Read Maltese Bible with DC – IL-BIBBJA IL-KOTBA MQADDSA ĠEREMIJA 47 Bible Online

ĠEREMIJA 47 - Maltese Bible with DC – IL-BIBBJA IL-KOTBA MQADDSA bible

ĠEREMIJA 47

¹Il-kelma tal-Mulej li ġiet lill-profeta Ġeremija għall-Filistin, qabel ma l-Fargħun kien ħabat għal Gaża[100]:

²“Dan jgħid il-Mulej: Araw, l-ilmijiet telgħin mit-Tramuntana u se jsiru xmara mfawra. Se jgħarrqu l-art u kulma fiha, il-belt u n-nies li jgħixu fiha. Jgħajtu n-nies u jwerżqu, dawk kollha li jgħammru fil-pajjiż.

³Għat-tqawqib taż-żwiemel qawwija tiegħu; għall-ħsejjes kbar tal-karrijiet, u l-irbumbjar tar-roti tiegħu, il-missirijiet ma jdurux lejn uliedhom minħabba t-telqa ta’ jdejhom.

⁴Għax wasal jum il-qerda tal-Filistin ilkoll kemm huma, biex jinqered għal Tir u għal Sidon[101], kull min għad fadal jgħinhom. Għax il-Mulej se jeqred il-Filistin, il-bqija tal-gżira ta’ Kaftor[102].

⁵Qriegħet Gaża, intemmet Askalon. Int Asdod, fdal l-Għanakin, kemm se ddum tqatta’ ġismek?

⁶Ah, ix-xabla tal-Mulej, kemm se ddum ma tieqaf? Erġa’ idħol f’għantek, strieħ u iskot!

⁷Kif tista’ tieqaf jekk jikkmandaha l-Mulej? Askalon u x-xtajta tal-baħar, għal hemm hu bagħatha?