Read Maltese Bible with DC – IL-BIBBJA IL-KOTBA MQADDSA BÀRUK 3 Bible Online

BÀRUK 3 - Maltese Bible with DC – IL-BIBBJA IL-KOTBA MQADDSA bible

BÀRUK 3

¹“ ‘Mulej Alla ta’ Iżrael, li tista’ kollox, ruħ imnikkta u qalb imġarrba qegħdin jgħajtulek:

²Isma’ u ħenn, Mulej, għax dnibna quddiemek.

³Int qiegħed fuq it-tron tiegħek għal dejjem u aħna bla heda qegħdin nintilfu.

⁴Mulej Alla ta’ Iżrael, li tista’ kollox, isma’ t-talba tal-mejtin ta’ Iżrael, ta’ wlied dawk li dinbu kontrik, u ma semgħux il-kelma tal-Mulej, Alla tagħhom; għalhekk ġie fuqna dan it-tiġrib kollu.

⁵Tiftakarx fil-ħażen ta’ missirijietna, imma f’din is-siegħa ftakar fil-qawwa tiegħek u fl-isem tiegħek.

⁶Għax int il-Mulej, Alla tagħna, u aħna nixtiequ nfaħħruk, Mulej;

⁷għax int nissilt f’qalbna l-biża’ tiegħek biex tħajjarna nsejħu ’l ismek. Nixtiequ nfaħħruk f’dan l-eżilju tagħna, għax battalna qlubna mill-ħażen kollu ta’ missirijietna, li dinbu kontrik.

⁸Ara, aħna llum għadna fl-eżilju fejn xerridtna bħala ħaġa ta’ għajb, misħuta, ikkastigati għall-ħażen kollu ta’ missirijietna li tbiegħdu mill-Mulej Alla tagħna.’ ”

⁹Isma’, Iżrael, il-kmandamenti tal-ħajja, agħtu widen, tgħallmu l-għerf!

¹⁰Għala, Iżrael, għala tinsab f’art l-għedewwa tiegħek? Għala qiegħed tixjieħ f’art barranija?

¹¹Għala int imniġġes mal-mejtin, magħdud fost dawk li jinżlu f’Qiegħ l-Art?

¹²Int twarrabt mill-għajn tal-għerf.

¹³Li kieku mxejt fit-triq ta’ Alla, kont tkun tgħix fis-sliem għal dejjem!

¹⁴Tgħallem fejn hemm l-għaqal, fejn hemm il-qawwa, fejn hemm id-dehen, biex f’ħin wieħed tagħraf fejn hemm it-tul tal-għomor u t-tul tal-ħajja, fejn hemm id-dawl għall-għajnejn u s-sliem.

¹⁵Imma min kixef fejn jinsab l-għerf? U min daħal fl-imħażen tiegħu?

¹⁶Fejn huma l-prinċpijiet tal-ġnus, jew dawk li jimmansaw il-bhejjem li hawn fl-art?

¹⁷Jew dawk li jilagħbu bit-tajr tal-ajru, dawk li jaħżnu fidda u deheb, li fihom jafdaw il-bnedmin, u m’hemmx qjies għar-regħba tagħhom?

¹⁸Fejn huma dawk li jaħdmu l-fidda, u dejjem ħsiebhom fiha? Ebda ħjiel ma fadal ta’ xogħolhom.

¹⁹Għebu, niżlu f’Qiegħ l-Art, u posthom ħaduh oħrajn.

²⁰Oħrajn, żgħażagħ, raw id-dawl, u għammru fl-art, imma m’għarfux triq l-għerf.

²¹Dawn m’għarfux mogħdijietu, u anqas uliedhom ma laħquh, u tbiegħdu ħafna minn triqtu.

²²Ma semgħux bih f’Kangħan[3], anqas feġġ f’Teman.

²³Lanqas ulied Ħagar, li fittxew l-għerf ta’ din l-art; in-neguzjanti ta’ Merran u ta’ Teman, dawk li jfasslu l-ħrejjef; u dawk li jfittxu l-għaqal, triq l-għerf ma sabuhiex u lanqas ħasbu f’mogħdijietu.

²⁴Kemm hi kbira, Iżrael, dar Alla[4], kemm hu wiesa’ l-imkien tal-ħakma tiegħu,

²⁵wiesa’ bla qjies, għoli bla tarf.

²⁶Fiha għexu l-ġganti, magħrufin mill-qedem, nies twal, jinqalgħu għall-ġlied.

²⁷Mhux lil dawn għażel Alla, mhux lilhom għarraf triq għerfu;

²⁸inqerdu għax kienu nieqsa mill-għerf, intilfu minħabba bluhathom.

²⁹Min qatt tala’ s-sema u sabu, u niżżlu mis-sħab?

³⁰Min qasam l-ibħra u sabu, u kisbu b’deheb l-aktar fin?

³¹Ħadd ma jaf it-triq li twassal għandu, ħadd ma jsib il-mogħdija tiegħu.

³²Imma Dak li jaf kollox jaf fejn hu l-għerf, għax sabu hu bid-dehen tiegħu; Dak li ħejja l-art għal dejjem, li mlieha bil-bhejjem li jimxu fl-art;

³³hu, li jibgħat id-dawl, u dan imur; isejjaħlu, u jisma’ minnu mriegħed;

³⁴jiddu l-kwiekeb għassiesa f’posthom, kollhom ferħana;

³⁵Hu jsejħilhom, u huma jwieġbu: ‘Hawn aħna’; jiddu ferħana għal dak li għamilhom.

³⁶Dan hu Alla tagħna: ħadd ma joqgħod ħdejh!

³⁷Hu sab it-triq kollha tal-għerf, u tah lil Ġakobb, il-qaddej tiegħu, u lil Iżrael, il-maħbub tiegħu.

³⁸Imbagħad dan l-għerf deher fid-dinja u għammar fost il-bnedmin.