Read Maltese Bible with DC – IL-BIBBJA IL-KOTBA MQADDSA LAMENTAZZJONIJIET 1 Bible Online

LAMENTAZZJONIJIET 1 - Maltese Bible with DC – IL-BIBBJA IL-KOTBA MQADDSA bible

LAMENTAZZJONIJIET 1

¹Ah! Kif inhi weħidha, il-belt li kienet tiżgħed bin-nies! Saret bħal armla l-kbira fost il-ġnus! Is-sidt fost l-ibliet, il-ħaraġ ikollha tħallas.

²Billejl tibki biki tad-demm, dmugħha jġelben ma’ ħaddejha. Lil ħadd m’għandha jfarraġha, minn fost l-egħżeż tagħha; ħbiebha ttradewha, u sarulha għedewwa.

³Tela’ Ġuda minħabba l-għaks, u l-jasar iebes, jgħammar fost il-ġnus bla ma jsib mistrieħ. Dawk kollha li ġrew warajh laħquh meta kien fl-hemm.

⁴It-toroq ta’ Sijon jibku, għall-festi ħadd m’għadu jmur. Bibienha kollha ħerba; il-qassisin jitniehdu; ix-xebbiet tagħha mnikkta, u hi mgħargħra fl-imrar.

⁵Dawk li ħaqruha marru minn fuq, stagħnew l-għedewwa tagħha. Il-Mulej għakkisha minħabba l-kotra ta’ dnubietha. It-tfal tagħha marru fl-eżilju, misjuqa mill-għadu tagħhom.

⁶U għeb minn fuq bint Sijon ġmielha kollu, il-kbarat tagħha saru bħaċ-ċriev, il-mergħa ma sabux; telqu bla saħħa, quddiem is-sewwieq tagħhom.

⁷Ġerusalemm tiftakar, f’jiem l-hemm u l-imrar tagħha, fil-ġid għażiż li kien tagħha, sa mill-qedem żminijiet, meta l-poplu tagħha waqa’ f’idejn l-għadu, u ħadd ma kien hemm biex jgħinha. Rawha l-għedewwa tagħha u ddieħku b’qerditha.

⁸Ġerusalemm dinbet bil-kbir, għalhekk saret ħaġa moqżieża; stmellewha dawk li kienu jfaħħruha, għax raw l-għera tagħha. Hi stess titkarrab, u ddawwar wiċċha ’l hemm.

⁹It-tingiż ma’ djulha, ma ħasbet qatt fi tmiemha. Għalhekk waqgħetha tgħaġġbek, ħadd m’għandha min isalvaha. “Ħares, Mulej, lejn il-miżerja tiegħi, għax l-għadu għelibni.”

¹⁰L-għadu medd idejh għall-ġid kollu l-għażiż tagħha. Rat il-ġnus deħlin fis-santwarju tagħha, li int kont għedt ma jidħlux fih waqt il-ġemgħat tiegħek.

¹¹Il-poplu kollu tagħha jokrob, u jfittex il-ħobż. Jibdlu ġidhom l-għażiż mal-ikel, sabiex jinħjew. “Ħares, Mulej, ara sewwa, kif sfajt imkagħbra.

¹²U intom ilkoll li għaddejjin mit-triq, ħarsu sewwa u araw, jekk hawnx hemm bħal hemmi, li waqa’ fuqi; li bih il-Mulej għabbieni fil-jum ta’ saħnet għadbu.

¹³Xeħetli n-nar mill-għoli, nifidli sa ġo għadmi; firex xibka għal riġlejja u ġagħalni nerġa’ lura; u għamel minni ħerba sħiħa, għamilli qalbi sewda, mifnija l-jum kollu.

¹⁴Niseġ madmad minn dnubieti, b’idejh stess baramhom; taqqluli għonqi. Neħħieli saħħti; irħieni l-Mulej f’idejhom; ma niflaħx inqum.

¹⁵“Iddieħak bil-qalbiena tiegħi, Sidi li kien ġo nofsi; sejjaħ kontrija ġemgħa biex ifarrak iż-żgħażagħ tiegħi; għaffeġ is-Sid bħalkieku f’magħsar, ix-xebba, bint Ġuda.

¹⁶Għalhekk jien imbikkija, u d-dmugħ iġelben minn għajnejja; għax tbiegħed minni min isabbarni u jaħjini. Uliedi ħerba għax rebaħ l-għadu.”

¹⁷Sijon meddet idejha, imma m’hemmx min ifarraġha. Il-Mulej ordna għal Ġakobb, li l-ġirien tiegħu jdawruh; u saret Ġerusalemm, koċċ qżież ġo nofshom.

¹⁸“Ġust hu l-Mulej, għax jien irvellajt kontra kelmtu. Isimgħu, mela, popli lkoll kemm intom, u araw in-niket tiegħi; ix-xebbiet u ż-żgħażagħ tiegħi fl-eżilju lkoll marru.

¹⁹Il-maħbubin tiegħi[1] sejjaħtilhom, imma huma daħku bija. Il-qassisin u l-anzjani tiegħi fil-belt intemmu, huma u jfittxu l-ikel, biex jerġgħu jieħdu r-ruħ.

²⁰Ara, Mulej, xi dwejjaq għandi, imbaqbqa ġewwinija, imħawda qalbi ġewwa fija, għax ma ridt nisma’ b’ebda mod. Barra teqred ’l ulied ix-xabla, u ġewwa l-mewt.

²¹Isimgħuni nitniehed, u ħadd ma jsabbarni. Semgħu l-għedewwa bil-ħsara tiegħi, u ferħu b’kulma int għamiltli. Ġib il-jiem li int ħabbart, ħalli jiġrilhom bħali.

²²Ħa jiġi quddiemek il-ħażen kollu tagħhom, u għamlilhom kif għamilt lili għal dnubieti kollha, għax l-ilfiq tiegħi kbir, u qalbi nfniet.”