Read Maltese Bible with DC – IL-BIBBJA IL-KOTBA MQADDSA ĠEREMIJA 6 Bible Online

ĠEREMIJA 6 - Maltese Bible with DC – IL-BIBBJA IL-KOTBA MQADDSA bible

ĠEREMIJA 6

¹Oħorġu għall-kenn lil ulied Benjamin, minn nofs Ġerusalemm! Doqqu t-tromba f’Tekugħa, u fuq Bet-kerem tellgħu sinjal, għax ġejja l-ħsara mit-Tramuntana, u l-qerda kbira riesqa.

²Neqridha ’l Bint Sijon, ix-xbejba mħejma u sabiħa.

³Jiġu r-rgħajja[22] għaliha bl-imrieħel tagħhom; kontriha jwaqqfu l-għerejjex dawramejt, kull wieħed jirgħa fil-qasam tiegħu.

⁴“Tħejju għall-battalja kontriha, qumu u nitilgħu f’nofsinhar. Jaħasra għalina, il-jum riesaq lejn tmiemu; u d-dellijiet ta’ filgħaxija twalu.

⁵Qumu u nitilgħu billejl u neqirdulha l-palazzi!”

⁶Għax dan jgħid il-Mulej tal-eżerċti: “Qaċċtu s-siġar tagħha; tellgħu ħajt madwar Ġerusalemm. Din il-belt mogħtija għall-kastig; fiha m’hemmx ħlief moħqrija.

⁷Bħalma bir ifawwar ilmijietu, hekk hi tfawwar ħżunietha. Ma tismax fiha ħlief: ‘Vjolenza u moħqrija quddiemi ma nilmaħx ħlief mard u ġrieħi.’

⁸Tgħallem Ġerusalemm, li ma tmurx qalbi titbiegħed minnek; li ma nagħmilx minnek ħerba, art li ma jgħammar fiha ħadd.”

⁹Dan jgħid il-Mulej tal-eżerċti: “Laqqtu, laqqtu bħallikieku minn dielja, il-fdal ta’ Iżrael, midd idejk fuq il-friegħi bħal min jiġbor l-għeneb.”

¹⁰Lil min se nkellem? Lil min inwiddeb li jismagħni? Bla ħtin widnejhom, u ma jistgħux jisimgħu. Araw, il-kelma tal-Mulej żebliħ għalihom, gost biha ma jeħdux!

¹¹Jien nixgħel b’għadab il-Mulej, ma niflaħx aktar! “Ferrgħu fuq it-tfal fit-triq, u fuq iż-żgħażagħ miġbura flimkien, għax ir-raġel u l-mara jinħatfu f’salt, ix-xiħ u l-mimli bl-għomor.

¹²U djarhom jaqgħu f’idejn il-barranin bir-raba’ u n-nisa tagħhom f’daqqa. Għax immidd idejja fuq in-nies ta’ dal-pajjiż,” oraklu tal-Mulej.

¹³Miż-żgħir sal-kbir, ilkoll ħsiebhom fis-serq, mill-profeta sal-qassis, ilkoll mogħtija għall-qerq.

¹⁴U jippretendu li jdewwu l-ġerħa[23] tal-poplu tiegħi bħallikieku xejn u jgħidu: “Sliem, Sliem” u mhuwa sliem xejn.

¹⁵Forsi stħaw meta għamlu l-qżiżijiet? Ma stħaw xejn; lanqas biss jafu jiħmaru. Għalhekk għad jaqgħu ma’ dawk li diġà waqgħu, jiġġarrfu f’jum kastighom, jgħid il-Mulej.

¹⁶Dan jgħid il-Mulej: “Ieqfu fit-toroq u ħarsu, staqsu għall-mogħdijiet ta’ dari[24], fejn hi t-triq it-tajba u aqbdu lilha, u hekk issibu l-mistrieħ għal ruħkom!” Imma huma wieġbu: ‘Fiha ma nimxux.’

¹⁷Jien qegħedt fuqhom l-għassies[25] u għedtilhom: Agħtu widen għal leħen it-tromba.’ U huma wieġbu: ‘Ma rridux nagħtu widen.’

¹⁸Għalhekk ħa jisimgħu l-ġnus, u tifhem il-ġemgħa x’se jiġri fosthom.

¹⁹Isma’, art! Arani, se nġib fuq dan il-poplu ħsara, frott ta’ fehmiethom. Għax ma tawx widen għal kliemi u l-liġi tiegħi ċaħduha.

²⁰X’jiswieli l-inċens ġej minn Saba? U l-kannella tfuħ minn art imbiegħda? Is-sagrifiċċji tal-ħruq tagħkom ma jogħġbunix, u l-vittmi tagħkom ma jgħaxxqunix.

²¹Għalhekk dan jgħid il-Mulej: ‘Arawni: jien se nqiegħed it-tfixkil għal dan il-poplu, biex fih jitfixklu żgur, il-missirijiet u wliedhom flimkien, il-ġar u sieħbu jinqerdu.’

²²Dan jgħid il-Mulej. Araw! għad jiġi poplu mit-Tramuntana, u ġens kbir jitqanqal minn truf l-art.

²³Il-qaws u l-lanza jaqbdu, qalila u bla ħniena huma; ħosshom ikarwat bħal baħar, riekba fuq iż-żwiemel, lesti għat-taqtigħa kontrik, Bint Sijon.

²⁴Smajna bil-fama tagħhom, u idejna ntelqu, u qabditna d-diqa, u l-uġigħ ta’ mara fil-ħlas.

²⁵Toħorġux fir-raba’, tmorrux fit-triq, għax hemm ix-xabla tal-għadu, u t-twerwir ma’ kullimkien.

²⁶Bint il-poplu tiegħi, ilbes ix-xkora, u tqalleb fl-irmied. Agħmel il-luttu bħallikieku għal iben waħdieni, ibki bl-imrar; għax għal għarrieda fuqna ġej il-qerried.

²⁷Jien qegħedtlek bħal ġarrab fost il-poplu tiegħi, biex int tistħarreġ u ġġarrab imġibthom,

²⁸ilkoll kemm huma ribelli fuq li ribelli, mhux ħlief ixerrdu l-qlajja’. Ram u ħadid, ilkoll imħassra.

²⁹Jonfoħ bil-qawwa l-minfaħ, u r-ram jintemm bin-nar; xejn ma jiswa t-tidwib, il-ħżiena ma tnaqqewx.

³⁰‘Fidda mormija’ jsejħulhom, għax irmiehom il-Mulej.