Read Maltese Bible with DC – IL-BIBBJA IL-KOTBA MQADDSA ĠEREMIJA 38 Bible Online

ĠEREMIJA 38 - Maltese Bible with DC – IL-BIBBJA IL-KOTBA MQADDSA bible

ĠEREMIJA 38

¹U Sefatija bin Mattan, u Gedalija bin Pasħur, u Ġukal bin Selemija u Pasħur bin Malakija semgħu l-kliem li Ġeremija kien jgħid lill-poplu kollu:

²“Dan jgħid il-Mulej: ‘Min jibqa’ f’din il-belt għad imut bix-xabla, bil-ġuħ u bil-pesta. U min joħroġ għal mal-Kaldin jgħix u jikseb ħajtu daqs li kieku kienet priża, imma jibqa’ ħaj.

³Dan jgħid il-Mulej: ‘Żgur li din il-belt tingħata f’idejn l-eżerċtu tas-sultan ta’ Babilonja u dan jaħtafha f’idejh.’ ”

⁴Il-prinċpijiet marru jgħidu lis-sultan: “Ħalli jiġi maqtul dal-bniedem, għax b’dan il-kliem li qiegħed jgħidilhom qiegħed jaqta’ qalb is-suldati li fadal f’din il-belt u qalb il-poplu kollu. Tassew, bniedem bħal dan mhuwiex ifittex il-ġid ta’ dan il-poplu, imma l-qerda tiegħu.”

⁵U s-sultan Sedekija qalilhom: “Araw, f’idejkom, hu! Għax is-sultan ma jista’ jagħmel xejn magħkom!”

⁶U ħadu lil Ġeremija u xeħtuh fil-bir ta’ Malakija, bin is-sultan, li kien fil-bitħa tal-għassa; imbagħad lil Ġeremija niżżluh bil-ħbula f’dan il-bir; ilma ma kienx fih, imma ħama biss; u Ġeremija għodos fil-ħama.

⁷Għebed-melek, il-Kusi, fizzjal, kien qiegħed fil-palazz tas-sultan meta sama’ li kienu tefgħu lil Ġeremija fil-bir. Issa s-sultan kien bilqiegħda ħdejn il-Bieb ta’ Benjamin.

⁸Għebed-melek ħareġ mill-palazz tas-sultan, mar ikellmu u qallu:

⁹“Sidi s-sultan, dawn in-nies ġiebu ruħhom ħażin f’kulma għamlu lil Ġeremija, il-profeta, li xeħtuh fil-bir, u dalwaqt imut bil-ġuħ, għax ma baqax ħobż fil-belt.”

¹⁰Is-sultan imbagħad ordna lil Għebed-melek, il-Kusi, u qallu: “Ħu miegħek tlitt irġiel minn dawn u mur tella’ lil Ġeremija, il-profeta, mill-bir, qabel ma jmut.”

¹¹U Għebed-melek ħa dawn it-tlieta min-nies miegħu, u mar fil-palazz tas-sultan fil-maħżen tal-ħwejjeġ, u minn hemm ħa xi ċraret qodma u lbiesi mqattgħin, u niżżilhom bil-ħbula fil-bir lil Ġeremija.

¹²U Għebed-melek, il-Kusi, qal lil Ġeremija: “Isa, qiegħed dawn iċ-ċraret qodma taħt abtek minn taħt il-ħbula.” U hekk għamel Ġeremija.

¹³U ġibdu lil Ġeremija bil-ħbula u tellgħuh mill-bir. U baqa’ Ġeremija fil-bitħa tal-għassa.

¹⁴Is-sultan Sedekija bagħat iġib għandu lil Ġeremija, il-profeta, fit-tielet daħla li hemm f’dar il-Mulej, u s-sultan qal lil Ġeremija: “Se nistaqsik ħaġa, u taħbili ebda kelma.”

¹⁵U Ġeremija wieġeb lil Sedekija: “Forsi ma tagħtinix il-mewt jekk ngħidlek? U jekk nagħtik parir se tisma’ minni?”

¹⁶U s-sultan Sedekija ħalef lil Ġeremija bil-moħbi u qallu: “Daqs kemm hu ħaj il-Mulej li ħalqilna din il-ħajja, ma noqtlokx u ma nagħtikx f’idejn in-nies li qegħdin ifittxulek ħajtek.”

¹⁷U Ġeremija qal lil Sedekija: “Dan jgħid il-Mulej, Alla tal-eżerċti, Alla ta’ Iżrael: ‘Jekk int toħroġ għal għand il-fizzjali tas-sultan ta’ Babilonja, ħajtek tkun salva u din il-belt ma jagħtuhiex in-nar, u tibqa’ ħaj, int u darek.

¹⁸Imma jekk ma toħroġx tilqa’ l-fizzjali tas-sultan ta’ Babilonja, jien nitlaq din il-belt f’idejh il-Kaldin u jagħtuha n-nar, u int ma teħlishiex minn idejhom.”

¹⁹U s-sultan Sedekija qal lil Ġeremija: “Jiena nibża’ mil-Lhud li qalbu għal mal-Kaldin, li ma jmorrux jagħtuni f’idejhom u jżebilħuni.”

²⁰U Ġeremija wieġeb: Ma jitilqukx! Isma’ mill-kelma tal-Mulej li jien qiegħed ngħidlek, u jkollok ir-risq u ħajtek tibqa’ salva.

²¹Jekk int ma tridx toħroġ, dan hu li wrieni l-Mulej:

²²Ara, in-nisa kollha li jibqgħu f’dar is-sultan ta’ Ġuda joħorġuhom għal għand il-fizzjali tas-sultan ta’ Babilonja, u l-istess nisa jgħidulek: ‘Qarrqu bik u għelbuk il-ħbieb li int kont tafda fihom; issa li riġlek għodos fit-tajn, huma reġgħu lura minnek.’

²³U n-nisa kollha tiegħek, u wliedek, joħorġuhom għal għand il-Kaldin, u int ma teħlishiex minn taħt idejhom; għad jaqbdek f’idejh is-sultan ta’ Babilonja, u din il-belt jagħtuha n-nar.”

²⁴U Sedekija qal lil Ġeremija: “Qis li ma jkun jaf ħadd b’dan il-kliem, li ma tmutx.

²⁵Jekk il-prinċpijiet jisimgħu li jien tkellimt miegħek u jiġu għandek u jistaqsuk: ‘X’għedt lis-sultan? Taħbilna xejn, inkella noqtluk. Is-sultan x’qallek?’,

²⁶għidilhom: ‘Ressaqt it-talba tiegħi quddiem is-sultan, biex ma jerġax jibgħatni fid-dar ta’ Ġonatan, biex immut hemm.’ ”

²⁷U l-prinċpijiet marru għand Ġeremija u staqsewh, u hu weġibhom sewwasew kif ordnalu s-sultan, u ħallewh bi kwietu, għaliex it-taħdita bejniethom ma kinitx instemgħet.

²⁸U Ġeremija baqa’ fil-bitħa tal-għassa sa dakinhar li nqabdet Ġerusalemm.