Read Maltese Bible with DC – IL-BIBBJA IL-KOTBA MQADDSA LAMENTAZZJONIJIET 4 Bible Online

LAMENTAZZJONIJIET 4 - Maltese Bible with DC – IL-BIBBJA IL-KOTBA MQADDSA bible

LAMENTAZZJONIJIET 4

¹Kif ittappan id-deheb, kif tbiddel id-deheb fin! Il-ġebel jinsab imxerred f’ras kull triq.

²Ulied Sijon għeżież, mitqilhom deheb jiswew! Kif saru issa qishom biċċa xaqquf, xogħol id il-fuħħar!

³Imqar ix-xakalli jagħtu sidirhom, u jreddgħu l-frieħ tagħhom. Bint il-poplu tiegħi kiefra bħan-ngħama[10] fid-deżert.

⁴Ilsien it-tarbija tal-ħalib, weħel mas-saqaf ta’ ħalqha, minħabba l-għatx; it-tfal jittallbu l-ikel, imma ma jagħtihom ħadd.

⁵Dawk li kienu jieklu t-tajjeb, issa bil-ġuħ fit-toroq; dawk li kienu mrobbija fil-porpra, issa jitmiegħku fiż-żibel.

⁶Id-dnub ta’ bint il-poplu tiegħi akbar mill-ħtija ta’ Sodoma, li nqalbet f’waqt wieħed, bla ma ħadd meddilha jdejh.

⁷Jiddu aktar mis-silġ kienu prinċpijietha, bojod aktar mill-ħalib; ġisimhom aħmar aktar mill-qroll, persunithom bħas-saffir.

⁸Imma issa wiċċhom iswed aktar mid-dlam, ma jingħarafx fit-toroq; ġildithom weħlet ma’ għadamhom, ibbieset daqs l-għewied.

⁹Ħabtuha aħjar il-maqtulin bix-xabla minn dawk li nqerdu bil-ġuħ, li ntemmu bil-mod, bħalkieku midrubin, minħabba n-nuqqas ta’ wċuħ l-art.

¹⁰In-nisa, minkejja li ħanina, sajru ’l uliedhom b’idejhom stess, saru ikilhom, dakinhar li tkissret bint il-poplu tiegħi.

¹¹Il-Mulej temm il-qilla tiegħu, sawwab saħnet il-korla tiegħu; u kebbes in-nar f’Sijon, u qerdilha s-sisien tagħha.

¹²Qatt ma emmnu slaten id-dinja, u dawk li jgħammru fl-art, li qatt jidħol gwerrier jew għadu minn bwieb Ġerusalemm.

¹³Minħabba ħtijiet il-profeti tagħha[11], u dnubiet il-qassisin tagħha, li xerrdu fiha d-demm tal-ġusti.

¹⁴Kienu jixxenglu bħal għomja fit-toroq, u mċappsa kollha demm, u lbieshom ħadd ma sata’ jmiss.

¹⁵“Warrbu! Ja mniġġsin!” kienu jgħidulhom; “Warrbu! Warrbu! La tmissuhomx!” Għad jaħarbu u jiġġerrew fost il-ġnus, imma n-nies jgħidu: “Imkien ma jibqgħu.”

¹⁶Il-Mulej stess xerridhom, aktar lejhom ma jħarisx; ma kienx hemm ġieħ għall-qassisin, lanqas ħniena għax-xjuħ.

¹⁷Għajnejna nfnew, kemm se ndumu nħarsu għalxejn għall-għajnuna. Mill-għases tagħna għarrixna għall-poplu[12] li ma jistax jgħinna.

¹⁸Iqisulna l-passi tagħna, li ma nistgħux nimxu fi triqatna. Qorob tmiemna, magħduda jiemna, għax wasal tmiemna.

¹⁹Ġrew warajna eħfef mill-ajkli tas-smewwiet. Ġrew warajna qalb il-muntanji, issajjawlna fid-deżert.

²⁰In-nifs ta’ mnifsejna[13], il-midluk tal-Mulej, inqabad fil-ħofor tagħhom. Taħt id-dell tiegħu ngħidu: “Nistgħu ngħixu fost il-ġnus.”

²¹Ifraħ u thenna, bint Edom, int li tgħammar f’art Għus[14]. Imma għalik ukoll għad jgħaddi l-kalċi, għad tisker u titgħarwen.

²²Intemm dnubek, Bint Sijon, ma jżommokx iżjed fl-eżilju. Imma dnubek, bint Edom, jikkastigah; dnubietek għad jikxifhomlok.