Read Maltese Bible with DC – IL-BIBBJA IL-KOTBA MQADDSA LAMENTAZZJONIJIET 3 Bible Online

LAMENTAZZJONIJIET 3 - Maltese Bible with DC – IL-BIBBJA IL-KOTBA MQADDSA bible

LAMENTAZZJONIJIET 3

¹Jiena l-bniedem li ġarrabt l-hemm[7] taħt ħatar qilltu.

²Lili saqni u mexxieni, fid-dlam bla ebda dawl.

³Kontrija jdawwar u jerġa’, il-jum kollu idejh.

⁴Tertaqli laħmi u ġildi, farrakli għadmi.

⁵Bena madwari u dawarni bl-imrar u l-hemm.

⁶Ġagħalni ngħammar fid-dlamijiet, bħall-mejtin minn żmien il-qedem.

⁷Dawwarni b’ħajt li ma noħroġx; għabbieni bi ktajjen tqal.

⁸Imqar jekk ngħajjat u nsejjaħ l-għajnuna, it-talba tiegħi joħnoq.

⁹Imbarrali t-triq b’ġebel minġur, għawwiġli mogħdijieti.

¹⁰Ors jissajjali kien għalija, iljun mistoħbi.

¹¹Ħariġni mit-triq u qattagħni bċejjeċ, u miżerja għamel minni.

¹²Ġibed il-qaws tiegħu, u waqqafni b’mira għall-vleġġa.

¹³Waħħalli fil-kliewi l-vleġeġ ulied il-barżakka tiegħu.

¹⁴Sirt daħk il-poplu kollu, l-għanja tagħhom il-jiem kollha.

¹⁵Fawwarni bl-imrar, sakkarni bl-assenzju.

¹⁶Taħanli biż-żrar snieni, u ġagħalni nitmiegħek fit-trab.

¹⁷Ruħi nqatgħet mis-sliem, il-ġid insejtu.

¹⁸Jien għedt: “Marret saħħti; hekk ukoll it-tama tiegħi fil-Mulej!”

¹⁹Il-ħsieb ta’ hemmi u inkwieti, assenzju u mrar!

²⁰Tiftakar ruħi u taħseb, u tinfena ġewwa fija.

²¹Dan jien nhewden f’qalbi, biex b’hekk nittama.

²²Il-ħniena tal-Mulej bla tmiem; tjubitu ma tonqos qatt.

²³Jiġġeddu kull filgħodu, kbira l-fedeltà tiegħek.

²⁴“Sehmi hu l-Mulej,” tgħid ruħi, “għalhekk nittama fih.”

²⁵Tajjeb il-Mulej ma’ min jistennieh, mar-ruħ li tfittxu.

²⁶Tajjeb min jistenna fis-skiet, is-salvazzjoni tal-Mulej;

²⁷tajjeb għall-bniedem li jerfa’ l-madmad[8] sa minn żgħożitu,

²⁸li joqgħod waħdu u sieket, meta jgħabbihulu l-Mulej;

²⁹li qiegħed ħalqu fit-trab[9], għandu mnejn jifdal xi tama;

³⁰li jagħti ħaddejh lil min isawtu, li jimtela biż-żebliħ.

³¹Għax ma jarmix għal dejjem, lill-bniedem il-Mulej.

³²Għaliex jekk hu jgħakkes iħenn skont il-kotra ta’ tjubitu;

³³għax mhux minn qalbu jgħakkes, jew iweġġa’ qalb il-bniedem.

³⁴Li xi ħadd jisħaq taħt riġlejh l-ilsiera kollha tal-art;

³⁵li tgħawweġ id-dritt ta’ bniedem quddiem wiċċ l-Għoli;

³⁶li tqarraq bi bniedem fil-kawża tiegħu, dan il-Mulej ma japprovahx.

³⁷Min qatt tkellem u seħħet kelmtu, kieku Sidi ma ordnahiex?

³⁸Mhux minn fomm l-Għoli, joħroġ id-deni u l-ġid?

³⁹Għala l-bniedem ħaj igerger, għall-kastig ta’ dnubu?

⁴⁰Ngħarblu triqatna u nifluhom, u nerġgħu lura għand il-Mulej.

⁴¹Ħa ngħollu qlubna u idejna, lejn Alla fis-smewwiet.

⁴²Aħna dnibna u rvellajna, u int ma ħfirtilniex.

⁴³Int tlibbist bl-għadab, u ġrejt warajna. Qtiltna bla ma ħennejt.

⁴⁴Instart fi sħaba, biex it-talb ma jaqbiżhiex.

⁴⁵Int għamiltna ż-żibel, l-iskart tal-ġnus.

⁴⁶Ħalqhom fetħu għalina, l-għedewwa tagħna lkoll.

⁴⁷Biża’ u ħofra kien hemm għalina, qerda u tkissir.

⁴⁸Gliegel ta’ dmugħ ċarċru minn għajnejja għat-tifrik ta’ bint il-poplu tiegħi.

⁴⁹Għajni ddemma’ bla ma tehda, ma tridx tistrieħ,

⁵⁰qabel ma jixref il-Mulej mis-sema u jara.

⁵¹Għajnejja jweġġgħuli qalbi, minħabba x-xorti ta’ bniet belti.

⁵²Nasbuli bħal għasfur l-għedewwa tiegħi għal xejn.

⁵³Xeħtuni ħaj ġol-bir, u waddbu l-ħaġar fuqi.

⁵⁴L-ilmijiet laħqu ’l fuq minn rasi, u għedt: “Jien spiċċajt.”

⁵⁵Jien sejjaħt ismek, Mulej, minn qiegħ il-bir.

⁵⁶Int smajt leħni: “La ssoddx widnejk għall-għajta tiegħi għall-għajnuna.”

⁵⁷Meta jien sejjaħtlek, int qrobt lejja, u għedtli: “La tibżax.”

⁵⁸Int ħadt il-kawża tiegħi, u fdejtli ’l ħajti.

⁵⁹Int rajt id-deni li ġarrabt, Mulej; għamel ħaqq miegħi.

⁶⁰Rajt int il-vendikazzjoni tagħhom, ta’ dawk li jmorru kontrija.

⁶¹Int smajt biż-żebliħ tagħhom, u bit-tnassis tagħhom kontrija.

⁶²Xufftejn dawk li qamu għalija u ħsibijiethom, il-jum kollu mhumiex ħlief kontrija.

⁶³Arahom, meta joqogħdu jew iqumu, jien l-għanja tagħhom.

⁶⁴Agħtihom li ħaqqhom Mulej, skont għemil idejhom.

⁶⁵Webbsilhom qalbhom, ixħet is-saħta tiegħek fuqhom.

⁶⁶Agħmel għal warajhom fl-għadab tiegħek, eqridhom minn taħt is-sema, O Mulej!”