Read Maltese Bible with DC – IL-BIBBJA IL-KOTBA MQADDSA ĠEREMIJA 46 Bible Online

ĠEREMIJA 46 - Maltese Bible with DC – IL-BIBBJA IL-KOTBA MQADDSA bible

ĠEREMIJA 46

¹Il-Kelma tal-Mulej dwar il-ġnus[94] li ġiet lil Ġeremija l-profeta.

²Għall-Eġittu. Dwar l-eżerċtu tal-Fargħun Neko, sultan tal-Eġittu li kien biswit ix-xmara Ewfrat ħdejn Karkemis[95] u li kissru Nabukodonosor, sultan ta’ Babilonja, fir-raba’ sena ta’ Ġeħojakim bin Ġosija, sultan ta’ Ġuda:

³“Ħejju t-tarka l-kbira u ż-żgħira, u ersqu għat-taqtigħa.

⁴Xiddu ż-żwiemel, u irkbu, intom rikkieba! Ħudu postkom bl-elmu f’raskom, sinnu l-lanez, ilbsu l-kurazzi.

⁵X’qiegħed nara? Reġgħu lura kollha mwerwrin; il-qalbiena tagħhom imkissra, maħruba u mitlufa, ma jħarsux lura, biża’ ma’ kullimkien, oraklu tal-Mulej.

⁶Ma jaħrabx il-ħafif, u l-qalbieni ma jeħlishiex. Lejn it-Tramuntana, ħdejn xatt l-Ewfrat, jitfixklu u jaqgħu.

⁷Min hu tiela’ bħan-Nil, bħal xmajjar ilmijietu mqanqla.

⁸L-Eġittu tiela’ bħan-Nil, b’ilmijietu mqanqla bħal xmajjar, u hu jgħid: ‘Jien nitla’, ngħatti l-art, u neqred il-belt u lil min jgħammar fiha.’

⁹Itilgħu, żwiemel, lebbtu ’l quddiem, imriekeb! Oħorġu, qalbiena! Nies minn Kus u Put, intom li taqbdu t-tarka, nies minn Lud, li tħaddmu l-qaws.

¹⁰Dak il-Jum għal Sidi l-Mulej tal-eżerċti, Jum il-vendetta, ħa jitħallas mill-għedewwa tiegħu. Ix-xabla għad tibla’, għad tixba’ u tisker f’demmhom: tassew sagrifiċċju għal Sidi l-Mulej, fl-inħawi tat-Tramuntana ħdejn ix-xmara Ewfrat.

¹¹Itla’ f’Gilgħad, u ħu l-balzmu, xbejba bint l-Eġittu. Għalxejn tkattar id-dwiet, m’hemmx fejqan għalik.

¹²Il-ġnus semgħu b’għajbek, u l-karba tiegħek dwiet mal-art, għax qalbieni jitfixkel f’qalbieni ieħor, u t-tnejn flimkien jaqgħu fl-art.”

¹³Il-kelma li l-Mulej qal lill-profeta Ġeremija, meta Nabukodonosor, sultan ta’ Babilonja, ġie biex jaħbat għall-art tal-Eġittu[96]:

¹⁴“Ħabbru fl-Eġittu, u semmgħuh f’Migdol, xandruh f’Nof u Taħfanħes. Għidulu: ‘Qum fuq tiegħek u ħejji ruħek, għax ix-xabla qiegħda tibla’ kollox madwarek.

¹⁵Għaliex ħarab Afi[97]? Għaliex il-gendus tiegħek ma waqafx? Għax il-Mulej xeħtu mal-art.

¹⁶Il-kotra tiegħek tfixklet u waqgħet, u bdew jgħidu lil xulxin: ‘Qum, ħa mmorru lura ma’ niesna, u f’art twelidna, ’il bogħod mix-xabla qerrieda.’

¹⁷Agħtu dan l-isem lill-Fargħun, sultan tal-Eġittu: ‘Ħsejjes waħdu, ħalla ż-żmien jgħaddi!’

¹⁸Daqs kemm jien ħaj, oraklu tas-Sultan, Jaħweh tal-eżerċti ismu, bħat-Tabor fost il-muntanji għad jiġi, bħall-Karmel fuq il-baħar.

¹⁹Lesti s-soror għall-eżilju, xbejba, li tgħammar f’bint l-Eġittu[98]. Għax Nof ħerba għad issir, irmied, mingħajr ħadd ma jgħammar fiha.

²⁰Erħa sabiħa l-Eġittu, xidja mit-Tramuntana ġiet fuqu.

²¹Sa l-mikrija li għandu f’nofsu qishom għoġiela għas-simna. Saħansitra huma daru u ħarbu lura, u ma żammewx iebes; għax jum it-telfien waslilhom, is-siegħa ta’ kastighom.

²²Leħnu bħal serp isaffar, għax ġejjin bil-qawwa tal-eżerċtu; bl-imnajjar ġejjin għalih, bħal dawk li jqaċċtu s-siġar.

²³Iqaċċtulu l-masġar tiegħu, oraklu tal-Mulej, għalkemm ma tgħaddix minnu, għax kotrana huma aktar mill-ġradijiet, ma jingħaddux.

²⁴Bint l-Eġittu ġiet fl-għajb, mitluqa f’idejn poplu tat-Tramuntana.”

²⁵Il-kelma tal-Mulej tal-eżerċti, Alla ta’ Iżrael: “Arawni! Jien nikkastiga lil Amon ta’ No[99], l-Eġittu, lill-allat tiegħu u s-slaten tiegħu, u lill-Fargħun, u ’l dawk li jafdaw fih.

²⁶U nerħihom f’idejn dawk li jfittxulhom ħajjithom, u f’idejn Nabukodonosor, sultan ta’ Babilonja, u f’idejn il-qaddejja tiegħu, u wara dan l-Eġittu jitgħammar bħal fi żmien il-qedem, oraklu tal-Mulej.

²⁷“U int la tibżax, Ġakobb, il-qaddej tiegħi; u la titwerwirx, o Iżrael; għax, arani, jien insalvak mill-bogħod, u lil nislek minn art l-eżilju tagħhom. Ġakobb jerġa’ lura u jgħix fil-kwiet, fiż-żgur, bla ħadd ma jbeżżgħu.

²⁸Int, Ġakobb il-qaddej tiegħi, la tibżax, oraklu tal-Mulej, għax miegħek jien; jien neqred il-ġnus kollha, li fosthom jien xerridtek; imma minnek ma nagħmilx qerda; nikkastigak kemm jistħoqqlok, bla kastig għalkollox ma nħallikx.”