Read Maltese Bible with DC – IL-BIBBJA IL-KOTBA MQADDSA ĠEREMIJA 5 Bible Online

ĠEREMIJA 5 - Maltese Bible with DC – IL-BIBBJA IL-KOTBA MQADDSA bible

ĠEREMIJA 5

¹Duru mat-triqat ta’ Ġerusalemm, araw u ifhmu. Fittxu fl-imsieraħ tagħha, araw jekk issibux bniedem, jekk hemmx min jagħmel is-sewwa, li jfittex li jkun fidil, u jien naħfrilha.

²Imqar jekk jgħidu: “Daqskemm hu ħaj il-Mulej,” xorta waħda jaħilfu fil-falz.

³O Mulej, jaqaw għajnejk mhux is-sewwa jfittxu? Iva sawwatthom u ma ħassew xejn; fnejthom u t-tagħlima ma ħaduhiex. Webbsu wiċċhom aktar mill-blat, u ma riedu jerġgħu lura b’xejn.

⁴U jiena ħsibt: ‘Huma l-baxxi biss li tbellhu, għax ma għarfux triq il-Mulej, id-dritt ta’ Alla tagħhom.

⁵Ħa ndur lejn l-għoljin u nkellem lilhom. Għax huma jafu triq il-Mulej, id-dritt ta’ Alla tagħhom.’ Imma huma lkoll kissru l-madmad, qattgħu l-irbit.

⁶Għalhekk jidrobhom l-iljun mill-foresta; jeqridhom il-lupu mid-deżert; jissajjalhom il-ljupard madwar bliethom, lil kull min joħroġ minnhom jiżbranah; għax kotru żżejjed dnubiethom, u rashom webbsu fit-tixwix tagħhom.

⁷“Għax għandi naħfirlek dan? Telquni wliedek, u bdew jaħilfu b’min mhux Alla. Tmajthom u żnew, u bi ħġarhom marru f’dar iż-żienja.

⁸Saru bħal fħal mitmugħa u mlebilba, kulħadd jingħi għal mart għajru.

⁹Għal dan kollu ma nikkastigahomx? Oraklu tal-Mulej. Minn poplu bħal dan ma nitħallasx?

¹⁰Itilgħu għall-indani tagħha, ħarbtuhom, iżda mhux għalkollox; aqilgħu ż-żraġen tagħha, għax mhumiex tal-Mulej.

¹¹Għax qamu bil-kbir kontrija, dar Iżrael u dar Ġuda,” oraklu tal-Mulej.

¹²Gibbdu lill-Mulej u qalu: “Mhu xejn! Ebda ħsara ma tilħaqna, xabla u ġuħ ma narawhomx.”

¹³Riħ huma l-profeti, kelma fihom m’hemmx. Dan għad jiġrilhom!”

¹⁴Għalhekk dan jgħid il-Mulej, Alla tal-eżerċti: “Talli għedtu dal-kliem, arani, se nagħmel nar minn kelmti fuq xufftejk, u minn dan il-poplu l-ħatab biex jikkunsmah.

¹⁵Arawni, se nġib fuqkom, Dar Iżrael, ġens mill-bogħod, oraklu tal-Mulej, ġens li jibqa’, ġens li ilu, ġens li int ma tafx ilsienu, u ma tifhimx li jgħid.

¹⁶Qabar miftuħ il-barżakka tiegħu, kollu nies qalbiena.

¹⁷U jikollok il-ħsad u l-ħobż, jikollok is-subien u l-bniet, jikollok l-imrieħel u l-baqar jikollok id-dwieli u t-tin. Jeqirdulek bix-xabla l-ibliet imdawra li fihom int qegħedt tamietek.

¹⁸“Imma lanqas f’dawk il-jiem, oraklu tal-Mulej, ma neqridkom għalkollox.

¹⁹U meta jistaqsu: ‘Għaliex il-Mulej Alla tagħna għamlilna dan kollu,’ int tweġibhom: ‘Bħalma intom tlaqtuni u qdejtu allat barranin f’artkom, hekk issa intom taqdu l-barranin f’art mhijiex tagħkom.’ ”

²⁰Ħabbru dan f’dar Ġakobb, u semmgħuh f’Ġuda, u għidu:

²¹“Isimgħu dan, ja poplu iblah u bla moħħ! Għandhom għajnejn u ma jarawx; għandhom widnejn u ma jisimgħux.

²²Ma tibżgħux minni, oraklu tal-Mulej, ma titregħdux quddiem wiċċi? Jien li għamilt ir-ramel b’tarf il-baħar, barriera għal dejjem li ma jaqbiżhiex; jitqanqlu l-imwieġ bla ma jegħlbuha u jgargru l-ħalel bla ma jaqbżuha.

²³Imma dan poplu stinat, ma jismax, tawni daharhom u telquni.

²⁴Ma qalux f’qalbhom: ‘Ħa nibżgħu mill-Mulej, Alla tagħna, li jagħtina x-xita f’waqtha, l-ewwel xita u dik tal-aħħar; li waqqfilna l-ġimgħat tal-ħsad[21] u ħarishomlna.’

²⁵Dan kollu begħduhulkom dnubietkom, ħżunijietkom ċaħħdukom minn dan il-ġid.

²⁶Għax hemm il-ħżiena fost il-poplu tiegħi, jissajjaw bħal nassab, u jqiegħdu n-nassa u n-nies jaqbdu.

²⁷Bħal qafas bl-għasafar mimli, hekk djarhom mimlija serq. Għalhekk kibru u stagħnew;

²⁸simnu u tlibbsu sabiħ. Issa għamlu ż-żejjed ħażen; ma jagħmlux il-ħaqq, id-dritt tal-iltim jisħqu, u l-kawża tal-fqar ma jaqtgħux.

²⁹U għal dan kollu ma nikkastigahomx? Oraklu tal-Mulej. U minn poplu bħal dan ma nitħallasx?

³⁰Ħwejjeġ li jkexkxu u jwerwru ġraw fil-pajjiż:

³¹Il-profeti jħabbru l-gideb, u l-qassisin imexxu skont kapriċċihom, u l-poplu tiegħi hekk iħobb! X’se tagħmlu meta t-tmiem jasal?