Read Maltese Bible with DC – IL-BIBBJA IL-KOTBA MQADDSA ĠEREMIJA 51 Bible Online

ĠEREMIJA 51 - Maltese Bible with DC – IL-BIBBJA IL-KOTBA MQADDSA bible

ĠEREMIJA 51

¹Dan jgħid il-Mulej: “Arani, se nqajjem kontra Babilonja u kontra n-nies tal-Kaldija[117], riħ qerried.

²Nibgħat f’Babilonja nies derrejja; iderruha u jneżżgħulha artha, għax jinżlu għaliha minn kull naħa f’jum il-ħsara.

³Ma jiġbidx l-arċier il-qaws, ma jiżżarġanx bil-kurazza tiegħu! Taħfruhiex liż-żgħażagħ tagħha, eqirdulha l-eżerċtu kollu tagħha.

⁴Ħa jaqgħu mejta n-nies f’art il-Kaldin, u miġruħin fit-toroq tagħha.

⁵Imma Iżrael mhijiex xi armla, anqas Ġuda, mhija mitluqa minn Alla tagħhom, il-Mulej tal-eżerċti, minkejja li arthom mimlija dnubiet kontra l-Qaddis ta’ Iżrael.

⁶Aħarbu minn nofs Babilonja, u jaħseb kulħadd għal ħajtu. La tinqerdux minħabba ħżunitha; għax hu żmien il-vendetta għall-Mulej, se jroddilha kulma ħaqqha,

⁷Kalċi tad-deheb kienet Babilonja f’id il-Mulej, u bih sakkar l-art kollha. Il-ġnus xorbu minn inbidha, u għalhekk bliehu l-ġnus.

⁸Għal għarrieda waqgħet Babilonja, tfarrket. Ibkuha! Ġibu l-balzmu għall-uġigħ tagħha, għandha mnejn tfiq.

⁹Konna nfejquha ’l Babilonja, imma hija ma fiqitx. Ħalluha, immorru kulħadd lejn artu, għax il-ħaqq tagħha laħaq sas-sema, u għola sa ġos-sħab.

¹⁰Għax il-Mulej ħareġ is-sewwa tagħna għad-dawl. Ejjew u nxandru f’Sijon, għemil il-Mulej Alla tagħna.”

¹¹“Sinnu l-vleġeġ! Imlew il-barżakki! Għax il-Mulej qajjem ruħ is-slaten tal-Medja[118], għamel il-ħsieb li ’l Babilonja jfarrakha; għax din hi l-vendetta tal-Mulej, il-vendetta għat-tempju tiegħu.

¹²Biswit il-ħitan ta’ Babilonja għollu l-istendard, saħħu l-għases, qiegħdu l-għassiesa, onsbu n-nases. Għax dak li l-Mulej ħaseb, dak għamel, dak li kien qal għan-nies ta’ Babilonja.

¹³Int li toqgħod ħdejn il-gliegel tal-ilma, li għandek teżori kbar, wasal tmiemek, waslet għall-qtugħ il-medda tiegħek.

¹⁴Il-Mulej tal-eżerċti ħalef bih innifsu: ‘Nimliek bin-nies kotrana bħal ġradijiet, u jgħollu kontrik l-għajta tar-rebħa.’

¹⁵Għamel l-art bil-ħila tiegħu; issoda d-dinja bl-għerf tiegħu, u bid-dehen tiegħu firex is-smewwiet.

¹⁶Mal-ħoss ta’ leħnu, jitqanqlu l-ilmijiet tas-sema, u jtella’ s-sħab minn truf l-art; jagħmel il-beraq għax-xita, u mill-imħażen tiegħu joħroġ l-irjieħ.

¹⁷Iblah il-bniedem u bla għerf; l-arġentier jistħi għall-idolu tiegħu. Għax gidba x-xbieha mdewba, ma fiha ebda ruħ.

¹⁸Frugħat huma u xogħol taċ-ċajt; f’jum kastighom jintemmu lkoll.

¹⁹Mhux bħalhom sehem Ġakobb, għax hu għamel kulma hu. Iżrael hu t-tribù tal-wirt tiegħu, Jaħweh tal-eżerċti jismu.

²⁰Il-martell kont int għalija, l-għodda tal-gwerra. Bik kissirt il-ġnus; bik ħarbatt is-saltniet;

²¹bik kissirt iż-żiemel u r-rikkieb; bik kissirt il-mirkeb u s-sewwieq,

²²bik kissirt ir-raġel u l-mara; bik kissirt ix-xiħ u t-tifel; bik kissirt iż-żagħżugħ u x-xebba;

²³bik kissirt ir-ragħaj u l-merħla; bik kissirt il-bidwi u l-gniedes; bik kissirt gvernaturi u kmandanti.

²⁴Lil Babilonja taħt għajnejkom inħallasha, lilha u n-nies kollha tal-Kaldija, għad-deni kollu li għamlu lil Sijon, oraklu tal-Mulej.

²⁵Arani kontrik, muntanja qerrieda, oraklu tal-Mulej, li qridt l-art kollha. Jien immidd idejja għal fuqek, u ngerbek minn fuq il-blat, u nagħmel minnek muntanja nar.

²⁶U minnek ma jiħdux la l-ġebla tax-xewka, u anqas ħaġar għas-sisien. Għax issir ħerba għal dejjem, oraklu tal-Mulej.

²⁷Għollu stendard fuq l-art, doqqu l-kornu fost il-ġnus. Lestu l-ġnus għaliha, sejħu s-saltniet kontriha: Ararat, Minni u Askenaż[119]. Ibagħtu kontriha l-kittieba tal-eżerċti, tellgħu ż-żwiemel bħal ġradijiet bix-xwiek.

²⁸Ħejju l-ġnus għaliha, is-slaten tal-Medja, bil-gvernaturi u l-maġistrati tagħhom bl-art kollha taħt ħakmithom.

²⁹Titkexkex l-art u titriegħed, għax iseħħ ħsieb il-Mulej għal Babilonja, li jagħmel ħerba minn art Babilonja, u ħadd iżjed ma jgħammar fiha.

³⁰Waqfu mill-ġlied il-qalbenin ta’ Babilonja, u baqgħu fil-fortizzi; naqsithom il-qlubija u saru qishom nisa. Id-djar tagħha tawhom in-nar, tkissru l-iżbarri tagħha.

³¹Kurrier jiġri wara kurrier, messaġġier biex jilħaq messaġġier ieħor, biex jgħarraf lis-sultan ta’ Babilonja, li beltu ttieħdet minn kullimkien.

³²Il-mogħdijiet inqabdu, u l-fortizzi tawhom in-nar, u l-gwerriera tilfu rashom.

³³Għax dan jgħid il-Mulej tal-eżerċti, Alla ta’ Iżrael: ‘Bint Babilonja qisha l-qiegħa fi żmien id-dris tagħha. Ftit ieħor u jaslilha jum il-ħsad.’

³⁴“Belagħni, ġiebni fix-xejn, Nabukodonosor, sultan ta’ Babilonja; għamel minni ġarra fiergħa. Belagħni bħal dragun, żaqqu mela bl-aħjar li kelli, u mbagħad irmieni ’l barra.

³⁵‘Ħa tilħaq ’il Babilonja l-moħqrija li laħqet lili u ’l qrabati,’ jgħidu n-nies li jgħammru f’Sijon. ‘Ħa jaqa’ demmi fuq in-nies, li jgħammru fil-Kaldija,’ tgħid Ġerusalemm.

³⁶Għalhekk dan jgħid il-Mulej: “Arani, se niddefendi l-kawża tiegħek, u nitħallas għalik. Innixxef il-baħar tagħha, u nqaxqxilha l-għejun tagħha.

³⁷Babilonja ssir borġ ħerba, bejta għax-xakalli, waħx u tmaqdir, għax ħadd ma jkollha jgħammar fiha,

³⁸Ilkoll flimkien jgħajtu bħal iljuni, bħal frieħ ta’ ljuni jgargru.

³⁹Meta jkunu fis-sħana nħejjilhom festa, insakkarhom sakemm jistordu, u jorqdu raqda għal dejjem, bla ma qatt iżjed jistenbħu, oraklu tal-Mulej.

⁴⁰Inniżżilhom bħall-ħrief għall-qatla bħall-bdabad u l-imtaten.

⁴¹Kif inħatfet Sesak, u ntrebħet il-foħrija tad-dinja! Kif saret Babilonja waħx fost il-popli!

⁴²Babilonja tela’ l-baħar għaliha! u għerqet taħt il-qawwa tal-ħalel tiegħu.

⁴³Blietha saru ħerba, art niexfa u xagħra, u ħadd ma jgħammar fihom, u ebda bniedem ma jgħaddi minnhom.

⁴⁴Jien nikkastiga ’l Bel f’Babilonja, noħroġlu minn ħalqu kulma bela’; il-ġnus ma jiġrux aktar lejh. Sas-swar ukoll ta’ Babilonja ġġarrfu.

⁴⁵Oħorġu minn nofsha, poplu tiegħi! Ħa jsalva kull wieħed ħajtu minn qillet il-korla tal-Mulej.

⁴⁶Taqtgħux qalbkom u la tibżgħux bl-aħbar li xterdet fil-pajjiż. Is-sena tasal aħbar, u oħra s-sena ta’ wara. Moħqrija jkun hawn fl-art, u tirann kontra tirann.

⁴⁷Għalhekk għad jiġi żmien, meta jien niġi nżur l-idoli ta’ Babilonja; u l-pajjiż kollu tagħha għad jistħi, u l-midrubin kollha jaqgħu mejta f’nofsha.

⁴⁸U għad jgħajtu bil-ferħ għal Babilonja s-sema u l-art u kulma fihom, għax mit-Tramuntana għad jiġu għaliha l-qerrieda, oraklu tal-Mulej.

⁴⁹Babilonja wkoll għad taqa’, minħabba l-midrubin ta’ Iżrael; bħalma waqgħu għal Babilonja l-midrubin tad-dinja kollha.

⁵⁰Intom li ħlistuha mix-xabla, itilqu, la tiqfux. Ftakru fil-Mulej mill-bogħod, u ħallu ’l Ġerusalemm tfeġġ f’qalbkom.

⁵¹Tħawwadna bl-għajb li smajna, wiċċna nkesa bil-mistħija, għax daħlu l-barranin fis-santwarju ta’ dar il-Mulej.

⁵²Għalhekk, araw, għad jiġu jiem, oraklu tal-Mulej, u jien nagħmel ħaqq mill-idoli tagħha, u f’artha kollha jokorbu l-midrubin.

⁵³Imqar jekk Babilonja togħla sas-smewwiet, u ssaħħaħ l-għoli ta’ qawwietha mingħandi jaslulha l-qerrieda, oraklu tal-Mulej.

⁵⁴Isimgħu! Twerżiq u għajjat minn Babilonja, tkissir kbir minn art il-Kaldin!

⁵⁵Għax il-Mulej qiegħed iħarbat lil Babilonja, u jsikket l-għajjat kbir tagħha. Igargru l-ħalel tagħhom bħal ilmijiet kotrana u jidwu l-ħsejjes tagħhom ma’ kullimkien.

⁵⁶Għax wasal fuq Babilonja l-qerried; qabduhom il-qalbiena tagħha, u tkissru l-qwies tagħhom. Għax Alla li jħallsu hu l-Mulej, u jħallas fuq li jħallas.

⁵⁷Insakkar il-prinċpijiet u l-għorrief tagħha, il-gvernaturi, il-kmandanti u l-gwerriera tagħha; jorqdu raqda għal dejjem u ma jistenbħu qatt minnha aktar, oraklu tas-Sultan, Jaħweh tal-eżerċti ismu.

⁵⁸Dan jgħid il-Mulej tal-eżerċti: “Is-sur wiesa’ ta’ Babilonja jiġġarraf sal-qiegħ, u bibienha l-għolja n-nar jaħraqhom. Għax-xejn jitħabtu l-ġnus, u l-popli jinfnew għan-nar.

⁵⁹Dan hu l-messaġġ li ta Ġeremija, il-profeta, lil Xeraja bin Nerija[120], bin Maħseja, meta dan mar Babilonja ma’ Sedekija, sultan ta’ Ġuda, fir-raba’ sena tas-saltna tiegħu. Xeraja kien l-uffiċjal li kien ħa ħsieb l-alloġġi.

⁶⁰Ġeremija kiteb fi ktieb wieħed il-ħsara kollha li kellha taqa’ fuq Babilonja: dan il-kliem kollu miktub kontra Babilonja.

⁶¹U Ġeremija qal lil Xeraja: “Meta tasal Babilonja qis li taqra dan il-kliem kollu

⁶²u għid: ‘Mulej, int għedt li trid teqred dan il-pajjiż u ma jkun hemm ħadd li jgħammar fih, u la nies u lanqas bhejjem, imma jkun ħerba għal dejjem.’

⁶³Meta tispiċċa taqra dan il-ktieb orbotlu ġebla miegħu u waddbu f’nofs l-Ewfrat

⁶⁴u għid: ‘Hekk għad tegħreq Babilonja u ma tqum qatt iżjed minħabba l-ħsara li jien inkun ġibt fuqha.’ ” Sa hawn kliem Ġeremija.