Read Maltese Bible with DC – IL-BIBBJA IL-KOTBA MQADDSA ĠEREMIJA 50 Bible Online

ĠEREMIJA 50 - Maltese Bible with DC – IL-BIBBJA IL-KOTBA MQADDSA bible

ĠEREMIJA 50

¹Il-kelma li qal il-Mulej għal Babilonja[114] u art il-Kaldin permezz tal-profeta Ġeremija:

²“Ħabbru lill-ġnus u xandru, għollu stendard u xandru, taħbu xejn imma għidu: ‘Babilonja ttieħdet, Bel[115] mistħi, Merodak imħawwad, allatha mistħija; l-idoli tagħha mkissra.’

³Għax tiela’ għaliha poplu mit-Tramuntana, u minn artha jagħmel ħerba. Ma jkun hemm ħadd jgħammar fiha; bnedmin u bhejjem telqu u ħarbu.

⁴F’dawk il-jiem u f’dak il-waqt, oraklu tal-Mulej, ulied Iżrael flimkien ma’ wlied Ġuda jibku huma u ġejjin, għad jiġu jfittxu lill-Mulej Alla tagħhom.

⁵Għal Sijon jistaqsu, lejha jdawru wiċċhom: “Ejjew nintrabtu mal-Mulej b’patt għal dejjem ma jintesa qatt.’

⁶Merħla nagħaġ mitlufa l-poplu tiegħi; ħarġuhom mit-triq ir-rgħajja tagħhom; irħewlhom jiġġerrew fuq l-għoljiet, minn muntanja għal għolja dejjem sejrin, sa nsew il-maqjel tagħhom.

⁷Kien jiblagħhom kull min kien isibhom, l-għedewwa tagħhom kienu jgħidu: ‘Aħna ma naħtu xejn għax huma dinbu kontra l-Mulej. Mergħa tas-sewwa l-Mulej, u t-tama ta’ missirijiethom.’

⁸Aħarbu minn nofs Babilonja, mill-art tal-Kaldin, oħorġu u kunu bħall-bdabad f’ras il-merħla.

⁹Għax, arani, se nqajjem u ntella’ għal Babilonja ġemgħa ta’ ġnus kbar mill-art tat-Tramuntana; dawn jitqassmu kontra tagħha, minn hemm jaħtfuha, il-vleġeġ tagħhom bħal ta’ gwerrier tas-sengħa, li qatt ma jerġa’ lura idu f’idu.

¹⁰U tkun il-kadilja priża, u jixbgħu dawk li jisirquha, oraklu tal-Mulej.

¹¹Ifirħu! Aqbżu bil-ferħ! Intom li sraqtu ’l wirti. Iva! Aqbżu bħal għoġol fuq il-mergħa, u iżhru bħal fħal.

¹²Imma ommkom waqgħet f’mistħija kbira, dik li wilditkom waqqgħuha fl-għajb. Arawha, ġiet l-aħħar fost il-ġnus, saret deżert, art niexfa u xagħra.

¹³Minħabba l-għadab tal-Mulej, ħadd ma jgħammar fiha; kollha kemm hi tkun ħerba. Kull min jgħaddi minn ħdejn Babilonja, jibqa’ mistagħġeb u bla nifs għall-ġerħiet li ġarrbet.

¹⁴Tqassmu kontra Babilonja dawramejt, intom ilkoll li tiġbdu l-qaws. Waddbulha l-vleġeġ; tibżgħux għalihom, għax dinbet kontra l-Mulej.

¹⁵Għajtu kontriha minn kull naħa, refgħet idejha, waqgħu torrijietha, ġġarrfu ħitanha. Tassew, il-Mulej qed jitħallas minnha, tħallsu minnha, bħalma għamlet hi, agħmlu lilha.

¹⁶Eqirdu minn Babilonja lil min jiżra’, lil min jaqbad il-minġel fi żmien il-ħsad. Minn quddiem ix-xabla qattiela, idur kull wieħed lejn il-poplu tiegħu, u kulħadd jaħrab lejn artu.

¹⁷Nagħġa mitlufa kien Iżrael, bl-iljuni jiġru warajha. L-ewwel belagħha s-sultan tal-Assirja; imbagħad Nabukodonosor, sultan ta’ Babilonja, gerrmilha għadamha.”

¹⁸Għalhekk dan jgħid il-Mulej tal-eżerċti, Alla ta’ Iżrael: “Arani, se nikkastiga s-sultan ta’ Babilonja u ’l artu, bħalma kkastigajt is-sultan tal-Assirja.

¹⁹Imma rraġġa’ lura ’l Iżrael lejn meragħtu. Għad jirgħa fuq il-Karmel u f’Basan, u fuq il-muntanji ta’ Efrajm u Gilgħad għad jixba’.

²⁰F’dawk il-jiem u f’dak iż-żmien, oralu tal-Mulej, ifittxu l-ħażen ta’ Iżrael, u ma jsibuhx, u d-dnubiet ta’ Ġuda, u ma jsibuhomx, għax jien naħfer lil min inħalli ħaj.

²¹Itla’ għall-art ta’ Meratajm, għaliha u għal min jgħammar f’Fekod[116]. Oqtol u eqred li jibqa’, oraklu tal-Mulej, u agħmel kulma ordnajtlek.

²²Ħsejjes ta’ gwerra fil-pajjiż, u qerda kbira.

²³Kif tkisser u tfarrak il-martell tal-art kollha! Kif saret waħx Babilonja fost il-ġnus!

²⁴Insabtlek, u int inqbadt, Babilonja, u int ma ntbaħtx. Sibtek u qbadtek, għax int ħadtha kontra l-Mulej.

²⁵Il-Mulej fetaħ il-maħżen tiegħu, u ħareġ l-armi tal-korla tiegħu, għax għandu x’jagħmel il-Mulej f’art il-Kaldin.

²⁶Ejjew għaliha minn truf l-art, u iftħu mħażen qmuħha. Geddsu kollox bħal munzell, u eqirdu kollox, li minnha ma jibqa’ xejn.

²⁷Oqtlu l-gniedes kollha, ħa jinżlu għall-biċċerija. Gwaj għalihom, għax waslilhom il-Jum, żmien il-kastig.

²⁸Isma’! Il-maħrubin u l-meħlusin minn art Babilonja, marru jħabbru f’Sijon il-vendetta tal-Mulej, Alla tagħna, il-vendetta għat-tempju tiegħu.

²⁹Sejħu l-arċieri kontra Babilonja, lil dawk kollha li jiġbdu l-qaws; waqqfu l-kamp madwarha, biex ħadd ma jeħles minnha. Ħallsuha skont ma għamlet, għamlulha skont għemilha. Għax iżżarġnet kontra l-Mulej; kontra l-Qaddis ta’ Iżrael.

³⁰Għalhekk jaqgħu ż-żgħażagħ tagħha mejta fil-pjazez tagħha, u jintemmu l-gwerriera dakinhar, oraklu tal-Mulej.

³¹Arani, wieqaf quddiemek, ja mżarġna, oraklu ta’ Sidi l-Mulej tal-eżerċti. Wasal il-Jum tiegħek, żmien kastigek.

³²U l-imżarġna togħtor u titgerbeb, u ma jkunx hemm min iqajjimha. Nagħti n-nar lil blietha, u jibla’ l-inħawi kollha ta’ madwarha.

³³Dan jgħid il-Mulej tal-eżerċti: ‘Imgħakksin ulied Iżrael, u wlied Ġuda magħhom. Dawk kollha li ħaduhom fl-eżilju, jgħassu fuqhom, ma jridux jitilquhom.’

³⁴Imma l-Feddej tagħhom b’saħħtu, Jaħweh tal-eżerċti jismu. Jiddefendi l-kawża tagħhom, biex jikkwieta d-dinja, imma jħawwad in-nies ta’ Babilonja.

³⁵Xabla għal fuq il-Kaldin, oraklu tal-Mulej, u għal fuq in-nies ta’ Babilonja; u għal fuq il-prinċpijiet u l-għorrief tagħha.

³⁶Xabla għal fuq dawk li jeħbru ħalli jiġġennu. Xabla għal fuq il-gwerriera tagħha, ħalli jitwerwru.

³⁷Xabla għal fuq iż-żwiemel u l-imriekeb tagħha; u għal fuq il-poplu mħallat li hemm f’nofsha; ħa jsiru bħan-nisa. Xabla għal fuq l-imħażen tagħha, ħa jisirquhom.

³⁸Xabla għal fuq l-ilmijiet ħalli jinxfu. Għax art l-idoli hi, u jiftaħru bil-babaw.

³⁹Għalhekk għad jgħammru fiha l-bhejjem tax-xagħri u x-xakalli, u hemm joqogħdu n-ngħam. Qatt iżjed ma tkun mgħammra, u aktar fiha ma joqgħod ħadd, minn żmien għal żmien.

⁴⁰Bħal meta Alla qered lil Sodoma u lil Gomorra, u l-ibliet tal-qrib, oraklu tal-Mulej, hekk ħadd iżjed ma jgħammar hemm, u ebda bniedem ma joqgħod fiha.

⁴¹Araw, poplu ġej mit-Tramuntana, ġens kbir u kotra slaten jitqanqlu minn truf id-dinja.

⁴²Il-qaws u l-vleġeġ jaqbdu; kiefra, nies bla ħniena, għajjathom ikarwat bħall-baħar, u ż-żwiemel jirkbu. Lesti bħal bniedem wieħed għat-taqtigħa, għalik, bint Babilonja!

⁴³Sama’ s-sultan ta’ Babilonja b’aħbarhom, u ntelqu idejh, qabditu d-diqa, l-uġigħ ta’ mara fil-ħlas.

⁴⁴Arah, bħal iljun tiela’ mill-masġar tal-Ġordan, għall-mergħat dejjiema, hekk f’tebqa t’għajn jiena nħarrbu minnu, u nqiegħed fuqu l-maħtur tiegħi. Għax min hu bħali? Min se jħarrikni? Min hu r-ragħaj li se jiqafli?

⁴⁵Għalhekk isimgħu fehmet il-Mulej li għamel għal Babilonja, u l-ħsieb li għandu għal dawk li jgħammru f’art il-Kaldin. Iva, ikaxkrulhom iż-żgħar tan-nagħaġ tagħhom. Iva, ħerba ssirilhom mergħathom.

⁴⁶Titheżżeż l-art mal-ħoss tal-waqgħa ta’ Babilonja, u l-għajta tagħha tinstama’ fost il-ġnus.”