Read Maltese Bible with DC – IL-BIBBJA IL-KOTBA MQADDSA ĠEREMIJA 8 Bible Online

ĠEREMIJA 8 - Maltese Bible with DC – IL-BIBBJA IL-KOTBA MQADDSA bible

ĠEREMIJA 8

¹“Dakinhar, oraklu tal-Mulej, jaqilgħu mill-oqbra l-għadam tas-slaten ta’ Ġuda, u l-għadam tal-prinċpijiet, u l-għadam tal-qassisin, u l-għadam tal-profeti, u l-għadam tan-nies ta’ Ġerusalemm,

²u jperrċuh għax-xemx u l-qamar u l-qtajja’ kollha tas-smewwiet[32], li huma ħabbewhom u qdewhom u marru warajhom, u ħadu l-parir tagħhom u qiemuhom. Ma jiġbruhomx, u ma jidfnuhomx, imma jħalluhom bħad-demel f’wiċċ l-art.

³Imbagħad jippreferu l-mewt mill-ħajja n-nies li jibqgħu ħajjin minn dan in-nisel ħażin fil-pajjiżi kollha kull fejn għad inxerridhom, oraklu tal-Mulej tal-eżerċti.

⁴“Inti tgħidilhom, dan jgħid il-Mulej: Jaqaw jekk xi ħadd jaqa’, ma jerġax iqum? Jew jekk jitlef triqtu, ma jerġax lura?

⁵Għaliex, mela, dan il-poplu ntilef b’telfa għal dejjem? Żammew sħiħ fil-qerq, ma jridux jerġgħu lura.

⁶Jien qgħadt attent u smajt, u huma jgħidu dak li mhux sewwa. M’hemmx bniedem niedem minn ħżunitu u jgħid: ‘X’għamilt?’ Ilkoll qabdu l-ġirja tagħhom, bħal żiemel imlebbet għat-taqtigħa.

⁷Imqar il-laqlâq tal-ajru jagħraf żmienu; il-gamiema, il-ħuttafa, u l-għarnuq iħarsu ż-żmien tal-passa tagħhom. Imma l-poplu tiegħi ma jagħrafx id-dritt tal-Mulej.

⁸Kif tistgħu tgħidu: ‘Aħna għorrief u l-liġi tal-Mulej magħna?’ Għax tassew gidba għamlet minnha il-pinna giddieba tal-iskribi[33].

⁹L-għorrief jitħawdu, jitħabblu u jinqabdu. Arawhom, ċaħdu l-kelma tal-Mulej, u issa x’għerf baqgħalhom?

¹⁰“Għalhekk jien nerħi lin-nisa tagħhom f’idejn ħaddieħor, ir-raba’ tagħhom lil sidien oħra; għax miż-żgħir sal-kbir, kollha għatxana għas-serq; mill-profeta sal-qassis kollhom qerq f’għemilhom.

¹¹Idewwu l-ġerħa ta’ bint il-poplu tiegħi bħallikieku xejn u jgħidu: “Sliem, Sliem,” u sliem m’hemmx!

¹²Imisshom jistħu bil-qżież li għamlu; imma huma ma jistħux u anqas wiċċhom ma jafu jħammru. Għalhekk għad jaqgħu ma’ dawk li diġà waqgħu; jiġġarrfu f’jum kastighom, jgħid il-Mulej.

¹³Għalkollox intemmhom, oraklu tal-Mulej, ma jibqax għeneb fid-dielja, lanqas tin fit-tina, sal-weraq jidbiel, u nibagħtilhom min jgħaffiġhom.

¹⁴“Għalfejn qegħdin hawn aħna? Ħa ninġabru u nidħlu fl-ibliet armati, u nintemmu hemm. Għax il-Mulej, Alla tagħna, se jeqridna! Se jisqina ilma avvelenat, għax dnibna kontra l-Mulej.

¹⁵Stennejna s-sliem, imma ma sibna ebda riżq; is-siegħa tal-fejqan, imma ma sibniex ħlief twerwir!

¹⁶Minn Dan jinstema’ l-infiħ lehġien; taż-żwiemel tiegħu iż-żehir tal-qawwijin tiegħu titriegħed l-art kollha kemm hi. Jiġu u jibilgħu l-art b’kulma fiha, lill-belt u n-nies li jgħammru fiha.

¹⁷Għax, arawni, sriep velenużi se nitlaq f’nofskom, li ebda seħer ma jagħmel bihom, u għad jigdmukom,” oraklu tal-Mulej.

¹⁸M’hemmx fejqan għall-għali tiegħi, qalbi nfniet!

¹⁹Isimgħu! L-għajta mbikkija ta’ bint il-poplu tiegħi, l-għajta minn art imbiegħda! “Ma għadux il-Mulej f’Sijon? M’għadux hemm is-sultan tagħha?” Għaliex inkewni bl-idoli tagħhom, bil-frugħat tal-barranin?

²⁰“Għadda żmien il-ħsad, intemm is-sajf, u aħna għadna ma ħlisniex.”

²¹Minħabba l-ġerħa ta’ bint il-poplu tiegħi jien miġruħ. Qabadni swied il-qalb, qabadni t-tkexkix.

²²M’hemmx aktar balzmu f’Gilgħad[34]? Ebda tabib ma hemm? Għaliex, mela, ma għalqitx il-ġerħa ta’ bint il-poplu tiegħi?

²³Mhux li kien xi ħadd jagħmel minn rasi għajn ta’ ilma, u min għajnejja nixxiegħa ta’ dmugħ, ħa nibki lejl u nhar il-maqtulin ta’ bint il-poplu tiegħi!