Read Maltese Bible with DC – IL-BIBBJA IL-KOTBA MQADDSA BÀRUK 2 Bible Online

BÀRUK 2 - Maltese Bible with DC – IL-BIBBJA IL-KOTBA MQADDSA bible

BÀRUK 2

¹“ ‘Għalhekk il-Mulej temm il-kelma li kien qal għalina u għall-imħallfin li kienu jaħkmu fuq Iżrael, u għas-slaten u l-prinċpijiet tagħna, u għan-nies kollha ta’ Iżrael u ta’ Ġuda.

²Qatt ma seħħ taħt is-smewwiet kollha dak li hu għamel f’Ġerusalemm, kif hemm miktub fil-Liġi ta’ Mosè;

³wasalna biex nieklu l-laħam ta’ wliedna, bniet u subien.

⁴Rħiehom f’idejn is-slaten kollha ta’ madwarna biex ikunu mistkerrha u mwarrba mill-popli kollha ta’ madwar, li fosthom xerridhom il-Mulej.

⁵U flok sidien sabu ruħhom ilsiera, għaliex dnibna kontra l-Mulej, Alla tagħna, billi ma smajniex minn kelmtu.

⁶“ ‘Għall-Mulej, Alla tagħna, il-ġustizzja għalina u għal missirijietna l-wiċċ mistħi kif aħna llum.

⁷Kulma qal il-Mulej għalina - dawn il-ħsarat kollha - laħaqna.

⁸Imma aħna ma rattabniex wiċċ il-Mulej, u ħadd minna ma raġa’ lura mill-fehmiet ta’ qalbna ħażina.

⁹U l-Mulej qagħad għassa fuq il-ħsarat, u ġiebhom fuqna, għax il-Mulej ġust fl-għemejjel kollha tiegħu, li kkmandana nagħmlu.

¹⁰Aħna ma smajniex minn leħnu li kien widdibna biex nimxu skont il-kmandamenti li l-Mulej qegħdilna quddiemna.

¹¹“ ‘U issa, Mulej, Alla ta’ Iżrael, li ħriġt lill-poplu tiegħek mill-Eġittu bi driegħ qawwi, b’sinjali u b’għeġubijiet, u b’qawwa kbira u bi driegħ merfugħ, u għamilt isem għalik, kif inhu issa,

¹²aħna dnibna, imxejna bid-dnewwa u t-tagħwiġ, Mulej, Alla tagħna, fil-kmandamenti tiegħek kollha.

¹³Ħa jerġa’ lura l-għadab tiegħek minna, għax bqajna ftit fost il-ġnus, li fosthom int xerridtna.

¹⁴Isma’, Mulej, it-talb u s-supplika tagħna, eħlisna f’ġieħek u għamel li nsibu l-ħniena f’għajnejn dawk li eżiljawna,

¹⁵sabiex tkun taf l-art kollha li int il-Mulej, Alla tagħna, għax ismek jissejjaħ fuq Iżrael u nislu.

¹⁶Ħares fuqna, Mulej, mid-dar imqaddsa tiegħek, u aħseb fina. Agħtina widen, Mulej, u ismagħna.

¹⁷Iftaħ għajnejk, Mulej, u ara, għax mhux il-mejtin f’Qiegħ l-Art, li ruħhom infirdet minn ġisimhom, isebbħu u jfaħħru l-ġustizzja tal-Mulej,

¹⁸imma r-ruħ imnikkta għall-aħħar, min jimxi mgħawweġ u mifni, l-għajnejn għajjiena u r-ruħ imġewħa, dawn isebbħuk u jroddulek il-ġustizzja, Mulej.

¹⁹Għax mhux għall-merti ta’ missirijietna u tas-slaten tagħna aħna rressqu t-talb tagħna quddiemek, Mulej, Alla tagħna,

²⁰imma għaliex int xħett fuqna l-korla u l-qilla tiegħek bħalma kont għedt permezz tal-qaddejja tiegħek il-profeti li kienu jgħidu:

²¹Dan jgħid il-Mulej: Middu għonqkom u aqdu s-sultan ta’ Babilonja, u tibqgħu fuq l-art, li kien ta lil missirijietkom.

²²Jekk imbagħad ma tisimgħux mill-kelma tal-Mulej u ma taqdux lis-sultan ta’ Babilonja,

²³insikket mill-ibliet ta’ Ġuda u f’Ġerusalemm l-għana tal-ferħ u l-għana tal-hena, l-għana tal-għarus u l-għana tal-għarusa, u tkun l-art deżert, u ħadd ma jgħammar fiha.

²⁴“ ‘U aħna ma smajniex mill-kelma tiegħek, u ma qdejniex is-sultan ta’ Babilonja; u inti temmejt il-kelma tiegħek, li int kont għedt permezz tal-qaddejja tiegħek il-profeti, jiġifieri, li jitneħħa minn postu l-għadam tas-slaten tagħna u l-għadam ta’ missirijietna.

²⁵U, ara, issa mxerrdin fil-beraħ għas-sħana tal-jum u l-kesħa tal-lejl. Huma mietu b’mard tal-biża’, bil-ġuħ, u bix-xabla, u bil-pesta.

²⁶U int ġibt id-dar[2], fejn kien jissejjaħ ismek fuqha, f’dak li hi llum, minħabba l-ħażen ta’ dar Iżrael u d-dar ta’ Ġuda.

²⁷“ ‘Imma int, Mulej, Alla tagħna, imxejt magħna skont it-tjieba u l-ħniena kbira kollha tiegħek.

²⁸Hekk kont għedt permezz tal-qaddej tiegħek Mosè dakinhar, meta int ordnajtlu li jikteb il-Liġi tiegħek quddiem ulied Iżrael, u għedtlu:

²⁹Jekk ma tisimgħux minn kliemi, din il-kotra kbira ta’ nies issir l-iżgħar fost il-ġnus, li fosthom inxerridhom.

³⁰Għax jien naf li mhumiex se jisimgħu minni, għax hu poplu rashom iebsa. Imma jidħlu fihom infushom fl-art tal-eżilju tagħhom.

³¹Imbagħad jagħrfu li jien il-Mulej, Alla tagħhom. Jien nagħtihom qalb u widnejn li jisimgħu.

³²“ ‘Huma jfaħħruni f’art l-eżilju tagħhom u jiftakru f’ismi;

³³u għad jerġgħu lura mill-ebusija ta’ rashom u mill-għemejjel ħżiena tagħhom, huma u jiftakru bix-xorti ta’ missirijiethom, li kienu dinbu quddiem il-Mulej.

³⁴U jien irreġġagħhom lura fl-art, li ħlift lil missirjiethom - lil Abraham, lil Iżakk, u lil Ġakobb - u jeħduha f’idejhom: inkattarhom u ma jiċkienu qatt iżjed.

³⁵Nagħmel patt magħhom għal dejjem, li nkun Alla tagħhom u huma jkunu l-poplu tiegħi. U ma nċaqlaqx aktar il-poplu tiegħi Iżrael mill-art li jiena tajthom.