Read Maltese Bible with DC – IL-BIBBJA IL-KOTBA MQADDSA ĠEREMIJA 42 Bible Online

ĠEREMIJA 42 - Maltese Bible with DC – IL-BIBBJA IL-KOTBA MQADDSA bible

ĠEREMIJA 42

¹Imbagħad il-fizzjali kollha tal-eżerċtu u Ġoħanan bin Kareħa, Ġeżanija bin Ħosajja u l-poplu kollu, miż-żgħir sal-kbir, resqu lejn

²Ġeremija l-profeta u qalulu: “Ilqa’ t-talba tagħna! Idħol għalina u għal dan il-fdal quddiem il-Mulej, Alla tiegħek, għax, kif tista’ tara b’għajnejk, ftit bqajna mill-kotra li konna.

³Jalla jurina l-Mulej, Alla tiegħek, it-triq li għandna naqbdu, u x’għandna nagħmlu.”

⁴U Ġeremija, il-profeta, qalilhom: “Smajtkom u hawn jien se nitlob lill-Mulej Alla tagħkom kif għedtuli u kulma jweġibkom il-Mulej ngħidulkom; ebda kelma ma naħbilkom.”

⁵U huma qalu lil Ġeremija: “Ħa jkun xhud sinċier u fidil il-Mulej kontrina jekk ma nagħmlux kollox skont ma jibagħtek tgħidilna l-Mulej.

⁶Tajjeb u ħażin, aħna noqogħdu għall-kelma tal-Mulej, Alla tagħna, li għandu qegħdin nibagħtuk, sabiex ikollna r-riżq, għax inkunu smajna minn kelmet il-Mulej, Alla tagħna.”

⁷Meta kienu għaddew għaxart ijiem ġiet il-kelma tal-Mulej lil Ġeremija.

⁸U dan sejjaħ lil Ġoħanan bin Kareħa, u l-fizzjali tal-eżerċtu li kienu miegħu, u l-poplu kollu, mill-kbir saż-żgħir,

⁹u qalilhom: “Dan jgħid il-Mulej, Alla ta’ Iżrael, li intom bgħattuni għandu biex nitolbu għalikom.

¹⁰Jekk intom tibqgħu tgħammru f’dan il-pajjiż, jien nibnikom mill-ġdid u ma nħottkomx; inħawwilkom u ma naqlagħkomx, għax jien indimt mill-ħsara li għamiltilkom.

¹¹La tibżgħux mis-sultan ta’ Babilonja li minnu intom imbeżżgħin. La tibżgħux minnu, oraklu tal-Mulej, għax jien magħkom biex insalvakom u neħliskom minn idejh.

¹²U nqanqlu għall-ħniena lejkom u jħenn għalikom, u jħallikom tgħammru f’artkom.

¹³Imma jekk tgħidu ma ngħammrux f’dan il-pajjiż, u hekk ma tisimgħux minn kliem il-Mulej, Alla tagħkom,

¹⁴u tibdew tgħidu: ‘Le, mmorru fl-art tal-Eġittu fejn ma narawx gwerer, lanqas nisimgħu d-daqq tat-tromba, u ma mmutux bil-ġuħ minħabba nuqqas ta’ ikel, u hemm ngħammru’,

¹⁵issa, mela isimgħu l-kelma tal-Mulej, intom il-fdal ta’ Ġuda: Dan jgħid il-Mulej tal-eżerċti, Alla ta’ Iżrael: ‘Jekk intom tal-fehma soda li tmorru l-Eġittu, u tmorru biex tgħixu hemm,

¹⁶ix-xabla li minnha qegħdin tibżgħu, tilħaqkom hemm fl-art tal-Eġittu, u l-ġuħ li minnu qegħdin titkexkxu jaqbad magħkom hemm fl-Eġittu, u hemm tmutu.

¹⁷In-nies kollha li għandhom il-fehma li jmorru l-Eġittu biex jgħixu hemm, hemm imutu bix-xabla, bil-ġuħ, bil-pesta u ħadd minnhom ma jibqa’ ħaj jew jeħles mill-ħsara li jien inġib fuqhom.’

¹⁸Għax dan jgħid il-Mulej tal-eżerċti, Alla ta’ Iżrael: “Bħalma l-għadab u s-saħna tiegħi ferrajthom fuq in-nies li kienu jgħammru f’Ġerusalemm, hekk is-saħna tiegħi titferragħ fuqkom jekk tmorru l-Eġittu. Intom issiru dagħa u waħx, saħta u għajb, u ma taraw qatt iżjed dan il-post.’

¹⁹“Il-Mulej kellimkom, lilkom il-fdal ta’ Ġuda: ‘La tmorrux l-Eġittu. Intom tafu ben tajjeb li jien xhud kontrikom illum.

²⁰Għax intom lgħabtu b’ħajjitkom meta intom bgħattuni għand il-Mulej Alla tagħkom u għedtuli: ‘Itlob lill-Mulej, Alla tagħna, għalina u kulma jgħid il-Mulej, Alla tagħna, ħabbarhulna u aħna nagħmluh.’

²¹Jien ħabbarthulkom illum, u ma smajtux minn kliem il-Mulej, Alla tagħkom, u minn dak kollu li bagħatni ngħidilkom.

²²Mela issa kunu afu sewwa li bix-xabla, bil-ġuħ u bil-pesta għad tmutu fil-pajjiż, fejn ħsibtu li tmorru tgħixu.”