Read Maltese Bible with DC – IL-BIBBJA IL-KOTBA MQADDSA ĠEREMIJA 39 Bible Online

ĠEREMIJA 39 - Maltese Bible with DC – IL-BIBBJA IL-KOTBA MQADDSA bible

ĠEREMIJA 39

¹Fid-disa’ sena ta’ Sedekija, sultan ta’ Ġuda, fl-għaxar xahar[80], ġie Nabukodonosor sultan ta’ Babilonja, u l-eżerċtu tiegħu għal Ġerusalemm u assedjaha;

²u fil-ħdax-il sena ta’ Sedekija, fir-raba’ xahar, fid-disa’ jum[81] tax-xahar, saret tiċrita fis-swar tal-belt.

³Meta ttieħdet Ġerusalemm[82] daħlu fiha l-prinċpijiet kollha tas-sultan ta’ Babilonja u qagħdu fil-Bieb tan-Nofs: Nergalsarser, prinċep ta’ Simmagir, il-fizzjal il-kbir, u Nebusażban, fizzjal għoli, u l-bqija tal-prinċpijiet l-oħra kollha tas-sultan ta’ Babilonja.

⁴U ġara li malli rawhom Sedekija, sultan ta’ Ġuda, u n-nies kollha tal-eżerċtu, ħarbu u ħarġu billejl mill-belt, mit-triq ta’ ġnien is-sultan[83], mill-bieb ta’ bejn iż-żewġ ħitan, u qabdu t-triq tal-Għaraba.

⁵Imma l-eżerċtu tal-Kaldin telqulha għal warajhom, u laħqu ’l Sedekija fix-xagħri ta’ Ġeriko, qabduh u tellgħuh quddiem Nabukodonosor, sultan ta’ Babilonja, f’Ribla[84], fl-art ta’ Ħamat fejn is-sultan qatagħlu s-sentenza.

⁶U s-sultan ta’ Babilonja qatel lil ulied Sedekija f’Ribla taħt għajnejh, u qatel ukoll is-sultan ta’ Babilonja l-kbarat kollha ta’ Ġuda.

⁷Imbagħad ’il Sedekija qalagħlu għajnejh, u rabtu bil-ktajjen biex jieħdu lejn Babilonja.

⁸U l-palazz tas-sultan u d-djar tal-poplu, il-Kaldin tawhom in-nar, u s-swar ta’ Ġerusalemm ġarrfuhom.

⁹U l-bqija tal-poplu, li kien fadal fil-belt, u dawk li kienu ċedew, u l-bqija tal-poplu li kien fadal, Nebużaradan, kmandant tal-għases, ħadhom fl-eżilju f’Babilonja.

¹⁰U Nebużaradan, il-kmandant tal-għases, ħalla fl-art ta’ Ġuda l-fqar tal-poplu, li ma kellhom xejn, u dakinhar tahom oqsma tad-dwieli u raba’.

¹¹Nabukodonosor, sultan ta’ Babilonja, lil Nebużaradan, kmandant tal-għases, dwar Ġeremija kien ordnalu u qallu:

¹²“Ħudu u żommu taħt għajnejk, u tagħmillu ebda ħsara, imma agħmel miegħu kif jgħidlek hu.”

¹³Għalhekk Nebużaradan, kmandant tal-għases, u Nebużardan, fizzjal għoli, u Nergalsareser, il-fizzjal il-kbir, u l-prinċpijiet kollha tas-sultan ta’ Babilonja

¹⁴bagħtu jġibu lil Ġeremija mill-bitħa tal-għassa u tawh f’idejn Gedalija bin Aħikam, bin Safan, biex joħorġu u jieħdu f’daru u jibqa’ f’nofs il-poplu.

¹⁵U ġiet il-kelma tal-Mulej lil Ġeremija, meta kien għadu fil-bitħa tal-għassa, u qallu:

¹⁶“Mur u għid lil Għebed-melek, il-Kusi: ‘Dan jgħid il-Mulej tal-eżerċti, Alla ta’ Iżrael: Arani, sa ntemm kliemi fuq din il-belt għall-ħsara tagħha u mhux għar-riżq, u dan se jseħħ taħt għajnejk stess.

¹⁷Imma jien dakinhar neħilsek, oraklu tal-Mulej, u ma tingħatax f’idejn dawk in-nies li minnhom qiegħed tibża’.

¹⁸Għax insalvak żgur, ma taqax taħt ix-xabla, tkun għalik ħajtek bi priża, talli int ittamajt fija, oraklu tal-Mulej.’ ”