Read Maltese Bible with DC – IL-BIBBJA IL-KOTBA MQADDSA ĠEREMIJA 49 Bible Online

ĠEREMIJA 49 - Maltese Bible with DC – IL-BIBBJA IL-KOTBA MQADDSA bible

ĠEREMIJA 49

¹Għal ulied Għammon[106] dan jgħid il-Mulej: “Ma għandux forsi wliedu Iżrael? Ma għandux forsi werrieta? Mela għaliex Milkom wiret lil Gad, u l-poplu tiegħu jgħammar fi blietu?

²Għalhekk, araw, għad jiġu jiem, oraklu tal-Mulej, meta jien insamma’ l-għajta tal-gwerra għal Rabba ta’ wlied Għammon[107], u ssir borġ ħerba, u blietha n-nar jaħraqhom, u Iżrael jiret lil min kien wirtu, il-kelma tal-Mulej.

³Għajjat, Ħesbon, għax wasal il-qerried! Werżqu, bniet ta’ Rabba. Tħażżmu bix-xkejjer, u ibku, morru ġġerrew b’ġildkom imqatta’. Għax Mikom sejjer fl-eżilju, bil-qassisin u l-kbarat miegħu.

⁴X’int tiftaħar bil-widien għammiela, tfajla infidila! Qalbek qawwija bil-ħażniet tiegħek tgħid: ‘Min se jiġi għalija?’

⁵Arani se nġib fuqek il-biża’, oraklu ta’ Sidi l-Mulej tal-eżerċti, minn kull naħa ta’ madwarek. Isuqukom ’il barra kulħadd għal rasu, u ma jkun hemm ħadd li jiġbor il-maħrubin.

⁶Imma mbagħad irraġġa’ lura x-xorti ta’ wlied Għammon,” oraklu tal-Mulej.

⁷U lil Edom[108] dan jgħid il-Mulej tal-eżerċti: “Forsi m’hemmx aktar għerf f’Teman? Jaqaw għab l-għaqal mid-dehnin? Intemm l-għerf tagħhom?

⁸Aħarbu, erġgħu lura, morru inħbew fil-qiegħ, intom li tgħammru f’Dedan. Għax se nġib fuq Għesaw[109] il-qerda tiegħu fi żmien kastigu.

⁹Jekk l-għassara jiġu għandek, jaqaw ma jħallux xi fdal warajhom? Jekk billejl jiġu l-ħallelin, jaqaw ma jeqirdux biss kemm ikollhom bżonn?

¹⁰Hekk jien innażża’ lil Għesaw, nikxiflu l-moħbiet tiegħu, bla ma jkun jista’ jinħeba. Jinqerdu nislu, u ħutu, u ġirienu, u hu ma jibqax iżjed.

¹¹Ħalli l-iltiema tiegħek, u jien ngħajjixhom u ħalli r-romol tiegħek jafdaw fija.”

¹²Għax dan jgħid il-Mulej: “Araw, jekk dawk li ma kellhomx jixorbu l-kalċi issa jkollhom jixorbuh, jaqaw se tibqa’ int bla kastig? Int ma teħlishiex, għax ikollok tixrob żgur!

¹³Għax jien ħlift bija nnifsi, oraklu tal-Mulej, li Bosra[110] ssir ħerba, għajb, waħx, saħta, u blietha jkunu kollha ħerba għal dejjem.”

¹⁴Jien smajt aħbar mingħand il-Mulej, messaġġ intbagħat lill-ġnus: “Inġabru u morru għaliha u ħejju ruħkom għat-taqtigħa!

¹⁵Arani, se nċekknek fost il-ġnus, nagħmlek għajb fost il-bnedmin.

¹⁶Il-biża’ li kont iġġib qarraq bik, il-kburija ta’ qalbek, int li tgħammar fi xquq il-blat, tixxabbat mal-ogħla qċaċet. Imqar jekk tagħmel il-bejta tiegħek ogħla minn dik tal-ajkla, jien inniżżlek minn hemm, oraklu tal-Mulej.

¹⁷Edom għad issir waħx. Kull min jgħaddi minnha jibqa’ mistagħġeb u bla nifs għall-ġerħiet li ġarrbet.

¹⁸Bħal meta ġġarrfu Sodoma u Gomorra u l-ġirien tagħhom, jgħid il-Mulej, ħadd iżjed ma jgħammar hemm, ebda bniedem ma jmur joqgħod fiha.

¹⁹Ara, bħal iljun tiela’ mill-masġar tal-Ġordan, għall-mergħat dejjiema, hekk f’tebqa t’għajn jiena nħarrbu minnu, u nqiegħed fuqu l-maħtur tiegħi. Għax min hu bħali? Min se jħarrikni? Min hu r-ragħaj li jiqafli?

²⁰Għalhekk isimgħu fehmet il-Mulej, li għamel għal Edom, u l-ħsieb li għandu għal dawk li jgħammru f’Teman. Iva, ikaxkrulhom saż-żgħar tan-nagħaġ tagħhom, ħerba ssirilhom il-mergħa tagħhom.

²¹Titheżżeż l-art għall-ħoss tal-waqgħa tagħhom; sa minn Baħar il-Qasab jinstama’ twerżiqhom.

²²Arawh! Bħal ajkla jitla’ u jittajjar ħafif, għal fuq Bosra jifrex ġwenħajh, u qalb il-qalbenin ta’ Edom dakinhar, bħal qalb mara fil-ħlas issir.”

²³Dwar Damasku: “Imħawda Ħamat u Arfad[111], għax aħbar ħażina semgħu; imqallba bħall-baħar, tqanqlu u m’għandhomx kwiet.

²⁴Infniet Damasku, daret biex taħrab, qabditha r-rogħda; id-diqa u l-uġigħ, bħal mara fil-ħlas ħakmuha.

²⁵Kif telquha, belt it-tifħir, belt l-għaxqa!

²⁶Iż-żgħażagħ tagħha għad jaqgħu mejta fil-pjazez tagħha, u jinqerdu l-gwerriera dakinhar, oraklu tal-Mulej tal-eżerċti.

²⁷Inkebbes in-nar fuq swar Damasku, u l-palazzi ta’ Benħadad[112] jiblagħhom.

²⁸Għal Kedar u s-saltniet ta’ Ħasor, li rebaħhom Nabukodonosor, sultan ta’ Babilonja. Dan jgħid il-Mulej: “Qumu u itilgħu għal Kedar u ħarbtu n-nies tal-Lvant.

²⁹Ħa jeħdulhom l-għerejjex u l-imrieħel tagħhom, ix-xaqaq u tagħmirhom kollu; ħa jaqbdulhom l-iġmla tagħhom. Ħa jgħajtu minħabba fihom: ‘Biża’ minn kullimkien.’

³⁰Aħarbu, morru ’l bogħod, għammru f’qiegħ l-art, intom li tgħammru f’Ħasor!” Oraklu tal-Mulej. Għax Nabukodonosor, sultan ta’ Babilonja, għandu pjan kontrikom, fassal ħsieb kontrikom.

³¹Qumu u itilgħu kontra ġens bi kwietu, li jgħammar fiż-żgur, oraklu tal-Mulej, la għandu bwieb u anqas żbarri, u waħdu jgħammar.

³²U l-iġmla tiegħu jaqbduhom priża, u jeħdulu l-kotra tal-imrieħel tiegħu; u jien inxerred ma’ kull riħ lil dawk li jqarwżu ngħashom, u minn kull naħa l-ħsara nġib fuqhom, oraklu tal-Mulej.

³³Bejta tax-xakalli ssir Ħasor, ħerba għal dejjem. Ħadd ma jgħammar fiha u ebda bniedem ma joqgħod hemm.”

³⁴Il-kelma tal-Mulej li ġiet lil Ġeremija, il-profeta, fuq Għelam[113], fil-bidu tas-saltna ta’ Sedekija, sultan ta’ Ġuda, u qallu:

³⁵Dan jgħid il-Mulej tal-eżerċti: “Arani, se nfarrak qaws Għelam, sies qawwietu.

³⁶U nġib fuq Għelam l-erbat irjieħ mill-erbat itruf tas-sema, u nxerridhom mal-irjieħ kollha, u ma jkunx hemm ġens fejn ma jaslux fih il-maħrubin minn Għelam.

³⁷Jien inwerwer lil Għelam quddiem l-għedewwa tiegħu, u quddiem dawk li jfittxulu ħajtu; u nġib fuqhom il-ħsara, is-saħna tal-korla tiegħi, oraklu tal-Mulej. Nibgħat warajhom ix-xabla sakemm inkun qridthom.

³⁸U jien inqiegħed it-tron tiegħi f’Għelam, u nqaċċat minn hemm is-sultan u l-prinċpijiet, oraklu tal-Mulej.

³⁹U jiġri fl-aħħar jiem, irraġġa’ x-xorti ta’ Għelam, oraklu tal-Mulej.”