u kienu jagħtuh ħobża kuljum mit-triq tal-furnara, sakemm kien għad fadal ħobż fil-belt. U Ġeremija baqa’ fil-bitħa tal-għassa.