Read Maltese Bible with DC – IL-BIBBJA IL-KOTBA MQADDSA ĠEREMIJA 40 Bible Online

ĠEREMIJA 40 - Maltese Bible with DC – IL-BIBBJA IL-KOTBA MQADDSA bible

ĠEREMIJA 40

¹Il-kelma li ġiet lil Ġeremija mingħand il-Mulej wara li Nebużaradan, kmandant tal-għases, bagħtu ħieles minn Rama, għax kien sabu marbut bil-ktajjen f’nofs l-eżiljati minn Ġerusalemm u Ġuda, li kienu sejrin fl-eżilju fil-Babilonja.

²U l-kmandant tal-għases qabad lil Ġeremija u qallu: “Il-Mulej Alla tiegħek kien ħabbar din il-ħsara fuq dan il-post.

³U l-Mulej ġiebha u temm kulma kien ħabbar għax intom dnibtu kontra l-Mulej; u ma smajtux minn kelmtu, u għalhekk ġralkom dan kollu.

⁴U issa, arani, jiena neħilsek mill-ktajjen li għandek ma’ idejk. Jekk jogħġbok tiġi Babilonja, ejja, u jien inżomm għajnejja fuqek; jekk ma jogħġbokx tiġi miegħi Babilonja, oqgħod hawn. Ara, l-art kollha quddiemek, ara fejn jogħġbok u jaqbillek tmur, u mur hemm.

⁵Jekk le, erġa’ lura u mur oqgħod ma’ Gedalija bin Aħikam, bin Safan, li s-sultan ta’ Babilonja għamlu gvernatur fuq l-ibliet ta’ Ġuda, u oqgħod miegħu f’nofs il-poplu, jonkella mur fejn jidhirlek l-aħjar li għandek tmur.” U l-kmandant tal-għases tah l-ikel u rigal, u bagħtu.

⁶U Ġeremija mar għand Gedalija bin Aħikam f’Misfa[85], u baqa’ miegħu f’nofs il-poplu li kien baqa’ fil-pajjiż.

⁷Il-fizzjali tal-eżerċtu li kienu mxerrdin fil-kampanja semgħu, huma u n-nies tagħhom, li s-sultan ta’ Babilonja kien qiegħed lil Gedalija bin Aħikam, gvernatur fuq il-pajjiż, u fdalu f’idejh l-irġiel, in-nisa, it-tfal u l-fqar tal-pajjiż, li ma kinux ħaduhom fl-eżilju f’Babilonja.

⁸U ġew għand Gedalija, f’Mifsa: Ismagħel bin Netanija, u Ġoħanan u Ġonatat ulied Kareħa, u Xeraja bin Tanħumet, u wlied Għefaj in-Netufi, u Ġeżanija bin Magħka, huma u n-nies tagħhom.

⁹U Gedalija bin Aħikam, bin Safan, ħalfilhom, lilhom u lin-nies tagħhom, u qalilhom: “La tibżgħux isservu lill-Kaldin: oqogħdu fil-pajjiż u servu lis-sultan ta’ Babilonja, u jkollkom ir-risq.

¹⁰U jiena qiegħed f’Misfa biex nidher quddiem il-Kaldin li jiġu għandna. U intom, mela, iġbru l-inbid, il-frott u ż-żejt, aħżnuhom fil-ġarar, u oqogħdu fl-ibliet li ħadtu f’idejkom.”

¹¹U l-Lhud kollha li kienu f’Mowab, u fost ulied Għammon, u f’Edom u fl-artijiet l-oħra kollha, semgħu li s-sultan ta’ Babilonja kien ħalla xi fdal f’Ġuda, u li kien qiegħed fuqhom lil Gedalija bin Aħikam, bin Safan.

¹²Dawn il-Lhud kollha reġgħu lura minn kull art li fihom kienu mxerrda, u ġew fl-art ta’ Ġuda, għand Gedalija f’Misfa, u ġabru kotra kbira ta’ nbid u frott.

¹³Ġeħonan bin Kareħa u l-kapijiet tal-eżerċtu, li kienu fil-kampanja, marru għand Gedalija f’Misfa

¹⁴u qalulu: “Għandek tkun taf li Bagħlis, is-sultan ta’ wlied Għammon, bagħat lil Ismagħel bin Netanija, biex joqtlok.” Imma Gedalija bin Aħikam ma emminhomx.

¹⁵Ġeħonan bin Kareħa kellem bil-moħbi lil Gedalija f’Misfa u qallu: “Ħalli mmur u noqtol lil Ismagħel bin Netanija, bla ma ħadd ikun jaf. Għala għandu jneħħilek ħajtek, u hekk jixxerrdu l-Lhud kollha li nġabru madwarek, u jinqered dak li fadal minn Ġuda?”

¹⁶Imma Gedalija bin Aħikam wieġeb lil Ġoħanan bin Kareħa: “La tagħmilx din il-ħaġa għax din hi gidba li qiegħed tgħid fuq Ismagħel.”