Read Maltese Bible with DC – IL-BIBBJA IL-KOTBA MQADDSA BÀRUK 1 Bible Online

BÀRUK 1 - Maltese Bible with DC – IL-BIBBJA IL-KOTBA MQADDSA bible

BÀRUK 1

¹Dan hu kliem il-ktieb, li kiteb Bàruk bin Nerija, bin Magħxija, bin Sedekija, bin Għasadija, bin Ħilkija, f’Babilonja,

²fil-ħames sena[1], is-sebgħa tax-xahar, minn meta l-Kaldin ħadu Ġerusalemm u tawha n-nar.

³U Bàruk qara kliem dan il-ktieb quddiem Ġekonija bin Ġeħojakim, sultan ta’ Ġuda, u quddiem il-poplu kollu li kien ġie għall-qari tal-ktieb,

⁴u quddiem ix-xjuħ u quddiem il-poplu kollu, mill-kbir saż-żgħir, dawk kollha li kienu jgħammru f’Babilonja ħdejn ix-xmara Sud.

⁵U bkew, u samu, u talbu quddiem il-Mulej;

⁶u ġabru l-flus, kulħadd skont ma kien jista’,

⁷u bagħtuhom Ġerusalemm u Ġeħojakin, il-qassis il-kbir, bin Mikija bin Salom, u lill-qassisin u lill-poplu kollu li kien hemm miegħu f’Ġerusalemm,

⁸meta Bàruk qala’ li t-tagħmir tad-dar tal-Mulej, li ttieħed mit-tempju, jittieħed lura lejn l-art ta’ Ġuda fl-għaxra tax-xahar Siwan. Dan it-tagħmir tal-fidda kien dak li kien għamel Sedekija bin Ġosija, sultan ta’ Ġuda,

⁹wara li Nabukodonosor, sultan ta’ Babilonja, kien ħa marbutin lil Ġekonija, il-prinċpijiet, il-priġunieri, il-kbarat u l-poplu tal-pajjiż minn Ġerusalemm għal Babilonja.

¹⁰U qalulhom: “Ara qegħdin nibagħtulkom il-flus; bihom ixtru vittmi għas-sagrifiċċji tal-ħruq u għas-sagrifiċċji tal-purifikazzjoni, u inċens. Agħmlu offerta tal-qmugħ u offruha fuq l-artal tal-Mulej Alla tagħna.

¹¹U itolbu għall-ħajja ta’ Nabukodonosor, sultan tal-Babilonja, u għall-ħajja ta’ Beltassar ibnu, biex jiemhom ikunu daqs jiem is-sema fuq l-art.

¹²U l-Mulej jagħtina s-saħħa u jdawlilna għajnejna, u hekk inkunu nistgħu ngħixu taħt il-ħarsien ta’ Nabukodonosor, sultan ta’ Babilonja, u taħt id-dell ta’ Beltassar ibnu, u naqduhom għal ħafna żmien u mmorru tajjeb magħhom.

¹³Itolbu għalina l-Mulej, Alla tagħna, għax aħna dnibna kontra l-Mulej Alla tagħna, u sal-lum għadhom ma tbegħdux is-saħna u l-għadab tal-Mulej minna.

¹⁴“U aqraw ukoll dan il-ktieb, li qegħdin nibagħtulkom, biex tagħmlu l-istqarrija tagħkom fid-dar tal-Mulej f’jum ta’ festa u fil-ġranet tal-laqgħat solenni.

¹⁵Għidu dan: ‘Il-ġustizzja hi min-naħa tal-Mulej, Alla tagħna, iżda min-naħa tagħna, kif aħna llum, aħna għandna l-għajb ma’ wiċċna, ma’ wiċċ kull bniedem ta’ Ġuda, u ma’ wiċċ kull min joqgħod Ġerusalemm,

¹⁶ma’ wiċċ is-slaten u l-prinċpijiet, u ma’ wiċċ il-qassisin u l-profeti tagħna, u ma’ wiċċ missirijietna.

¹⁷Għax aħna dnibna quddiem il-Mulej,

¹⁸ma tajniex widen għall-Mulej Alla tagħna, meta sejħilna biex inġibu ruħna skont il-kmandamenti li tana l-Mulej, ma smajniex minnu.

¹⁹“ ‘Sa minn meta l-Mulej ħareġ lil missirijietna mill-art tal-Eġittu sal-lum, aħna qomna kontra l-Mulej Alla tagħna, ġibna ruħna bla ħsieb u ma smajniex il-leħen tiegħu.

²⁰Għalhekk qabdu magħna l-hemm u s-saħta, li l-Mulej kien ħabbrilna permezz tal-qaddej tiegħu Mosè, meta ħareġ lil missirijietna mill-art tal-Eġittu, biex jagħtina art tnixxi ħalib u għasel; u hekk għadna sal-lum.

²¹Ma smajniex leħen il-Mulej, Alla tagħna, f’kulma qalilna permezz tal-profeti li bagħtilna,

²²iżda kull wieħed minna mexa skont il-qalb ħażina tiegħu billi qdejna allat oħra u għamilna dak li hu ħażin quddiem il-Mulej, Alla tagħna.