Read Maltese Bible with DC – IL-BIBBJA IL-KOTBA MQADDSA ĠEREMIJA 9 Bible Online

ĠEREMIJA 9 - Maltese Bible with DC – IL-BIBBJA IL-KOTBA MQADDSA bible

ĠEREMIJA 9

¹Mhux li kont insib fejn nistkenn fid-deżert, ħa nħalli l-poplu tiegħi, u nitbiegħed minnhom. Għax ilkoll kemm huma adulteri, qatgħa ta’ nies ribelli.

²U għamlu minn ilsienhom qaws miġbud. Il-qerq, u mhux is-sewwa, isaltan fil-pajjiż. Għax minn ħażen għal ħażen għaddejjin, u bija ma jridux jafu, oraklu tal-Mulej.

³Oqogħdu attenti minn xulxin ilkoll; u ħadd ma għandu jafda f’ħuh. Għax l-aħwa jaqilgħu lill-aħwa ’l barra, u kull ħabib sejjer iqassas.

⁴Wieħed iqarraq bl-ieħor u s-sewwa ma jgħiduh qatt, għax ilsienhom darrewh fi kliem il-gideb. Għejew jidinbu, u ma jridu jindmu qatt.

⁵Qalb il-qerq l-għamara tiegħek, oraklu tal-Mulej, u fil-qerq ma jridux jagħrfuni.

⁶Għalhekk dan jgħid il-Mulej tal-eżerċti: “Arani, jien indewwibhom u nġarrabhom. Nista’ nagħmel mod ieħor ma’ bint il-poplu tiegħi?

⁷Ilsienhom vleġġa misnuna, ħlief qerq fommhom ma jlissinx. “Sliem!” jgħid lill-għajru, u f’qalbu jlestilu n-nasba.

⁸U m’għandix nikkastigahom għal dan kollu? Oraklu tal-Mulej. U minn poplu bħal dan m’għandix nitħallas?”

⁹Ngħolli leħen ta’ biki u tinwiħ għall-muntanji, għanja tal-mewt għall-mergħat tad-deżert. Għax maħruqa huma, u ħadd ma jgħaddi aktar minnhom, u ma jisimgħux aktar leħen l-imrieħel; mit-tajra tal-ajru sal-bhejjem, kollha ħarbu u telqu.

¹⁰U nagħmel gozz ġebel minn Ġerusalemm, u bejta tax-xakalli; u ħerba mill-ibliet ta’ Ġuda u ħadd ma jgħammar fihom.

¹¹Min hu l-għaref li jifhem dan? U jgħid x’qallu fomm il-Mulej: Għaliex l-art tħarbtet u nħarqet bħad-deżert, u ma jista’ jgħaddi minnha ħadd?

¹²U l-Mulej wieġeb: “Għax telqu l-liġi tiegħi, li jien qegħedt quddiemhom, u ma semgħux minn kliemi, u ma mxewx fuqu,

¹³u marru wara l-ebusija ta’ qalbhom u wara l-Bagħalim, bħalma għallmuhom missirijiethom.”

¹⁴Għalhekk dan jgħid il-Mulej tal-eżerċti, Alla ta’ Iżrael: “Arawni, se nitmagħhom l-absint u nisqihom l-ilma avvelenat.

¹⁵Inxerridhom qalb ġnus li, la huma u lanqas missirijiethom, qatt ma kienu jafu bihom; u nitlaq għal warajhom ix-xabla sa ma teqridhom.”

¹⁶Dan jgħid il-Mulej tal-eżerċti: “Qisu li ssejħu lill-bekkejja biex jiġu; ibagħtu l-aħjar fosthom ħa jgħaġġlu jiġu,

¹⁷u jfittxu jgħannulna għanja ta’ tinwiħ. Ħa jgelgel minn għajnejna d-dmugħ, u minn xfarhom inixxi l-ilma!

¹⁸Għax leħen it-tinwiħ jinstama’ minn Sijon: ‘Ah! X’rovina ġietna, x’għajb għalina. Ikollna nitilqu artna, u nħallu ’l djarna.’

¹⁹Iva, isimgħu, nisa, kelmet il-Mulej, ħa jilqgħu widnejkom kelmet fommu; għallmuha lil bnietkom it-tinwiħa, u kull waħda lil seħbitha l-għanja tal-mewt.

²⁰‘Għax telgħet il-mewt mit-twieqi u daħlet fil-palazzi tagħna. Qerdet it-tarbija fit-triq, u ż-żgħażagħ fl-imsieraħ.’

²¹Tkellem: ‘Dan jgħid il-Mulej: L-iġsma tan-nies maqtula bħad-demel fuq wiċċ ir-raba’, u bħal għamra wara l-ħassad bla ma ħadd jiġborha.’ ”

²²Dan jgħid il-Mulej: “Ma għandux jiftaħar l-għaref b’għerfu, u anqas ma għandu jiftaħar il-qalbieni bi qlubitu; m’għandux jiftaħar l-għani b’ġidu.

²³Imma min irid jiftaħar, b’dan għandu jiftaħar: li għandu d-dehen biex jagħrafni, għax jien hu l-Mulej, li nagħmel it-tjieba, il-ħaqq, u s-sewwa fuq l-art, għax b’dawn nitgħaxxaq, oraklu tal-Mulej.

²⁴Araw, għad jiġi żmien, oraklu tal-Mulej, meta jien inħallas lil dawk li huma maħtunin biss f’ġisimhom:

²⁵lill-Eġittu, lil Ġuda, lil Edom, lill-Għammonin, lill-Mowabin, u lil dawk kollha li jqaxxru xagħar ngħashom[35], u jgħammru fid-deżert. Għax dawn il-ġnus, għad-dar ta’ Iżrael, ilkoll huma bla ħtin f’qalbhom.